Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 11

Ko e Tagaloa Fakamua

Ko e Tagaloa Fakamua

ILOA nakai e koe e mena fakamua ne taute e Noa mo e haana magafaoa he magaaho ne o mai ai ki fafo he vaka? Ne taute e ia e poa po ke mena fakaalofa ke he Atua. Maeke a koe ke kitia a ia ne taute e mena nei he fakatino i lalo. Ne foaki e Noa e poa manu nei ke fakaaue ke he Atua ha kua fakahao e ia e magafaoa haana mai he fakapukeaga lahi.

Liga fiafia nakai a Iehova ke he mena fakaalofa he manatu e koe? E, fiafia a ia. Ti mavehe a ia ki a Noa to nakai liu a ia ke moumou e lalolagi aki e fakapuke.

Nakai leva ti mōmō ai e fuga kelekele, ti kamata agataha e moui foou ha Noa mo e haana magafaoa i fafo he vaka. Kua fakamonuina he Atua a lautolu mo e pehē: ‘Kia fakatokologa haau a fanau. Kia fakatolomaki e numera ato puke e lalolagi he tau tagata.’

He magaaho fakamui, ka logona he tau tagata hagaao ke he fakapukeaga lahi pihia, liga matakutaku a lautolu neke liu e fakapuke pihia ke tupu foki. Ti tuku age he Atua taha mena ke fakamanatu ke he tau tagata e haana maveheaga ke ua liu fakapuke foki e lalolagi katoa. Iloa nakai e koe ko e heigoa ne age e ia mo fakamanatuaga ki a lautolu? Ko e tagaloa.

Fa mahani ke kitia e tagaloa he lagi ka mole e uha ti kikila e laā. Ha ha i ai loga e tau lanu kehekehe fulufuluola he tagaloa. Kua fai nakai a koe ne kitia? Kitia nakai e koe taha i loto he fakatino?

Ne pehē mai e Atua: ‘Kua mavehe au ke ua liu mamate e tau tagata mo e tau manu ha ko e fakapuke. To tuku e au e tagaloa haaku ke he tau aolagi. Ti ka tu e tagaloa, to kitia ai e au mo e manatu ai e maveheaga nei haaku.’

Ti ka kitia e koe e tagaloa ko e heigoa kua lata ke fakamanatu atu ki a koe? E, ko e maveheaga he Atua to nakai liu a ia ke moumou e lalolagi ha ko e fakapukeaga lahi.