Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 81

Falanaki ke he Lagomatai he Atua

Falanaki ke he Lagomatai he Atua

KUA totou afe e tagata ne o atu he fenoga loa mai i Papelonia ki Ierusalema. Ka ko e magaaho ne hohoko atu a lautolu, kua malona lahi a Ierusalema. Kua nakai fai tagata ne nofo i ai. Ne lata e tau Isaraela ke liu talaga e tau mena oti mai he kamataaga.

Taha he tau mena fakamua ne talaga e lautolu ko e fatapoa. Ko e matakavi anei kua maeke ia lautolu ke huhunu e tau poa manu, po ke tau foakiaga fakaalofa ki a Iehova. Fai mahina he mole, ne kamata e tau Isaraela ke tālaga e faituga. Ka ko e tau fī ne nonofo he tau motu ne tata mai kua nakai manako ke he tau Isaraela ke talaga ai. Ti lali a lautolu ke fakamatakutaku e tau Isaraela ke taofi e gahua. Fakahiku ai, ne omoi he tau fī nei e patuiki foou ha Peresia ke fakatu e matafakatufono ke taofi e gahua talaga.

Loga e tau tau he mole. Kua 17 e tau mogonei tali he liliu mai e tau Isaraela i Papelonia. Ne fakafano e Iehova e tau perofeta haana ko Hakai mo Sakaria ke tala age ke he tau tagata ke liu kamata e gahua talaga. Ne falanaki e tau tagata ke he lagomataiaga he Atua, ti omaoma a lautolu ke he tau perofeta. Ne kamata a lautolu ke liu talaga ai, pete he pehē e matafakatufono ke nakai taute e lautolu e mena ia.

Ti ko e iki pule ha Peresia ko Tatenai ne hau mo e hūhū ke he tau Isaraela ko e heigoa e tonuhia ha lautolu ke talaga e faituga. Ne fakailoa he tau Isaraela ki a ia, he haia a lautolu i Papelonia ne tala age e Patuiki ko Kuresa ki a lautolu: ‘Kia o atu a ki Ierusalema mo e tālaga e faituga ha Iehova ko e Atua ha mutolu.’

Ne fakafano atu e Tatenai e tohi ki Papelonia ke hūhū kua mooli kia e mena ne talahau e Kuresa, ne kua fitā he mate. Nakai leva ti kua liu tamai e tohi he patuiki foou ha Peresia. Ne pehē ai kua talahau mooli e Kuresa e mena ia. Ati tohi ai he patuiki: ‘Toka e tau Isaraela ke talaga e faituga he Atua ha lautolu. Ti poaki atu e au ke lagomatai e mutolu a lautolu.’ Kavi ke he fā e tau ti mau ai e faituga, kua fiafia lahi e tau Isaraela.

Loga foki e tau tau he mole. Mogonei, kua teitei 48 e tau tali mai he mau e faituga. Ne mativa e tau tagata i Ierusalema, ti ko e maaga mo e faituga he Atua kua nakai fulufuluola lahi. I Papelonia, ne iloa e Esera ko e tagata Isaraela, kua lata e faituga he Atua ke fakafoou. Ti iloa nakai e koe ko e heigoa haana ne taute?

Ne fano a Esera ke kitia a Aretaseta, ko e patuiki ha Peresia, ti age he patuiki mitaki nei ki a Esera e tau mena fakaalofa loga ke uta ki Ierusalema. Ne ole a Esera ke he tau Isaraela i Papelonia ke lagomatai a ia ke uta e tau mena fakaalofa nei ki Ierusalema. Kavi ke he 6,000 tagata ne pehē to ō a lautolu. Ne loga lahi e tau ario mo e tau auro mo e falu koloa uho ha lautolu ke uta.

Ne tupetupe a Esera ha kua haia e tau tagata kelea he puhalatū. Neke uta he tau tagata nei e tau ario mo e tau auro ha lautolu mo e tamate a lautolu. Ati fakapotopoto mai e Esera e tau tagata, tuga ne kitia e koe he fakatino. Ti liogi a lautolu ki a Iehova ke puipui a lautolu he fenoga loa he liliu ki Ierusalema.

Ne puipui e Iehova a lautolu. Ti fā e mahina he o atu ai, kua hohoko mo e haohao mitaki a lautolu ki Ierusalema. Kua fakakite nakai he mena nei na maeke a Iehova ke puipui a lautolu kua falanaki ki a ia ma e lagomataiaga?