Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 57

Fifili he Atua a Tavita

Fifili he Atua a Tavita

KITIA nakai e koe e mena ne tupu? Ne fakahao he tama taane e punua mamoe mai he urosa. Ne hau e urosa mo e uta e punua mamoe ti kua amanaki ke kai ai. Ka e tutuli he tama taane mo e fakahao e punua mamoe mai he gutu he urosa. Ti ko e mogo ne tu ai e urosa, ne taofi he tama taane e urosa mo e keli ai ti mate! He taha magaaho foki ne fakahao e ia e taha he tau mamoe mai he leona. Ko e tama loto malolō nakai anei? Iloa nakai e koe ko hai a ia?

Ko e tama fuata nei ko Tavita. Ne nofo a ia he maaga ko Petelehema. Ko e matua tupuna taane haana ko Opeta, ko e tama taane ha Ruta mo Poasa. Manatu nakai e koe a lautolu? Mo e ko e matua taane ha Tavita ko Iese. Ne leveki e Tavita e tau mamoe he matua taane haana. Molea e 10 e tau he fifili e Iehova a Saulo mo patuiki ti fanau a Tavita.

Ne hoko e magaaho ti tala age a Iehova ki a Samuela: ‘Uta e magalolo pauaki mo e fano ke he fale ha Iese i Petelehema. Kua fifili e au e taha he haana tau tama taane ke eke mo patuiki.’ He magaaho ne kitia e Samuela e tama taane uluaki ko Eliapo, ne pehē a ia ki a ia ni: ‘Ko ia hanei kua fifili e Iehova.’ Ka e tala age a Iehova ki a ia: ‘Aua neke onoono ke he haana tokoluga mo e haana fulufuluola. Kua nakai fifili e au a ia mo patuiki.’

Ti ui e Iese haana tama taane ko Apinatapu mo e tamai a ia ki a Samuela. Ka e pehē a Samuela: ‘Nakai, nakai fifili foki e Iehova a ia.’ Ti tamai foki e Iese taha tama taane haana ko Sama. ‘Nakai, nakai fifili foki e Iehova a ia,’ he talahau e Samuela. Ne tamai e Iese fitu e tama taane haana ki a Samuela, ka e nakai fifili e Iehova taha ia lautolu. ‘Kua katoa mai kia haau a fanau?’ he hūhū e Samuela.

‘Ne toe agaia e tama fakamui,’ he talahau e Iese. ‘Ka ko ia kua leveki e tau mamoe.’ Magaaho ne tamai ai a Tavita, ne kitia e Samuela ko ia ko e tama mata mitaki. ‘Ko ia hanā,’ he talahau e Iehova. ‘Liligi e lolo ki luga haana.’ Ti taute ai e Samuela e mena nei. To hoko mai e magaaho ke eke ai a Tavita mo patuiki ha Isaraela.