Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 92

Liu Fakatu Mai e Iesu a Lautolu ne Mamate

Liu Fakatu Mai e Iesu a Lautolu ne Mamate

KO E tama fifine ne kitia e koe hinei kua 12 e tau moui haana. Ko Iesu kua totō e lima haana, ti ko e matua fifine mo e matua taane haana kua tutū tata mai. Iloa nakai e koe ko e ha ne mata fiafia lahi a laua? O mai la ke kumikumi ai.

Ko e matua taane he tama fifine ko e tagata aoga lahi ne higoa ko Iairo. He taha aho ne gagao e tama fifine haana, ti takoto a ia he mohega. Ka e nakai laukauka mai a ia. Kua kelea fakahaga ni haana gagao. Ne tupetupe lahi a Iairo mo e hoana haana, he liga ko e mate fai e tama fifine ha laua. Ko ia ni e tama fifine ha laua. Ti fano a Iairo ke kumi ia Iesu. Ne logona e ia hagaao ke he tau mana kua taute e Iesu.

Magaaho ne moua e Iairo a Iesu, kua ha ha i ai e tau tagata tokologa ne agaagai ia ia. Ka e fina atu ni a Iairo ti hoko mo e fakaveli hifo ke he tau hui ha Iesu. ‘Kua gagao lahi mahaki e tama fifine haaku,’ he ui e ia. ‘Fakamolemole, hau la ke fakamalolō a ia,’ he ole fakatokolalo e ia. Ne pehē a Iesu to fina atu a ia.

He o atu a lautolu, ne taupoka e tau tagata ke fakatata ki a ia. Amanaki ni a Iesu ti tū. ‘Ko hai ne piki mai ki a au?’ he hūhū e ia. Ne logona e Iesu e malolō ne fano kehe mai ia ia, ti iloa e ia kua fai tagata ne piki age ki a ia. Ka ko hai? Ko e fifine ne kua lahi e gagao ke he 12 e tau. Ne fina atu a ia mo e piki ke he tau tapulu ha Iesu, ti malolō a ia!

Ne fiafia a Iairo ke he mena nei, ha kua maeke a ia ke kitia na mukamuka ki a Iesu ke fakamalolō e taha tagata. Ka kua hau e utafekau. ‘Ua matutaki ke fakalavelave a Iesu,’ he ui e ia ki a Iairo. ‘Kua mate tuai e tama fifine haau.’ Ne logona ai e Iesu ti pehē a ia ki a Iairo: ‘Ua tupetupe, to mitaki a ia.’

He hohoko a lautolu ke he fale ha Iairo, kua tagi e tau tagata he momoko lahi. Ka e pehē a Iesu: ‘Ua tagi. Nakai mate e tama. Kua mohe ni a ia.’ Ka kua fekī mo e fakafiufiu a lautolu ki a Iesu, ha kua iloa e lautolu kua mate a ia.

Ne uta e Iesu e matua taane mo e matua fifine he tama fifine mo e tokotolu he tau aposetolo haana ke he poko ne takoto ai e tama. Ne totō e ia e lima he tama fifine ti pehē: ‘Matike a!’ Ti kua moui tuai a ia, tuga ne kitia e koe he mena nei. Ti matike a ia mo e fai fano! Ko e kakano haia ati fiafia lahi mahaki e matua fifine mo e matua taane haana.

Nakai ko e tagata fakamua anei ne liu fakatu mai e Iesu he mate. Ko e tagata fakamua ne talahau he Tohi Tapu ko e tama taane he fifine takape ne nofo he maaga ko Naina. Fakamui, ne fakatu mai foki e Iesu a Lasaro, ko e tugaane ha Maria mo Mareta, mai he mate. Magaaho ka pule a Iesu ko e patuiki he Atua, to liu fakamomoui e ia e tokologa mo e tokologa he tau tagata kua mamate. Ai kia fiafia a tautolu ke he mena ia?