Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 33

Ō ke he Taha Faahi he Tahi Kula

Ō ke he Taha Faahi he Tahi Kula

ONOONO la ke he mena kua tupu! Ko Mose hanā ne fakaolo atu haana tokotoko ki luga he Tahi Kula. Ko lautolu mo ia ko e fanau Isaraela ne kua hao atu ke he taha faahi. Ka ko Farao mo e haana tau kau oti kua tomo he tahi. O mai la ke kitia ko e tupu mai fēfē e mena nei.

He iloa e tautolu, ne fekau e Farao e fanau Isaraela ke ō kehe mai i Aikupito he magaaho ne fakahoko he Atua e malaia ke 10 aki ke he tau Aikupito. Kavi ke he 600,000 he tau tagata taane ha Isaraela ne ō ai, ti tokologa foki e tau fifine mo e tau fanau. Pihia foki, ne tokologa e tau tagata kehe ne talitonu ki a Iehova kua ō mo e tau Isaraela. Ne uta oti e lautolu e tau mamoe mo e tau koti mo e tau povi mo lautolu.

Ato ō a lautolu, ne ole e tau Isaraela ke he tau Aikupito ma e tau mena tui mo e tau koloa ne talaga aki e tau auro mo e tau ario. Ne matakutaku lahi e tau Aikupito, ha ko e malaia fakahiku ne hoko ki a lautolu. Ti age e lautolu ke he tau Isaraela e tau mena oti ne ole e lautolu.

Fai aho he mole ti hohoko e fanau Isaraela ke he Tahi Kula. Ne okioki a lautolu he mena ia. Nakai leva, ne tokihala a Farao mo e haana tau tagata ha kua fekau e lautolu e fanau Isaraela ke ō. ‘Kua fakatoka tuai e tautolu e tau tupa ha tautolu ke ō!’ he talahau e lautolu.

Ti liu a Farao hiki foki e loto haana. Ne taute fakaave e ia haana tau kariota tau mo e haana kau. Ti kamata a ia ke tutuli atu ke he fanau Isaraela mo e 600 e kariota pauaki, mo e tau kariota oti ha Aikupito.

He magaaho ne kitia ai he fanau Isaraela a Farao mo e haana kautau hane mumui atu ki a lautolu, ti matakutaku lahi a lautolu. Nakai fai mena ke fehola ki ai. Ko e Tahi Kula haia ke he taha faahi ia lautolu, ka ko e hanei e tau Aikupito hane o mai he taha faahi. Ka e tuku e Iehova e aolagi fakatupou he vahaloto he haana a tau tagata mo e tau Aikupito. Ti nakai maeke he tau Aikupito ke kitia e tau Isaraela ke keli a lautolu.

Ti fekau e Iehova a Mose ke fakaolo haana tokotoko ki luga he Tahi Kula. Magaaho ne taute ai e ia, ne fakatupu e Iehova e matagi lahi ke agi mai he faahi uta. Ne vevehe ua e tau vai he tahi, ti kua eke e tau vai mo kaupā he tau faahi ne ua.

Ti kamata ai e fanau Isaraela ke o atu ke he tahi he hala toka mōmō. Ne lahi e magaaho ke o atu ai e tau miliona tagata mo e tau manu oti ha lautolu mo e hohoko mafola ke he taha faahi he tahi. Fakahiku ai kua liu maeke foki e tau Aikupito ke kitia e tau Isaraela. Ko e tau tupa ha lautolu hane fehola atu! Ti o atu fakatepetepe a lautolu ki loto he tahi ke tutuli atu ki a lautolu.

He magaaho ia ne ō ai a lautolu ne taute he Atua e tau hui kariota ke mokulu kehekehe. Ne matakutaku lahi e tau Aikupito ti kamata ke tagi atu: ‘Kua tau a Iehova ma e fanau Isaraela ki a tautolu. Kia fehola a tautolu!’ Ka kua tomui lahi.

Ko e magaaho hanei ne fekau e Iehova a Mose ke fakaolo atu haana a tokotoko ki luga he Tahi Kula, tuga he kitia e koe he fakatino. He magaaho ne taute pihia e Mose, ne liu mai e vai he tau faahi ti ufitia ai e tau Aikupito mo e ha lautolu a tau kariota. Ne mumui atu e kautau katoa ke he tau Isaraela ki loto he tahi. Ti nakai fai mai he tau Aikupito ne moui!

Ko e fiafia ha ia ha kua hao oti e tau tagata he Atua! Ne lologo he tau tagata taane e lologo fakaheke ki a Iehova, he pehe: ‘Kua moua e Iehova e kautu lilifu ue atu. Kua tolo e ia e tau nua mo e tau tagata heke nua ki tahi.’ Ne uta e Miriama ko e mahakitaga ha Mose e topa haana, ti mumui atu oti e tau fifine ki a ia mo e ha lautolu a tau topa. Ti koli a lautolu mo e fiafia, ne lologo e lautolu e lologo taha ne lologo he tau tagata taane: ‘Kua moua e Iehova e kautu lilifu ue atu. Kua tolo e ia e tau nua mo e tau tagata heke nua ki tahi.’