Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 100

Ko Iesu he Katene

Ko Iesu he Katene

HE TOKA e poko i luga, ne o atu a Iesu mo e tau aposetolo haana ke he katene ko Ketesemane. Liga kua lagaloga e o mai ha lautolu ke he mena nei. Ne tala age a Iesu ki a lautolu mogonei ke mataala mo e ke liogi. Ti fano atu a ia, mo e fakaveli fakafohifo ke he kelekele ke liogi.

Magaaho fakamui ne liu atu a Iesu ke he tau aposetolo haana. Ko e heigoa ha lautolu kua taute he manatu e koe? Kua momohe a lautolu! Ne lagatolu e tala age e Iesu kua lata ia lautolu ke mataala, ka e he tau magaaho oti ne liu atu a ia kua momohe a lautolu. ‘Maeke fēfē ia mutolu ke momohe he magaaho pehēnei?’ he talahau e Iesu he magaaho fakahiku ne liu mai a ia. ‘Kua hoko mai e magaaho ke tuku atu au ke he tau fī haaku.’

He mogoia ni ne logona mai e hohā he matakau lahi. Kitiala! Kua o mai e tau tagata mo e tau pelu mo e tau katoua! Ti kua totō e lautolu e tau hulu ke fakamaama ai a lautolu. He tata lahi mai a lautolu, ne hau e taha tagata mai he matakau mo e fina atu fakahako ki a Iesu. Ne figita e ia a Iesu, tuga ne kitia e koe he mena nei. Ko e tagata ia ko Iuta Isakariota! Ko e ha ne figita e ia a Iesu?

Ne hūhū a Iesu: ‘Iuta, to afo kia e koe au aki e figita?’ E, ko e figita ko e fakamailoga. Kua fakailoa ai ke he tau tagata ne fakalataha mo Iuta ko Iesu hanei, ko e tagata ne manako a lautolu ki ai. Ti feoho mai ai e tau fī ha Iesu ke tapaki a ia. Ka kua nakai fakaatā e Peteru a lautolu ke uta a Iesu mo e nakai tau atu. Ne aaki mai e ia e pelu haana ne tamai ti tā aki e tagata taane ne tata ki a ia. Ne nakai hoko e pelu ke he ulu he tagata ka e ne mahio kehe e teliga matau haana. Ka e ne aamo e Iesu e teliga he tagata ti maulu ai.

Ne tala age a Iesu ki a Peteru: ‘Liuaki e pelu haau ke he mena ne toka ai. Nakai kia manatu a koe na maeke ia au ke ole ke he haaku a Matua ma e totou afe he tau agelu ke laveaki au?’ E, na maeke a ia! Ka e nakai ole a Iesu ke he Atua ke fakafano mai e tau agelu, ha kua iloa e ia kua hoko mai tuai e magaaho ke uta he tau fī haana a ia. Ti fakaatā e ia a lautolu ke uta a ia. O mai la ke kitia ko e heigoa ka tupu ki a Iesu mogonei.