Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 39

Fiti e Tokotoko ha Arona

Fiti e Tokotoko ha Arona

KITIALA e tau fiti mo e tau fua sikati motua kua tuputupu mai he tokotoko nei. Ko e tokotoko ha Arona a ē. Ne tuputupu mai e tau fiti mo e tau fua lakau motua nei he tokotoko ha Arona he taha ni e pō! O mai la ke kumikumi e kakano.

Kua fai magaaho tuai he o fano e tau Isaraela he tutakale he magaaho nei. Falu tagata ne manamanatu kua nakai lata a Mose ke eke mo takitaki, mo e nakai lata foki a Arona ke eke mo ekepoa ne mua. Ko Koru taha ne manamanatu pihia, mo Tatano mo Apiramo mo e 250 e takitaki he tau tagata. Ne o atu a lautolu oti ia ki a Mose mo e pehē: ‘Ko e ha ne fia pule a koe ki luga ia mautolu oti?’

Ne tala age a Mose ki a Koru mo lautolu ne mumui ki a ia: ‘Ke he magaaho pogipogi kia ta mai e tau mena uta afi ti tuku i ai e tau mena manogi. Ti o mai ke he faituga ha Iehova. To kitia e tautolu ko hai ka fifili e Iehova.’

He aho hake ne o mai a Koru mo lautolu toko 250 ne mumui ki a ia ke he faituga. Tokologa foki ne o mai ke lalago e tau tagata nei. Ne ita lahi a Iehova. ‘Kia o kehe mai he tau fale ie he tau tagata kelea nei,’ he ui e Mose. ‘Aua neke pipiki atu a mutolu ke he taha mena ha lautolu.’ Ne fanogonogo e tau tagata, ti o kehe mai he tau fale ie ha Koru, Tatano mo Apiramo.

Ti pehē a Mose: ‘Ko e mena hanai kia iloa ai e mutolu ko hai kua fifili e Iehova. To fakamaga e kelekele ti folo ai e tau tagata kelea nei.’

He magaaho ni ne oti e vagahau ha Mose, ne mahafagi e kelekele. Ko e fale ie mo e tau koloa ha Koru mo e ha Tatano mo e ha Apiramo mo lautolu oti ne ha ha mo lautolu, ne o hifo ai ke he kelekele mo e tanumia ai a lautolu. Magaaho ne logona he tau tagata e tau tagi ha lautolu ne folo he kelekele, ne hea fakatutū a lautolu: ‘Fehola! Neke folo foki he kelekele a tautolu!’

Ko Koru mo e 250 e tagata ne mumui atu ki a ia kua tata agaia ke he faituga. Ti fakafano atu e Iehova e afi, ti fakaotioti ai a lautolu katoatoa. Ti tala age a Iehova ke he tama taane ha Arona ko Eleasaro ke uta e tau mena uta afi he tau tagata ne mamate ti taute aki e tau mena lapalapa mo ufiufi aki e fatapoa. Ko e ufiufi nei he fatapoa kua eke ai mo hatakiaga ke he tau Isaraela, kua nakai fai foki ka ko Arona ni hokoia mo e tau tama taane haana kua lata ke eke mo tau ekepoa ma Iehova.

Ka kua manako a Iehova ke maaliali ni ko Arona mo e tau tama taane haana ne kua fifili e ia mo tau ekepoa. Ti tala age a ia ki a Mose: ‘Kia ta mai he tau iki oti he tau magafaoa ha Isaraela e tau tokotoko ha lautolu. Ma e magafaoa ha Levi, ko Arona ka tamai e tokotoko haana. Ti tuku oti e tau tokotoko nei i loto he faituga i mua he puha he maveheaga. Ko e tokotoko he tagata ka fifili ke eke mo ekepoa to matala mai ai e tau fiti.’

Ne fakakia e Mose he pogipogi hake, ko e ha, kua tuputupu mai i ai e tau fiti nei mo e tau sikati motua! Kua kitia nakai e koe mogonei ko e ha ati fakatupu e Iehova e tokotoko ha Arona ke matala mai e tau fiti?