Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 99

I Loto he Poko i Luga

I Loto he Poko i Luga

KO E pō Tuloto anei, ua tuai e aho he mole. Ko Iesu mo e tau aposetolo toko 12 haana kua o mai ke he poko lahi nei he fata i luga ke kai e kaiaga he Paseka. Ko e tagata ne kitia e koe kua fano ko Iuta Isakariota. Kua fano a ia ke tala age ke he tau ekepoa e puhala kua maeke ia lautolu ke moua a Iesu.

He aho fakamua, ne fano a Iuta ki a lautolu mo e hūhū: ‘Ko e heigoa ka mai e mutolu ki a au ka lagomatai e au a mutolu ke tapaki a Iesu?’ Ne pehē a lautolu: ‘Tolugofulu e tupe ario.’ Ti fano ai a Iuta ke feleveia mo e tau tagata nei ke takitaki a lautolu ki a Iesu. Ko e kelea ha ia he mena ia?

Kua oti tuai e kaiaga he Paseka. Ka kua kamata e Iesu mogonei e taha kaiaga pauaki. Ne age e ia ke he tau aposetolo haana e areto mo e pehē: ‘Kai a, ha ko e mena fakatai anei he tino haaku ka foaki ma mutolu.’ Ti age e ia ki a lautolu e kapiniu uaina mo e pehē: ‘Inu a, ha ko e mena fakatai anei he toto haaku ka liligi ma mutolu.’ Ne fakahigoa he Tohi Tapu e mena nei ‘ko e kaiaga afiafi he Iki,’ po ke ‘kaiaga he Iki.’

Ne kai he tau Isaraela e Paseka ke fakamanatu ki a lautolu e magaaho ne ‘fano leva’ e agelu he Atua he tau fale ha lautolu i Aikupito, ka e tamate e tau tama uluaki he tau fale he tau Aikupito. Ka kua manako a Iesu mogonei ke manatu he tau tutaki haana a ia, mo e puhala ne foaki e ia e moui haana ma lautolu. Ti ko e kakano haia ati tala age ai a ia ki a lautolu ke fakamanatu e kaiaga pauaki nei he tau tau takitaha.

He oti e kai he Kaiaga Afiafi he Iki, ne tala age a Iesu ke he tau aposetolo haana ke loto malolō mo e malolō e tua. Fakahiku ai, ne uhu lologo a lautolu ke he Atua ti o ai. Kua leva tuai e pouli mogonei, liga kua mole e tuloto pō. O mai la ke kitia ko e o a lautolu ki fe.