Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 62

Matematekelea he Magafaoa ha Tavita

Matematekelea he Magafaoa ha Tavita

HE MOLE e kamata a Tavita ke pule i Ierusalema, ne age e Iehova ke he kautau haana e tau kautūaga loga ke he tau fī ha lautolu. Ne mavehe a Iehova ke age e motu ko Kanana ke he tau Isaraela. Ti ko e mogonei, ha ko e lagomatai ha Iehova, ko e tau fonua ne mavehe ma lautolu ne eke ai mo fonua ha lautolu.

Ko Tavita ko e pule mitaki. Ne fakaalofa a ia ki a Iehova. Ti ko e taha he tau mena fakamua ne taute e ia he mole e moua a Ierusalema ko e tamai ki ai e puha he maveheaga a Iehova. Ti manako a ia ke talaga e faituga ke tuku ai.

Magaaho ne motua a Tavita, ne taute e ia e mena kelea lahi. Iloa e Tavita na hepe ke uta e mena he taha tagata. Ka e he taha afiafi, ko ia haia he tua fale he fale patuiki haana, ne ono hifo a ia ti kitia e fifine fulufuluola lahi. Ko e higoa haana ko Patesepa, ti ko e taane haana ko e taha kautau ha Tavita ne higoa ko Uria.

Ne manako lahi a Tavita ki a Patesepa ti poaki e ia ke tamai a ia ke he fale patuiki haana. Kua fano tuai e taane haana ke he tau. Ne momohe a Tavita mo Patesepa ti fai magaaho he mole ti iloa e Patesepa kua fai tama a ia. Ne tupetupe lahi a Tavita ti poaki ke he takitaki kau haana ko Ioapo ke tuku a Uria i mua he malē tau ke mate ai. Magaaho ne mate a Uria, ne mau a Tavita mo Patesepa.

Ne ita lahi a Iehova ki a Tavita. Ti fakafano e ia e fekafekau haana ko Natano ke tala age ki a ia hagaao ke he tau agahala haana. Kua kitia e koe he fakatino nā a Natano hane tutala ki a Tavita. Kua momoko lahi a Tavita ha ko e mena ne taute e ia, ti nakai tamate e Iehova a ia. Ka e pehē a Iehova: ‘Ha kua taute e koe e tau mena kelea nei, to matematekelea lahi e magafaoa haau.’ Ti lahi mooli e matematekelea ha Tavita!

Fakamua, ne mate e tama taane ha Patesepa. Ti ko e tama taane fakamua ha Tavita ko Amanono ne tamai e mahakitaga haana hoko laua ni ti momohe pulenoa mo ia. Ko e tama taane ha Tavita ko Apisaloma ne ita lahi ke he mena nei ti kelipopo e ia a Amanono. Fai magaaho, ne tokologa e tagata ne fiafia ki a Apisaloma ti fakatū ne ia a ia mo patuiki. Fakahiku, ne kautū a Tavita he tau mo Apisaloma, ne mate ai a ia. E, kua to lahi e matematekelea ha Tavita.

He mogoia, ne fanau e Patesepa e tama taane ne higoa ko Solomona. Magaaho ne fuakau mo e gagao a Tavita, ne lali e tama taane haana ko Atonia ke fakatū a ia ni mo patuiki. He mena ia, ne poaki a Tavita ke he ekepoa ko Satoka ke liligi e maga lolo ke he ulu a Solomona ke fakakite ko Solomona ka patuiki. Nakai leva, ne mate a Tavita he 70 e tau he moui. Ne pule a ia ke he 40 e tau, ka ko e mogonei ko Solomona ko e patuiki ha Isaraela.