Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 32

Tau Malaia ne 10

Tau Malaia ne 10

ONOONO la ke he tau fakatino. Kua takitaha mo e fakakite e malaia ne fakahoko e Iehova ki Aikupito. He fakatino fakamua kua kitia e koe a Arona ne tā e Vailele Naila aki haana tokotoko. Magaaho ne tā ai e ia, ne faliu toto e vai he vailele. Ne mamate e tau ika, ti kamata e vailele ke elo.

Taha foki, ne taute e Iehova e tau rane ke o hake mai he Vailele Naila. Kua ha ha i ai he tau mena oti—i loto he tau gutuumu, i loto he tau pa tao kai, i loto he tau mohega he tau tagata—he tau mena oti. He magaaho ne mamate ai e tau rane, ne fakaputuputu he tau Aikupito ke he tau tātumu lalahi, ti elo ai e motu ha ko e tau mena ia.

Ti tā e Arona e kelekele aki haana tokotoko, ti faliu kutu ai e efuefu. Ko e tau moko ikiiki nei ne felele na maeke ke gagau. Ko e tau kutu ko e malaia ke toluaki he motu ko Aikupito.

Ko e tau malaia oti ne toe ne lauia hokoia ni e tau Aikupito, ka e nakai ko e tau Isaraela. Ko e malaia ke fāaki ko e tau lago lalahi ko e tau garova ne felele ki loto he tau fale oti he tau Aikupito. Ko e malaia ke limaaki kua lauia e tau manu. Loga e tau povi mo e tau mamoe mo e tau koti ha Aikupito ne mamate.

Taha foki, ne uta e Mose mo Arona e falu efuefu mo e gana hake ki luga. Ti eke ai mo matamotu kelea ke he tau tagata mo e tau manu. Ko e malaia ke onoaki a nei.

Oti ai ti lagaki hake e Mose haana lima ki luga he lagi, ti fakafano mai e Iehova e pakūlagi mo e uhatuli. Ko e uhatuli ne mua atu e kelea ne to laia ki Aikupito.

Ko e malaia ke valuaki ko e tau hē akerisi ne loga lahi. Nakai la pihia ia fakamua atu po ke tali mai he magaaho ia e loga lahi pihia he tau hē akerisi. Ne kai e lautolu e tau mena oti ne nakai moumou he uhatuli.

Ko e malaia ke hivaaki ko e pouli. Ke he tolu e aho ne ufitia e motu he pouli kikio, ka ko e fanau Isaraela ne maama e tau mena ne nonofo ai a lautolu.

Fakahiku ai, ne tala age e Atua ke he haana tau tagata ke pīpī e toto he punua koti po ke punua mamoe i luga he tau gutuhala ha lautolu. Ti fano e agelu ki Aikupito. Magaaho ne kitia he agelu e toto, ne nakai tamate e ia ha tagata i loto he fale ia. Ka ko e tau fale oti ne nakai ha i ai ha toto he gutuhala, ne tamate he agelu he Atua e tau tama uluaki he tau tagata mo e tau manu. Ko e malaia ke 10 aki a nei.

He oti e malaia fakahiku nei, ne tala age a Farao ke he fanau Isaraela ke ō. Kua mau tuai e tau tagata he Atua ke ō, ti ko e pō ia ni ne kamata a lautolu ke ō kehe mai i Aikupito.