Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 54

Ko e Tagata ne Mua e Malolō

Ko e Tagata ne Mua e Malolō

ILOA nakai e koe e higoa he tagata ne mua e malolō ne moui? Ko ia ko e fakafili ne higoa ko Samisoni. Ko Iehova ne foaki age ki a Samisoni e malolō haana. Ka e to fanau a Samisoni, ne tala age a Iehova ke he haana matua fifine: ‘To ai leva ti fanau e koe e tama taane. To takitaki e ia e fakahaoaga ha Isaraela mai he tau Filisitia.’

Ko e tau Filisitia ko e tau tagata kelea ne nonofo i Kanana. Tokologa lahi e tau tagata tau ha lautolu, ti fakamatematekelea lahi e lautolu e tau Isaraela. He taha magaaho, ko Samisoni hane fano ke he matakavi ne nonofo ai e tau Filisitia, ne tagi e leona lahi he hau ki a ia. Ka e kelipopo e Samisoni e leona ke he tau lima ni haana. Ti kelipopo foki e ia totou teau e tau tagata kelea ha Filisitia.

He magaaho fakamui ne manako loto a Samisoni ke he fifine ne higoa ko Talila. Ne mavehe e tau takitaki Filisitia ke igatia a lautolu mo e foaki age 1,100 ario ki a Talila kaeke ke tala age e ia ki a lautolu e kakano ne malolō lahi a Samisoni. Manako a Talila ke he tau tupe oti ia. Nakai ko e kapitiga mooli a ia ki a Samisoni, po ke ke he tau tagata he Atua. Ti hūhū tumau a ia ki a Samisoni ke he kakano ne malolō lahi a ia.

Fakahiku ai, ne tala age e Samisoni ki a Talila e mena galo he malolō haana. ‘Nakai la hifi ia haaku ulu tali mai,’ he talahau e ia. ‘Mai he magaaho ne fanau ai au, ne fifili he Atua au ke eke mo taha fekafekau pauaki haana ne fakahigoa ko e Naseri. Kaeke ke hifi e ulu haaku to galo e malolō haaku.’

Ko e magaaho ne iloa e Talila e mena nei, ne fakamohe e ia a Samisoni he haana hui. Ti hea e ia e tagata ke hau ki loto mo e hifi haana ulu. Magaaho ne ala ai a Samisoni, kua galo tuai haana malolō. Ne o mai mogoia e tau Filisitia mo e tapaki a ia. Ne kape kehe e lautolu haana tau mata, ti eke a ia mo tupa ha lautolu.

He taha aho ne taute he tau Filisitia e taha fiafia lahi ke tapuaki ke he ha lautolu a atua ko Takono, ti tamai e lautolu a Samisoni ki fafo he fale puipui ke fakafiufiu atu ki a ia. Ka ko e mogonei kua liu e ulu ha Samisoni tupu. Ne tala age a Samisoni ke he tama taane ne takitaki a ia he lima: ‘Toka au ke aamo atu ke he tau pou ne mau ai e fale.’ Ti liogi a Samisoni ki a Iehova ma e malolō, mo e tōtō atu ke he tau pou. Ne tagi atu a ia: ‘Toka au ke mate mo e tau Filisitia.’ Ko e 3,000 he tau Filisitia ne fakalataha ke he fiafia, he magaaho ne totoko a Samisoni ke he tau pou, ne malolo hifo e fale ti mamate oti e tau tagata kelea nei.