Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 68

Tokoua e Tama Taane ne Liu Momoui

Tokoua e Tama Taane ne Liu Momoui

KAEKE kua mate a koe, to fēfē la e logonaaga he matua fifine haau ka liu moui mai a koe? To fiafia lahi mahaki a ia! Ka e maeke kia e tagata mate ke liu moui mai? Kua tupu pihia nakai fakamua?

Onoono la ke he tagata taane ē, mo e fifine mo e tama taane tote. Ko e tagata taane ko e perofeta ko Elia. Ko e fifine ko e takape he maaga ko Sarefata, ti ko e tama taane ko e tama haana. Ne hoko ke he taha aho ti gagao e tama taane. Ne kelea lahi mahaki ti fakahiku ne mate a ia. Ti tala age a Elia ke he fifine: ‘Tamai e tama ki a au.’

Ne ta hake e Elia e tama kua mate ke he poko i luga ti fakatakoto a ia he mohega. Ti liogi a ia: ‘Iehova na e, kia liu fakamoui e tama.’ Ati kamata e tama ke fafagu! He mogoia ne liuaki atu e Elia e tama ke he poko i lalo ti pehē ke he fifine: ‘Kikite mai la, kua moui haau a tama.’ Ko e kakano haia ne fiafia lahi ai e matua fifine.

Taha perofeta aoga lahi ha Iehova ne higoa ko Elisaio. Ko ia ko e tagata lagomatai ha Elia. Ka e mole ti fakaaoga foki e Iehova a Elisaio ke taute e tau mana. Taha aho ne fano a Elisaio ke he maaga ko Sunema ne nofo ai e fifine ne totonu lahi ki a ia. Fai magaaho ti taha e tama mukemuke taane he fifine nei.

He taha pogipogi, kua lahi tuai e tama, ti fano a ia ke he matua taane haana ne gahua he fonua. Amanaki ne tama ti tagi: ‘Mamahi e ulu haaku!’ He mole e uta a ia ki kaina, ne mate e tama. Ko e momoko lahi ha ia he matua fifine haana! He mogoia ni ne fano a ia mo e tamai a Elisaio.

Magaaho ne hoko mai a Elisaio, ne fina atu a ia ke he poko he tama ne mate. Ne liogi a ia ki a Iehova, ti fakafohifo i luga he tino. Nakai leva ti mafana e tino he tama, ti tihe lagafitu a ia. Ko e fiafia ha ia he matua fifine he mogo ne hau a ia ti kitia kua moui tuai e tama haana!

Tokologa mo e tokologa e tagata kua mamate. Kua momoko lahi e tau magafaoa mo e tau kapitiga ha lautolu ha ko e mena nei. Nakai ha ha ia tautolu e malolō ke fakaliu tu mai a lautolu kua mamate. Ka e maeke ia Iehova. To iloa e tautolu he magaaho fakamui e puhala ka maeke ia ia ke liu fakamomoui e tau miliona tagata.