Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 51

Ruta mo Naumi

Ruta mo Naumi

I LOTO he Tohi Tapu to moua e koe e tohi ne fakahigoa ko Ruta. Ko e tala hagaao ke he magafaoa ne nonofo he magahala ne fai fakafili i Isaraela. Ko Ruta ko e fifine fuata mai he motu ko Moapi; nakai ko ia taha he motu he Atua ko Isaraela. Ka ko e magaaho ne iloa e Ruta e Atua mooli ko Iehova, ne lahi haana fakaalofa ki a ia. Ko Naumi ko e fifine motua ne lagomatai a Ruta ke iloa a Iehova.

Ko Naumi ko e fifine Isaraela. Ko ia mo e haana taane mo e tokoua e tama taane ne hiki atu ke he motu ko Moapi he magaaho ne tote ai e kai i Isaraela. Ka e hoko ke he taha aho ti mate e taane ha Naumi. He mogo fakamui ne faihoana e tau tama taane ha Naumi ke he ua e fifine Moapi ne higoa ko Ruta mo Orepa. Ka e kavi ke he 10 e tau he mole, ne mamate e tau tama taane tokoua ha Naumi. Ko e momoko ha ia ha Naumi mo e tau tama fifine tokoua! Ko e heigoa ha Naumi ka taute mogonei?

Hoko ke he taha aho ti fifili a Naumi ke liu he fenoga loa ki kaina ke he tau tagata haana. Ne manako a Ruta mo Orepa ke nonofo mo ia, ti o foki a laua. Ka e fai magaaho he fenoga atu a lautolu he puhalatū, ne fuluhi a Naumi ke he tau tama fifine mo e pehē: ‘Liliu atu ki kaina mo e nonofo mo e tau mamatua fifine ha mua.’

Ne figita e Naumi mo e mavehe ke he tau tama fifine. Ke he mena ia ne kamata a laua ke tagi ha kua fakaalofa lahi a laua ki a Naumi. Pehē a laua: ‘Nakai! To o a maua mo koe ke he tau tagata haau.’ Ka e tali a Naumi: ‘Kia liliu a mua ma haaku fanau fifine. To mitaki ma mua i kaina.’ Ti kamata a Orepa ke liu ki kaina. Ka e nakai fano a Ruta.

Ne fuluhi atu a Naumi ki a ia mo e pehē: ‘Kua liu tuai a Orepa. Liu foki a koe mo ia ki kaina.’ Ka e tali a Ruta: ‘Aua neke ole mai a koe ki a au ke toka a koe! Toka au ke fano mo koe. Ko e mena ke fano ai a koe to fano ai ni au, ko e mena ke nofo ai a koe to nofo ai au. To eke e motu haau mo motu haaku, to eke e Atua haau mo Atua haaku. Ko e mena ke mate ai a koe, to mate ai au, ti tanu ai au ke he mena ia.’ Magaaho ne talahau ai e Ruta e mena nei, ne ai liu foki a Naumi lali ke fekau a ia ke fano ki kaina.

Fakahiku, ti hohoko e tau fifine tokoua ki Isaraela. Ne nonofo hifo a laua he matakavi nei. Ti kamata agataha a Ruta ke gahua he tau fonua, ha ko e magahala helehele karite a ia. Ko e tagata taane ne higoa ko Poasa ne fakaatā a ia ke okooko karite he tau fonua haana. Iloa nakai e koe ko hai e matua fifine ha Poasa? Ko ia ko Raava mai he maaga ko Ieriko.

Hoko ke he taha aho ne tala age a Poasa ki a Ruta: ‘Ne logona e au e tau mena oti hagaao ki a koe, mo e totonu haau ki a Naumi. Iloa e au a koe ne toka e matua taane mo e matua fifine haau mo e motu haau ti hau ke nofo mo e tau tagata ne nakaila iloa ia e koe tali mai. Kia mitaki a Iehova ki a koe!’

Ne tali e Ruta: ‘Kua totonu lahi a koe ki a au ma iki na e. Kua fakamalolō e koe au ha ko e puhala mitaki kua tutala mai a koe ki a au.’ Ne fiafia lahi a Poasa ki a Ruta ti nakai leva ti mau ai a laua. Ko e fiafia ha ia ha Naumi ha ko e mena nei! Ka e mua atu e fiafia ha Naumi he magaaho ne fanau e Ruta mo Poasa e tama taane fakamua ha laua ne fakahigoa ko Opeta. Fakahiku ne eke a Opeta mo tupuna ha Tavita, to iloa atu foki e tautolu hagaao ki a ia he vala ka mui mai.

Tohi a Ruta he Tohi Tapu.