Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 15

Ne Haga ki Tua e Hoana ha Lota

Ne Haga ki Tua e Hoana ha Lota

KO LOTA mo e haana magafaoa ne nonofo auloa mo Aperahamo he motu ko Kanana. Taha aho ne pehē a Aperahamo ki a Lota: ‘Kua nakai lahi e kelekele hinei ke lata mo e tau manu oti ha taua. Fakamolemole, hau a taua ke mavehevehe. Ka fano a koe ke he taha faahi, ti fano au ke he taha faahi.’

Ne kitekite atu a Lota ke he kelekele. Ne kitia e ia e vala motu fulufuluola ne ha i ai e vai mo e lahi he motie mitaki ke lata mo e tau manu haana. Ko e Faahimotu ha Ioritana anei. Ti hiki atu e Lota e magafaoa haana mo e tau manu ki ai. Fakahiku, ti fakatū e lautolu e kaina ha lautolu he maaga ko Sotoma.

Ne to lahi e kelea he tau tagata Sotoma. Kua tupetupe lahi a Lota ha ko e mena nei, ha ko ia ko e tagata mitaki. Kua tupetupe foki e Atua. Fakahiku ai, ne fakafano he Atua ua e agelu ke hataki a Lota, ko e moumou hane fai e ia a Sotoma mo e maaga tata mai ko Komora ha ko e tau mahani kelea ha lautolu.

Ne tala age e tau agelu ki a Lota: ‘Fakaave ā! Uta haau a hoana mo e tau tama fifine tokoua haau ti ō kehe mai hinei!’ Ne fakatuai a Lota mo e magafaoa haana ke ō, ti totō he tau agelu e tau lima ha lautolu mo e takitaki atu a lautolu ki tua he maaga. Ti taha he tau agelu ne pehē: ‘Fehola ke momoui! Aua neke haga ki tua. Fehola ke he tau mouga, ke ua mamate a mutolu.’

Ne omaoma a Lota mo e fanau fifine haana ti fehola kehe mai i Sotoma. Nakai tutū fakakū a lautolu, ti nakai hahaga a lautolu ki tua. Ka e nakai omaoma e hoana ha Lota. He fai vehā a lautolu mai i Sotoma, ne tu a ia mo e haga ki tua. Ti faliu pou masima ai e hoana ha Lota. Kitia nakai e koe a ia he fakatino?

Maeke ia tautolu ke iloa e fakaakoaga mitaki mai he mena nei. Kua fakakite mai ki a tautolu to fakahao he Atua a lautolu ne omaoma ki a ia, ka ko lautolu ne nakai omaoma ki a ia to galo e tau momoui ha lautolu.