Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 73

Patuiki Mitaki Fakahiku ha Isaraela

Patuiki Mitaki Fakahiku ha Isaraela

KO IOSIA ne valu ni e tau haana he moui he magaaho ne eke a ia mo patuiki he magafaoa tokoua he faahi toga ha Isaraela. Ne tote lahi a ia ke eke mo patuiki. Ti he magaaho fakamua ne lagomatai he falu tagata momotua a ia ke pule ke he motu.

Magaaho ne fitu e tau he patuiki ai a Iosia ne kamata a ia ke kumi a Iehova. Ne muitua a ia ke he tau fakafifitakiaga he tau patuiki mitaki tuga a Tavita, Iehosafata mo Hesekia. He fuata mui agaia a ia ne taute e Iosia e taha mena loto malolō.

Kua leva tuai e mahani kelea he laulahi he tau Isaraela. Ne tapuaki a lautolu ke he tau atua fakavai. Ne hufeilo a lautolu ke he tau tupua tā. Ati o atu ai a Iosia mo e tau tagata haana mo e kamata ke utakehe e tapuaki fakavai mai he motu. Ko e gahua lahi anei ha kua tokologa lahi e tagata ne tapuaki ke he tau atua fakavai. Maeke ia koe ke kitia he mena nei a Iosia mo e tau tagata haana hane moumou e tau tupua tā.

Fakamui, ne tuku e Iosia tokotolu e tagata taane ke leveki e fakafoouaga he faituga ha Iehova. Ne oko mai e tau tupe he tau tagata mo e age ai ke he tau tagata taane nei ke totogi aki e gahua kua taute. He gahua a lautolu he faituga, ne moua he ekepoa ne mua ko Hilikia e taha mena ne mua atu e aoga i ai. Ko e tohi he fakatufono ne poaki e Iehova a Mose ke tohi hifo he vahā kua leva lahi i tuai. Ne loga e tau tau kua galo ai.

Ne ta atu ai e tohi ki a Iosia, ti ole a ia ke totou age ki a ia. He fanogonogo a Iosia, ne mailoga e ia kua nakai omaoma e tau tagata ke he fakatufono ha Iehova. Ne momoko lahi a ia ha ko e mena nei, ti hēhē e ia e tau tapulu haana, tuga ne kitia e koe he mena nei. Pehē a ia: ‘Kua ita a Iehova ki a tautolu, ha kua nakai omaoma e tau mamatua ha tautolu ke he tau fakatufono ne tohia i loto he tohi nei.’

Ne poaki a Iosia ke he ekepoa ne mua ko Hilikia ke kumi atu ko e heigoa ha Iehova ka taute ki a lautolu. Ne fina atu a Hilikia ki a Hulata ko e perofeta fifine, mo e hūhū ki a ia. Ne age he fifine ia e fekau nei mai ia Iehova ke ta atu ki a Iosia: ‘To fakahala a Ierusalema mo e tau tagata oti ha kua tapuaki a lautolu ke he tau atua fakavai ti kua puke e motu he mahani kelea. Ka e ha kua taute e koe ma Iosia e mena mitaki, ko e fakahala nei to hoko mai ka mole e mate haau.’