Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 52

Kiteona mo e 300 Tagata Haana

Kiteona mo e 300 Tagata Haana

KITIA nakai e koe ko e heigoa kua tupu he mena nei? Ko e tau tagata tau oti ha Isaraela anei. Ko e tau tagata ne kua fakatokotui ke inu. Ko e fakafili ko Kiteona e tagata ne tu fakatata ki a lautolu. Kua kitekite a ia ke he puhala ne inu e lautolu e vai.

Onoono fakatata la ke he tau puhala kehekehe ne inu ai e tau tagata. Ko e falu kua tukutuku hifo ni ke he vai. Ka e taha kua ahu hake e vai he lima haana, ke maeke ia ia ke kitia e tau mena kua tupu viko ia ia. Aoga e mena nei, ha kua tala age a Iehova ki a Kiteona ke fifili ni e tau tagata kua mataala he magaaho ka inu ai a lautolu. Ko e poaki he Atua ki a lautolu ne toe, kua lata ke fekau ke liliu ki kaina. O mai la ke kitia e kakano.

Kua liu foki lahi e lekua he tau Isaraela. Ko e kakano ha kua nakai omaoma a lautolu ki a Iehova. Kua malolō lahi e tau tagata Mitiana ki a lautolu ti fakamamahi ai a lautolu. Ti tagi lagomatai atu e tau Isaraela ki a Iehova, ti fanogonogo a Iehova ke he tau tagi ha lautolu.

Pehē age a Iehova ki a Kiteona ke fakatu taha kautau, ti fakapotopoto auloa e Kiteona e tau tagata tau toko 32,000. Ka ko e kautau ne 135,000 e tagata tau ka fakafehagai mo Isaraela. Ka e pehē agaia a Iehova ki a Kiteona: ‘Tokologa lahi e tau tagata haau.’ Ko e ha ne vagahau pihia ai a Iehova?

Ha ko e mena ka kautū a Isaraela he tau, neke liga manatu a lautolu ko e kautū ha ko lautolu ni. Neke liga manatu a lautolu kua nakai lata e lagomatai ha Iehova ke kautū ai. Ti pehē a Iehova ki a Kiteona: ‘Tala age ke he tau tagata oti kua matakutaku ke liliu ki kaina.’ Ko e magaaho ne taute pihia e Kiteona, ne 22,000 he tau tagata tau haana ne liliu ki kaina. Ne toe hifo ni mo ia 10,000 tagata ke tau atu ke he kautau ia ne 135,000.

Ka e fanogonogo la! Pehē a Iehova: ‘Loga lahi agaia e tagata haau.’ Ati tala age a ia ki a Kiteona ke fekau e tau tagata ke inu he vai nei, ti fekau a lautolu oti ne tukutuku hifo ke inu he vai ke liliu ki kaina. ‘To tuku atu e au e kautū ki a koe mo e toko 300 e tagata ne inu ka e mataala,’ he mavehe age e Iehova.

Kua hoko mai tuai e magaaho ke tau. Ti tuku e Kiteona e tau tagata toko 300 haana ke he tolu e matakau. Ne age e ia ke he tau tagata takitaha e pu, mo e gati vai mo e hulu i loto. Kavi ke he tuloto pō, ne fakapotopoto viko a lautolu oti ke he heagaapi he tau kautau he fī. Ti taha ni e magaaho ne uulo e lautolu e tau pu mo e fela e tau gati vai ha lautolu mo e kalaga: ‘Ko e pelu a Iehova mo Kiteona!’ Ko e magaaho ne aala e tau kautau he fī, ne fakagogoa mo e matakutaku a lautolu. Ti kamata a lautolu oti ke fehola, ti kautū e tau Isaraela he tau.