Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 93

Fagai e Iesu e Tau Tagata Tokologa

Fagai e Iesu e Tau Tagata Tokologa

KO E mena kelea lahi mahaki ne kua tupu. Ne kelipopo laia a Ioane ko e Papatiso. Ne nakai fiafia a Herotia ko e hoana he patuiki, ki a ia. Ti maeke ia ia ke omoomoi e patuiki ke hio kehe e ulu ha Ioane.

Magaaho ne logona e Iesu e mena nei, ne momoko lahi a ia. Ne fano tokotaha a ia ke he matakavi ogoogonoa. Ka e mumui atu e tau tagata ki a ia. He kitia e Iesu e moto tagata, ne fakaalofa a ia ki a lautolu. Ti tutala a ia ki a lautolu hagaao ke he kautu he Atua, mo e fakamalolō a lautolu ne gagao.

He afiafi ia ne o mai e tau tutaki haana ki a ia mo e pehē: ‘Kua mule tuai, ti ko e matakavi ogoogonoa anei. Kia fakafano atu e tau tagata ke maeke ia lautolu ke fakatau e tau mena kai ma lautolu he tau maaga tata mai.’

‘Nakai lata ke o atu a lautolu,’ he tali e Iesu. ‘Age e mutolu e taha mena ke kai a lautolu.’ He fuluhi ki a Filipo, ne hūhū a Iesu: ‘Fakatau e tautolu i fe e tau mena kai loga ke fagai aki e tau tagata oti nei?’

‘To lahi mahaki e tupe ke fakatau aki e tau mena kai ke maeke he tau tagata oti ke igatia mo e fai tama vala tote,’ he tali e Filipo. Ne vagahau a Aneterea: ‘Kua totō he tama taane nei ha tautolu a tau mena kai, lima e areto mo e ua e ika. Ka kua nakai teitei ke lahi ke lata mo e tau tagata oti nei.’

‘Tala age ke he tau tagata ke nonofo he motie,’ he talahau e Iesu. Ti fakaaue a ia ke he Atua ma e tau mena kai, mo e kamata ke vehevehe fakavalavala ai. Ne age mogoia he tau tutaki e areto mo e ika ke he tau tagata oti. Kua toko 5,000 e tagata taane, mo e tokologa atu e tau fifine mo e tau fanau. Ne kai a lautolu oti ti makona ai. Ti ko e magaaho ne fakaputuputu e tau mena kai toetoe, ne ha ha i ai 12 e kato ne puke!

Ne poaki a Iesu ke he tau tutaki haana mogonei ke o atu he poti ke he taha faahi he Tahi ha Kalilaia. He pō ia ne tō e matagi lahi mo e maluelue fano e poti he tau peau. Ne matakutaku lahi e tau tutaki. He hoko ke he tuloto pō, ne kitia e lautolu taha tagata ne fina atu hui ki a lautolu i luga he fuga vai. Ne hea fakatūtū a lautolu he matakutaku, ha kua nakai iloa e lautolu e mena kua kitia e lautolu.

‘Ua matakutaku,’ he ui e Iesu. ‘Ko au ni!’ Ka e nakai la talitonu ia a lautolu. Ti pehē a Peteru: ‘Kaeke ko koe mooli ma Iki na e, tala mai ki a au ke fina atu hui au ki a koe i luga he vai.’ Ne tali e Iesu: ‘Hau a!’ Ti hau a Peteru ki fafo mo e fina atu hui i luga he vai! Ti matakutaku a ia mo e kamata ke tomo, ka e fakahao e Iesu a ia.

Magaaho fakamui, ne liu fagai foki e Iesu e tau afe tagata. He magaaho nei ne fagai e ia aki e fitu e areto mo e falu ika gahoa. Ti kua liu foki loga e tau mena kai ma e tau tagata oti. Kua mitaki lahi kia e puhala ha Iesu he leveki e tau tagata? Magaaho ka pule a ia ko e patuiki he Atua, to nakai lata a tautolu ke tupetupe ke he ha mena taha!