Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 38

Ko e Tau Toko ne 12

Ko e Tau Toko ne 12

ONOONO ke he tau fua lakau nei ne hahamo he tau tagata taane. Kitiala e lalahi he tau fuhi vine. Na lata ke tokoua e tagata taane ke tauloto ai he akau. Ti onoono foki la ke he tau fua mati mo e tau rimoni. Tamai i fe e tau fua lakau fulufuluola nei? Tamai he motu ko Kanana. Manatu, ko Kanana ko e matakavi ne nonofo ai a Aperahamo, Isaako mo Iakopo he taha vahā. Ha kua to e hoge i ai, ne hiki atu a Iakopo mo e magafaoa haana ki Aikupito. He mogonei, kavi ke he 216 e tau he mole, kua takitaki e Mose e tau Isaraela he liliu ki Kanana. Kua hohoko mai tuai a lautolu ke he matakavi he tutakale ne fakahigoa ko Katesa.

Ko e tau tagata kelea ne nonofo he motu ko Kanana. Ti kua fakafano atu e Mose toko 12 e tagata toko mo e tala age ki a lautolu: ‘Kitekite la ko e toko fiha e tagata ne nonofo i ai, mo e malolō fēfē a lautolu. Kitekite la ko e talumelie nakai e kelekele mo to mena kai. Ti manatu ke tamai falu fua lakau.’

Magaaho ne liliu mai e tau tagata toko ki Katesa, ne tala age a lautolu ki a Mose: ‘Ko e motu mitaki lahi mooli ni.’ Ke fakamooli aki, ne fakakite age e lautolu ki a Mose e falu fua lakau. Ka kua toko 10 e tagata toko ne pehē: ‘Ko e tau tagata ne nonofo i ai kua lalahi mo e malolō. To mamate a tautolu ka lali ke eke e motu ia ma tautolu.’

Kua matakutaku e tau Isaraela he magaaho ne logona e lautolu e mena nei. ‘Na lauka na mautolu he mamate i Aikupito po ke he tutakale nei,’ he talahau e lautolu. ‘To mamate a mautolu he latau, mo e to fakapaea e tau hoana mo e tau fanau ha mautolu. O mai a tautolu ke fifili e takitaki foou ke hukui a Mose, ti liliu ki Aikupito!’

Ka e tokoua e tagata toko ne falanaki ki a Iehova mo e lali ke fakatotoka e tau tagata. Ko e tau higoa ha laua ko Iosua mo Kalepa. Pehē a laua: ‘Ua matakutaku. Kua fakalataha a Iehova mo tautolu. To mukamuka ke moua ai e motu.’ Ka e nakai fanogonogo e tau tagata. Ne manako foki a lautolu ke tamate a Iosua mo Kalepa.

Ne ita lahi a Iehova ha ko e mena nei, ti tala age a ia ki a Mose: ‘Nakai fai tagata ne 20 e tau moui mo e fakamua atu ka hu atu ke he motu ko Kanana. Kua kitia e lautolu e tau mana ne taute e au i Aikupito mo e he tutakale, ka e nakaila falanaki a lautolu ki a au. To ō fano ai a lautolu he tutakale ke he 40 e tau ato mate e tagata fakahiku. Ko Iosua ni mo Kalepa ka huhū atu ke he motu ko Kanana.’