Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 82

Moretikai mo Eseta

Moretikai mo Eseta

LILIU a tautolu ki tua ke he tau tau gahoa ato fano a Esera ki Ierusalema. Ko Moretikai mo Eseta ko e tau Isaraela ne mua he aoga he kautu ha Peresia. Ko Eseta ko e patuiki fifine, mo e kasini haana ko Moretikai ne uaaki ke he patuiki ne pule. O mai la ke kitia ko e tupu mai fēfē e mena nei.

Ne mamate e tau matua ha Eseta he mogo ne tote lahi agaia a ia, ti feaki hake e Moretikai a ia. Ko Ahasueru ko e patuiki ha Peresia, ne taha e fale patuiki he maaga ko Susana, ti ko Moretikai e taha he haana tau fekafekau. He taha aho ne nakai omaoma a Vasati ko e hoana he patuiki, ti fifili he patuiki e hoana foou ke eke mo patuiki fifine haana. Iloa nakai e koe ko hai e fifine ne fifili e ia? E, ko e fifine fulufuluola ko Eseta.

Kitia nakai e koe e tagata fakatokoluga nei kua tukutuku hifo e tau tagata ki ai? Ko Hamanu a ia. Ko ia ko e tagata talahaua lahi i Peresia. Ne manako a Hamanu ki a Moretikai, ne kitia e koe hane nofo he mena na, ke tukutuku hifo foki ki a ia. Ka e nakai mahalo a Moretikai ke taute pihia. Ne nakai manatu a ia kua hako ke tukutuku hifo ke he tagata mahani kelea pihia. Ne ita lahi a Hamanu ha ko e mena nā. Ti taute e ia e mena nei.

Ne tala age e Hamanu e tau tala pikopiko ke he patuiki hagaao ke he tau Isaraela. ‘Ko lautolu ko e tau tagata kelea ne nakai omaoma ke he tau fakatufono haau,’ he talahau e ia. ‘Kua lata ni a lautolu ke tamate.’ Nakai iloa e Ahasueru ko e hoana haana ko Eseta ko e fifine Isaraela. Ka e fanogonogo a ia ki a Hamanu, ti fakatu e ia e matafakatufono ka hoko e aho ne kotofa to tamate oti e tau Isaraela.

Magaaho ne logona e Moretikai e matafakatufono ia, ne fakaatukehe lahi a ia. Ne fakafano e ia e fekau ki a Eseta: ‘Kia tala age e koe ke he patuiki, ti olelalo ki a ia ke fakahao a tautolu.’ Ko e totoko ke he fakatufono a Peresia ka fina atu ke kitia e patuiki ka e nakai uiina a koe. Ka kua fina atu a Eseta ka e nakai uiina. Ne fakaolo age he patuiki e tokotoko auro ki a ia, ko e kakano to nakai tamate a ia. Ne uiina e Eseta e patuiki mo Hamanu ke he taha galue lahi. He ha ha i ai ne hūhū e patuiki ki a Eseta ke he mena kua manako a ia mai he patuiki. Ne pehē a Eseta to tala age e ia ka liliu mai a ia mo Hamanu ke he taha kaiaga foki he aho hake.

He kaiaga ia ne tala age a Eseta ke he patuiki: ‘To tamate a au mo e tau tagata haaku.’ Ne ita e patuiki. ‘Ko hai ne loto malolō ke taute e mena ia?’ he hūhū e ia.

‘Ko e tagata ia ko e fī, ko e tagata kelea kō, ko Hamanu!’ he ui e Eseta.

Kua ita lahi mooli e patuiki mogonei. Ne poaki e ia ke tamate a Hamanu. Ka mole ia, ne fakatu he patuiki a Moretikai ko e tagata ke uaaki he pule ki a ia. Ti eketaha a Moretikai ke fakatu e matafakatufono foou ke fakaatā e tau Isaraela ke puipui e tau momoui ha lautolu he aho ne kotofa ke tamate a lautolu. Ha kua aoga lahi e tuaga ha Moretikai mogonei, kua tokologa e tagata ne lagomatai e tau Isaraela, ti hao a lautolu mai he tau fī ha lautolu.

Tohi ha Eseta he Tohi Tapu.