Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 35

Foaki e Iehova Haana Tau Fakatufono

Foaki e Iehova Haana Tau Fakatufono

KAVI ke he ua e mahina he toka he tau Isaraela a Aikupito, ti hohoko a lautolu ke he Mouga ko Sinai, ne fakahigoa foki ko Horepa. Ko e matakavi nei foki ne vagahau a Iehova ki a Mose mai he afi puhopuho i loto he akau. Fai magaaho ne heapi mo e nonofo ai e tau tagata he matakavi ia.

He fakatali e tau tagata i lalo, ne hake a Mose ke he mouga. I luga he mouga, ne tala age a Iehova ki a Mose kua manako a Ia ke he tau Isaraela ke omaoma ki a Ia mo e eke mo tau tagata pauaki Haana. Magaaho ne hifo mai a Mose, ne tala age e ia ke he tau Isaraela e tau mena ne talahau e Iehova. Ti pehē e tau tagata to omaoma a lautolu ki a Iehova, ha kua manako a lautolu ke eke mo tau tagata haana.

Ne taute e Iehova e taha mena kehe lahi mogonei. Ne taute e ia e tapunu he mouga ke ahua, ti fakatupu e pakūlagi lahi mahaki. Ne vagahau foki a ia ke he tau tagata: ‘Ko au ko Iehova ko e Atua ha mutolu ne tamai a mutolu i Aikupito.’ Ti poaki e ia: ‘Nakai lata ia mutolu ke tapuaki ke he ha atua kehe ka ko au ni.’

Ne age he Atua ke he tau Isaraela hiva foki e poakiaga. Ne matakutaku lahi e tau tagata. Ti tala age a lautolu ki a Mose: ‘Vagahau mai e koe ki a mautolu, ha kua matakutaku a mautolu ka vagahau mai e Atua ki a mautolu neke mamate a mautolu.’

Fakamui, ne tala age a Iehova ki a Mose: ‘Kia hake mai ki a au ke he mouga. To ta atu e au ki a koe ua e lapa maka kua tohi ai e au e tau fakatufono ne manako au ke omaoma e tau tagata ki ai.’ Ti liu hake a Mose ke he mouga. Ne nofo a ia i ai ke he 40 e aho mo e pō.

Kua loga mo loga e tau fakatufono he Atua ma e tau tagata haana. Ti tohi hifo e Mose e tau fakatufono nei. Ne age foki he Atua ki a Mose ua e lapa maka. I ai, ne tohi ni he Atua e tau fakatufono 10 ne tala age e ia ke he tau tagata oti. Ne fakahigoa ai ko e Tau Fakatufono Hogofulu.

Ko e Tau Fakatufono Hogofulu ko e tau fakatufono aoga lahi. Ti pihia foki e loga he tau fakatufono ne age he Atua ke he tau Isaraela. Taha he tau fakatufono nei ko e: ‘Kia fakaalofa atu a koe ki a Iehova haau a Atua mo e haau a loto katoa, haau a manamanatuaga katoa, haau a tino katoa mo e haau a malolō katoa.’ Mo e taha foki: ‘Kia fakaalofa atu a koe ke he katofia haau tuga na koe ki a koe ni.’ Ko e Tama he Atua ko Iesu Keriso ne talahau ko e tau fakatufono ua nei kua mua ue atu ne age e Iehova ke he tau tagata Isaraela haana. Fakamui, to fakaako a tautolu ke he tau mena loga hagaao ke he Tama he Atua mo e tau fakaakoaga haana.