Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 19

Lahi e Magafaoa ha Iakopo

Lahi e Magafaoa ha Iakopo

ONOONO la ke he magafaoa lahi nei. Ko e tau tama taane toko 12 ha Iakopo anei. Ti fai tama fifine foki a ia. Iloa nakai e koe ha higoa he tau fanau nei? O mai la tautolu ke fakaako ke he falu ia lautolu.

Ne fanau e Lea a Reupena, Simeona, Levi, mo Iuta. Magaaho ne kitia e Rahela kua nakai fanau e ia ha tama, ti momoko lahi a ia. Ti age e ia haana fekafekau fifine ko Pila ki a Iakopo, ti ua e tama taane ha Pila ne higoa ko Tano mo Nafatali. Ti age foki e Lea e fekafekau fifine haana ko Silepa ki a Iakopo, ti fanau e Silepa a Kato mo Asera. Ne liu a Lea ua foki e tama taane, ko Isakara mo Sepulona.

Fakahiku ai kua maeke a Rahela ke fai tama. Ne ui e ia haana higoa ko Iosefa. To fakaako atu foki a tautolu hagaao ki a Iosefa, ha kua eke a ia mo tagata aoga lahi mahaki. Ko e tau tama taane toko 11 anei ne fanau ki a Iakopo he nofo a ia mo e matua taane ha Rahela ko Lapana.

Fai tama fifine foki a Iakopo, ka e taha ni ia lautolu ne talahau he Tohi Tapu. Ko e higoa haana ko Tina.

Ne hoko mai e magaaho ti fifili e Iakopo ke toka a Lapana ka e liu atu ki Kanana. Ti fakapotopoto e ia e magafaoa lahi haana mo e tau fuifui mamoe loga mo e tau fuifui povi haana, ti kamata ke o atu he fenoga loa.

Fai magaaho he hohoko a Iakopo mo e magafaoa haana ki Kanana, ne fanau foki e Rahela e tama taane. Ne fanau ai he o atu a lautolu he fenoga. Ne uka lahi ki a Rahela ti fakahiku ne mate a ia he fanau. Ka e malolō e tama mukemuke taane. Ne fakahigoa e Iakopo a ia ko Peniamina.

Manako a tautolu ke manatu e tau higoa he tau tama taane toko 12 ha Iakopo ha ko e motu katoa ha Isaraela ne tupu mai ia lautolu. Ko e tau magafaoa toko 12 ha Isaraela ne fakahigoa aki e tau tama taane toko 10 ha Iakopo mo e ua e tama taane ha Iosefa. Ne moui a Isaako ke he loga e tau tau he mole e fanau mai e tau tama taane nei, ti liga kua fiafia mooli a ia he loga e mokopuna taane. Ka e o mai la ke kitia ko e heigoa ne tupu ke he mokopuna fifine haana ko Tina.