Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 45

O Atu ke he Taha Faahi he Vailele ko Ioritana

O Atu ke he Taha Faahi he Vailele ko Ioritana

KITIALA! kua o atu e tau Isaraela ke he taha faahi he Vailele ko Ioritana! Ka ko fe e vai? Ha kua lahi e uha ne to he magahala ia he tau, kua puke lahi e vailele he falu minuti gahoa kua mole. Ka ko e magaaho nei kua mamiti katoatoa e vai! Ti kua o atu e tau Isaraela ke he taha faahi he hala toka mōmō tuga ni ne taute e lautolu he Tahi Kula! Ka kua tafe ki fe e vai? O mai la ke kitekite ki ai.

He hoko mai e magaaho ke o atu e tau Isaraela ke he taha faahi he Vailele ko Ioritana, hanai e mena ne poaki e Iehova ki a Iosua ke tala age ke he tau tagata: ‘Kua lata e tau ekepoa ke uta e puha he maveheaga mo e mumua atu ia tautolu. Ka tutū e tau hui ha lautolu ke he vai he Vailele ko Ioritana, to tu ai e tafe he vai.’

Ti uta ai he tau ekepoa e puha he maveheaga, mo e ta atu ki mua he tau tagata. Magaaho ne hohoko a lautolu ki Ioritana, ne o atu taha e tau ekepoa ke he vai. Kua malolō lahi e tafe mo e hokulo. Ka ko e magaaho ni ne tutū ai e tau hui ha lautolu ke he vai, ne tu agataha e tafe he vai! Ko e mana anei! Ne taofi e Iehova e vailele he faahi i luga. Ti nakai leva kua nakai fai vai he vailele!

Ko e tau ekepoa ne uta e puha he maveheaga ne o atu taha ai ke he lotouho he vailele mōmō. Kitia nakai e koe a lautolu he fakatino? He tutū a lautolu i ai, ne o atu oti e tau Isaraela ke he taha faahi he Vailele ko Ioritana he hala toka mōmō!

Magaaho ne hohoko a lautolu oti ke he taha faahi, ne poaki a Iehova ki a Iosua ke tala age ke he toko 12 e tagata taane malolō: ‘Kia o atu a mutolu ke he mena ne tutū e tau ekepoa mo e puha he maveheaga. Uta 12 e maka, ti tuku ai ke he mena ka heapi ai a mutolu oti ke he pō a magaaho. Ka hoko ke he vahā i mua ti ka hūhū mai e tau fanau ha mutolu ko e heigoa e kakano he tau maka nei, lata ia mutolu ke tala age ki a lautolu na tu e vai he mogo ne ta atu ai e puha he maveheaga ke he taha faahi ha Ioritana. To fakamanatu he tau maka ki a mutolu e mana nei!’ Ne ati foki e Iosua 12 e maka he mena ne tutū ai e tau ekepoa i loto he vailele.

Fakahiku ai ne tala age a Iosua ke he tau ekepoa ne uta e puha he maveheaga: ‘Kia o hake mai i Ioritana.’ Ko e magaaho ia ni ne o hake mai ai a lautolu, ti liu e vai kamata ke tafe.