Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 79

Tanielu i Loto he Ana Leona

Tanielu i Loto he Ana Leona

OI, OI! Tuga kua tū hagahagakelea lahi a Tanielu. Ka kua nakai fakamamahi he tau leona a ia! Iloa nakai e koe e kakano? Ko hai ne tuku a Tanielu ki loto nei mo e tau leona? O mai la ke kumikumi ki ai.

Ko e patuiki ha Papelonia mogonei ne higoa ko Tariu. Ne fiafia lahi a ia ki a Tanielu ha kua lahi e totonu mo e iloilo ha Tanielu. Ne fifili e Tariu a Tanielu ke eke mo iki ne mua he kautu haana. Ati mahekeheke ai e falu tagata taane he kautu ki a Tanielu, ti hanei e mena ne taute e lautolu.

Ne ō a lautolu ki a Tariu mo e pehē: ‘Kua talia e mautolu, ko e patuiki na e, kua lata ia koe ke fakatū e matafakatufono ne pehē ko e 30 e aho kua nakai lata ha tagata ke liogi ke he ha atua po ke ha tagata ka ko koe ni hokoia, ko e patuiki na e. Ka fai tagata ka nakai omaoma, ti kua lata ni a ia ke liti ke he tau leona.’ Nakai iloa e Tariu e kakano ne manako e tau tagata na ke fakatū e matafakatufono nei. Ka e manamanatu a ia kua mitaki e manatu, ti tohia e ia ke eke mo matafakatufono. Ko e magaaho nei kua nakai maeke e matafakatufono ke hiki.

Magaaho ne iloa e Tanielu e matafakatufono, ne fano a ia ki kaina mo e liogi, tuga ni ne fa mahani a ia ke taute. Ne iloa he tau tagata kelea to nakai oti e liogi ha Tanielu ki a Iehova. Ti fiafia a lautolu he tuga kua holo mitaki e pulega ha lautolu ke tamate a Tanielu.

Magaaho ne iloa he Patuiki ko Tariu e kakano ne manako e tau tagata nei ke fakatū e matafakatufono ia, ne momoko lahi a ia. Ka kua nakai maeke ia ia ke hiki e matafakatufono, ti poaki e ia ke liti a Tanielu ke he ana leona. Ka e tala age e patuiki ki a Tanielu: ‘Amanaki au ko e Atua kua fekafekau a koe ki ai, to laveaki a koe.’

Ne momoko lahi a Tariu ti nakai maeke a ia ke mohe he pō ia. He pogipogi hake ne poi a ia ke he ana leona. Kitia e koe a ia he mena na. Ne hea atu a ia: ‘Tanielu na e, ko e fekafekau he Atua moui! Kua maeke nakai e Atua ne fekafekau a koe ki ai ke fakamoui a koe mai he tau leona?’

‘Ne fakafano mai he Atua e agelu haana,’ he tali e Tanielu, ‘mo e pāpā e tau gutu he tau leona ti nakai fakamamahi e lautolu au.’

Kua fiafia lahi e patuiki. Ne poaki e ia ke ta hake mai a Tanielu he ana. Ti poaki a ia ke tolo e tau tagata kelea ne lali ke tamate a Tanielu ke he tau leona. Ne nakaila hohoko hifo a lautolu ki kelekele he ana, ka kua tapaki he tau leona a lautolu mo e gutiguti e tau hui motua oti ha lautolu.

Ti tohi e Patuiki ko Tariu ke he tau tagata oti he motu haana: ‘Kua poaki atu au kua lata e tau tagata oti ke fakalilifu e Atua ha Tanielu. Ne taute e ia e tau mana lalahi. Ne fakamoui e ia a Tanielu ti nakai kai he tau leona.’