Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 60

Apikaila mo Tavita

Apikaila mo Tavita

ILOA nakai e koe e fifine matafulufuluola kua hau ke feleveia mo Tavita? Ko e higoa haana ko Apikaila. Ko e fifine iloilo a ia, mo e taofi e ia a Tavita neke taute e mena kelea. Ka e ato fakaako hagaao ke he mena ia, onoono la a tautolu ke he mena kua tupu ki a Tavita.

He mole e hola a Tavita mai ia Saulo, ne fakamumuli a ia i loto he ana. Ko e haana a tau matakainaga mo lautolu ne toe he magafaoa haana ne fakalataha mo ia i ai. Kavi ke he 400 e tagata taane ne ō ki a ia, ti eke a Tavita mo takitaki ha lautolu. Ti fano a Tavita ke he patuiki ha Moapi mo e pehe: ‘Fakamolemole, kia toka haaku a matua taane mo e matua fifine ke nonofo mo mutolu, ato iloa e au e mena ka tupu ki a au.’ He magaaho fakamui ne fakamumuli a Tavita mo e haana tau tagata ke he tau mouga.

He mole e mena nei ti feleveia ai a Tavita mo Apikaila. Ko e taane haana ko Napalu ko e leveki fonua maukoloa. Ha ha ia ia 3,000 mamoe mo e 1,000 koti. Ko Napalu ko e tagata mahani vale. Ka ko e fifine matafulufuluola lahi e hoana haana ko Apikaila. Iloa foki e ia ke taute e mena kua tonu. Lagataha ne fakahao e ia e magafaoa haana. O mai la ke kitia ko e taute fēfē ai.

Ne totonu a Tavita mo e tau tagata haana ki a Napalu. Ne lagomatai e lautolu ke leveki e tau mamoe haana. Ti taha aho ne fakafano e Tavita falu he tau tagata haana ke ole lagomatai ki a Napalu. Ne hohoko e tau tagata ha Tavita ki a Napalu he magaaho ne hifi mamoe ai a ia mo e tau tagata lagomatai haana. Ko e aho kai galue, ti loga e mena mitaki ha Napalu ke kai. Ti pehē e tala he tau tagata ha Tavita: ‘Kua totonu a mautolu ki a koe. Ne nakai kaiha e mautolu taha he tau mamoe haau, ka kua lagomatai ke leveki ai. Ti fakamolemole, mai taha mena ke kai a mautolu.’

‘To nakai atu e au haaku a tau mena kai ke he tau tagata tuga a mutolu,’ he ui e Napalu. Ne vagahau vale lahi a ia, ti kelea e tau mena ne talahau hagaao ki a Tavita. Ko e magaaho ne liliu e tau tagata mo e tala age ki a Tavita e mena ia, ne ita lahi ai a Tavita. ‘Kia pipi e tau pelu ha mutolu!’ he tala age e ia ke he tau tagata haana. Ti kamata a lautolu ke o atu he fenoga ke kelipopo a Napalu mo e tau tagata haana.

Taha he tau tagata ha Napalu ne logona e tau kupu vale ne talahau e Napalu, ti tala age ki a Apikaila e mena ne tupu. He mogoia ni ne tauteute e Apikaila falu mena kai. Ne tuku e ia i luga he tau asini ti kamata haana fenoga. Magaaho ne feleveia a ia mo Tavita, ne hifo mai a ia he asini haana, tukutuku hifo ti pehē: ‘Fakamolemole ma iki na e, ua fanogonogo ke he taane haaku ko Napalu. Ko ia ko e tagata mahani goagoa, ti taute mena goagoa a ia. Hanei e mena fakaalofa. Fakamolemole kia uta ai, ti fakamagalo mai a mautolu ha ko e mena ne tupu.’

‘Ko e fifine pulotu a koe,’ he tali e Tavita. ‘Kua taofi e koe au neke fina atu ke kelipopo a Napalu ke taui aki e mahani vale haana. Kia fano a koe mo e monuina ke he kaina haau.’ Ko e magaaho fakamui ne mate ai a Napalu, ti eke a Apikaila mo taha he tau hoana ha Tavita.