Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 43

Eke a Iosua mo Takitaki

Eke a Iosua mo Takitaki

KUA manako a Mose ke fina atu mo e tau Isaraela ki Kanana. Ti ole a ia: ‘Kia toka au ke fina atu ke he taha faahi he Vailele ko Ioritana ma Iehova, mo e kitia e motu mitaki.’ Ka e pehē a Iehova: ‘Toka ai! Neke liu fai kupu ke he mena nei!’ Iloa nakai e koe ko e ha ne talahau e Iehova e mena ia?

Kakano ni ha ko e mena ne tupu he magaaho ne tā ai e Mose e maka. Manatu, ko ia mo Arona ne nakai fakalilifu a Iehova. Ne nakai tala age a laua ke he tau tagata ko Iehova ne fakatafe mai e vai he maka. Ko e kakano nei ati pehē ai a Iehova to nakai fakaatā e ia a laua ke o atu ki Kanana.

He mole e falu mahina gahoa he mate a Arona, ne tala age a Iehova ki a Mose: ‘Uta a Iosua, ti fakatu ki mua ha Eleasaro ko e ekepoa mo e tau tagata. Ti i mua ha lautolu oti, tala age ke he tau tagata oti ko Iosua e takitaki foou ha lautolu.’ Ne taute ni e Mose e mena ne talahau e Iehova, tuga ne kitia e koe i loto he fakatino.

Ti tala age a Iehova ki a Iosua: ‘Kia fakamalolō, mo e kia nakai matakutaku. Ko koe ka takitaki e tau Isaraela ke he motu ko Kanana ne mavehe age e au ki a lautolu, mo e to fakalataha au mo koe.’

He magaaho fakamui ne tala age a Iehova ki a Mose ke hake ke he tapunu he Mouga ko Nepo he motu ko Moapi. Mai i luga ia ne maeke a Mose ke kitekite atu ke he taha faahi he Vailele ko Ioritana mo e kitia e motu fulufuluola ko Kanana. Pehē a Iehova: ‘Ko e motu hanei ne mavehe e au ke foaki ke he tau fanau ha Aperahamo, Isaako mo Iakopo. Kua fakaatā e au a koe ke kitia ai, ka e to nakai fakaatā e au a koe ke hoko atu ki ai.’

I luga ia he Mouga ko Nepo ne mate ai a Mose. Ne 120 e tau tau haana he moui. Malolō agaia e tino haana ti nakai pouli e tau mata haana. Ne lahi e momoko he tau tagata ti tagi a lautolu ha kua mate a Mose. Ka kua fiafia a lautolu ha kua eke tuai a Iosua mo takitaki foou ha lautolu.