Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 49

Tu Mau e Laā

Tu Mau e Laā

ONOONO la ki a Iosua. Kua pehē a ia: ‘Ko e laā na e, kia tu mau!’ Ti tu mau ni e laā. Ne tu ai he lotouho he lagi ke he aho katoa. Ko Iehova ne taute pihia! Ka e o mai la ke kitia e kakano ne manako a Iosua ke kikila tumau e laā.

Ko e magaaho ne kamata e tau patuiki tokolima kelea he motu a Kanana ke tau atu ke he tau Kipeona, ne fakafano atu he tau Kipeona e tagata ke ole lagomatai ki a Iosua. ‘Kia alumaki mai ki a mautolu!’ he ui e ia. ‘Kia laveaki a mautolu! Kua o mai e tau patuiki oti ne nonofo he atu mouga ke tau ke he tau fekafekau haau.’

He mogoia ni, ne o ai a Iosua mo e tau tagata tau oti haana. Ne o atu a lautolu he po katoa. Ko e magaaho ne hohoko a lautolu ki Kipeona, kua matakutaku e tau kautau he tau patuiki tokolima ti kamata ke fehola. Ti fakatupu e Iehova e uha tuli lahi mahaki ke to mai he lagi, ti tokologa atu e tau kautau ne mamate ha ko e uha tuli, ki a lautolu ne mamate he keli he tau tagata tau ha Iosua.

Ti kitia e Iosua kua teitei to tuai e laā. Ko e pouli hane fai, ti tokologa e kautau he tau patuiki kelea tokolima ka fehola. Ko e kakano haia ne liogi a Iosua ki a Iehova mo e pehē: ‘Ko e laā na e, kia tu mau!’ Ti ko e magaaho ne tu mau ai e laā ke kikila, ne maeke e tau Isaraela ke fakaoti e tau mo e kautū ai.

Kua tokologa atu foki e tau patuiki kelea i Kanana ne vihiatia e tau tagata he Atua. Ne kavi ke he ono e tau he tau atu a Iosua mo e haana kautau ato mahala ai e tau patuiki toko 31 he motu. He oti e mena ia, ne mailoga e Iosua ke vehevehe e motu ko Kanana ke he tau magafaoa ne manako kelekele agaia.

Loga e tau he mole, ti fakahiku ni mate a Iosua he 110 e tau tau he moui. He moui a ia mo e tau kapitiga haana, ne fakatumau e tau tagata ke omaoma ki a Iehova. Ka ko e magaaho ne mamate ai e tau tagata mitaki nei, ne kamata e tau tagata ke taute e tau mena kelea mo e matematekelea ai. Ko e magaaho hanei ne kua lata mooli a lautolu ke moua e lagomatai he Atua.