Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 34

Vahega Mena Kai Foou

Vahega Mena Kai Foou

MAEKE nakai a koe ke talahau ko e heigoa he tau tagata ne oko hake he kelekele? Na tuga e hahau tuli. Kua hina, ti aleale mo e valavala ikiiki. Ka e nakai ko e hahau tuli; ka ko e mena kai.

Liga ko e taha laia e mahina he toka he tau Isaraela a Aikupito. Ko lautolu haia he tutakale. Nakai loga e tau mena kai ne tutupu i ai, ti gugū e tau tagata he pehē: ‘Na lauka a Iehova he tamate a mautolu i Aikupito. I ai, moua oti e mautolu e tau mena kai kua manako a mautolu ki ai.’

Ti pehē a Iehova: ‘To fakato hifo e au e mena kai mai he lagi.’ Ti ko e mena nei ni ne taute e Iehova. He pogipogi hake ne kitia he tau Isaraela e mena hina nei kua mokulu hifo, ti fehūhūaki a lautolu: ‘Ko e heinoa e mena nei?’

Pehē a Mose: ‘Ko e mena kai hanai kua foaki mai e Iehova ma mutolu ke kai.’ Ne fakahigoa ai he tau tagata ko e MANAI. He magaaho ka kai ai kua tuga e areto lapalapa ne laku aki e meli.

‘Kia oko ai e mutolu ke he mena kua fahia e tagata ke kai,’ he tala age e Mose ke he tau tagata. Ti taute pihia e lautolu he tau pogipogi oti. He magaaho ka vela e laā, ko e manai ne toe hifo he fuga kelekele kua tataka tuai.

Ne pehē foki a Mose: ‘Aua neke toka e taha ha manai ke lata mo e aho a pogipogi.’ Ka e nakai fanogonogo e falu tagata. Iloa nakai e koe e mena ne tupu? He pogipogi hake ko e manai ne toka e lautolu kua ha ha i ai e tau uaga, ti kamata ke elo!

Ka kua taha e aho he faahi tapu ne tala age a Iehova ke he tau tagata ke oko fakalahi ua e manai. Ko e aho ke onoaki anei. Ti pehē a Iehova ke toka falu manai ke lata mo e pogipogi hake, ha kua nakai fakatō hifo e ia ha manai he aho ke fituaki. Magaaho ne toka e lautolu e manai ke lata mo e aho ke fituaki, ne nakai ha ha i ai ha uaga ti nakai elo foki! Ko e taha mana foki anei!

He tau tau oti ne ha ha i ai e tau Isaraela he tutakale, ne fagai aki e Iehova e manai a lautolu.