Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 9

Tā e Noa e Vaka

Tā e Noa e Vaka

FAI hoana a Noa ti tolu e tama taane. Ko e tau higoa he tau tama haana ko Semu, Hamo mo Iafeta. Ti igatia e tau tama nei mo e hoana. Ti tokovalu e tagata he magafaoa a Noa.

Kua fekau he Atua a Noa mogonei ke taute e mena kehe lahi. Kua tala age a ia ki a Noa ke tā e vaka lahi mahaki. Ko e vaka nei kua lahi tuga e toga, ka e tuga ni e puha loa lahi mahaki. ‘Kia eke ke tolu e fata,’ he tala age he Atua, ‘ti tuku foki e tau poko i loto.’ Ko e tau poko kua taute ma Noa mo e haana magafaoa, tau manu, mo e tau mena kai ke lata mo lautolu oti.

Kua tala age foki e Atua ki a Noa ke tā e vaka mo e ai maeke e vai ke tafe ki loto. Pehē e Atua: ‘To fakafano atu e au e vai puke lahi mo e moumou aki e lalolagi katoa. Ko e tau tagata oti kua nakai ha ha i loto he vaka to mamate.’

Ko Noa mo e haana tau tama kua omaoma ki a Iehova ti kamata ke tālaga. Ka e fekī ni e falu tagata. Kua tumau ni a lautolu ke kelea. Nakai fai tagata ne talitonu ki a Noa he magaaho ne tala age e ia ki a lautolu e mena ka taute he Atua.

Kua loa lahi e magaaho ke tā ai e vaka ha kua lahi mahaki. Fakahiku ni, he loga e tau ne mole kua mau tuai. Kua tala age e Atua he magaaho nei ki a Noa ke tamai e tau manu ki loto he vaka. Kua pehē e Atua ke tamai takiua falu he tau manu, ko e manu taane mo e manu fifine. Ka ko e falu vahega manu kehekehe, ne pehē e Atua ki a Noa ke tamai takifitu. Pehē foki e Atua ki a Noa ke tamai e tau vahega manu lele kehekehe. Taute ni e Noa e mena kua tala age he Atua.

Magaaho fakamui, ne ō foki a Noa mo e haana magafaoa ki loto he vaka. Ti pā he Atua e gutuhala. I loto, ne fakatali a Noa mo e haana magafaoa. Manamanatu la ko koe i loto he vaka ne fakatali mo lautolu. To liga ha i ai mooli nakai e fakapuke tuga ne talahau he Atua?