Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 37

Ko e Faituga, Fale Utafano mo Tapuaki

Ko e Faituga, Fale Utafano mo Tapuaki

ILOA nakai e koe ko e heigoa e fale ē? Ko e fale utafano pauaki mo tapuaki ki a Iehova. Kua fakahigoa foki ko e faituga. Ne mau ai he tālaga he tau tagata he taha e tau he mole e toka e lautolu a Aikupito. Iloa nakai e koe ko hai ne fakatū e manatu ia ke talaga ai?

Ko e manatu ni ha Iehova. He magaaho ne ha ha i ai a Mose he Mouga ko Sinai, ne tala age e Iehova ki a ia e puhala ke talaga aki. Pehē a ia ke talaga ke he puhala ke mukamuka ka vete. He taute pihia to maeke e tau vala kehekehe ke uta fano ke he tau matakavi, ti liu mogoia ke fakatutū i ai. Ti ko e magaaho ne ō e tau Isaraela mai he taha matakavi ke he taha matakavi he tutakale, ne uta e lautolu e fale utafano mo lautolu.

Ka ono a koe ki loto he poko tote he matahiku he fale utafano, to kitia e koe e puha. Ne fakahigoa ai ko e puha he maveheaga. Ti ua e agelu po ke tau kerupi ne taute mai he auro, ne tu taha he taha faahi ti tu taha he taha faahi. Ne liu foki e Atua tohi e Tau Fakatufono Hogofulu he tau lapa maka ne ua, ha kua lipilipi e Mose e tau lapa fakamua. Ti kua tuku e tau lapa maka nei i loto he puha he maveheaga. Ne tuku foki i loto ia e lupo manai. Manatu nakai e koe ko e heigoa e manai?

Ko e matakainaga ha Mose ko Arona e tagata ne fifili e Iehova ke eke mo ekepoa ne mua. Ne takitaki e ia e tau tagata he tapuaki ki a Iehova. Ti ko e tau ekepoa foki e tau tama taane haana.

Onoono la mogonei ke he poko lahi he fale utafano. Kua lahi atu mai he poko tote. Kitia nakai e koe e puha ne fai ahua ne hake mai i ai? Ko e fatapoa anei ne huhunu ai he tau ekepoa e tau mena manogi. Ti ha ha i ai e fakatuaga lamepa ne fitu e lamepa. Ti ko e mena ke toluaki he poko ko e laulau. I luga ne toka ai 12 e areto pukupuku.

He lotopa he fale utafano kua ha ha i ai e apa, po ke pa lahi, ne puke he vai. Fakaaoga ai he tau ekepoa mo koukou. Ne ha ha i ai foki e fatapoa lahi. Ko e mena nei ne huhunu ai e tau manu kua tamate mo poa ki a Iehova. Kua fakatu e fale utafano he lotouho he heagaapi, ti nonofo viko ai e tau Isaraela he tau fale ie ha lautolu.