Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 8

Tau Tupua he Lalolagi

Tau Tupua he Lalolagi

KAEKE kua hau taha tagata ki a koe ti tokoluga a ia tuga e alofale he fale haau, fēfē la e manatu haau? Ko e tupua mooli e tagata ia! He taha magaaho ne ha ha i ai e tau tupua mooli he lalolagi. Kua fakakite mai he Tohi Tapu ko e tau mamatua taane ha lautolu ko e tau agelu mai he lagi. Ka e maeke fēfē ke pihia?

Manatu, ko e agelu kelea ko Satani ne kua lavelave he fakatupu lekua. Kua lali foki a ia ke fakaohooho e tau agelu he Atua ke kelea. Fai magaaho, ko e falu he tau agelu nei kua kamata ke fanogonogo ki a Satani. Kua tiaki e lautolu e gahua ne age he Atua ke taute e lautolu he lagi. Ti o hifo mai a lautolu ke he lalolagi ti faliu tino tagata a lautolu. Iloa nakai e koe ko e ha?

Pehē mai e Tohi Tapu, ha kua kitia he tau tama taane nei he Atua e tau fifine fulufuluola he lalolagi ti manako ke nonofo fakalataha mo lautolu. Ti o hifo mai a lautolu ke he lalolagi ti faihoana ke he tau fifine nei. Pehē e Tohi Tapu kua hepe e mena nei, ha ko e mena tufuga he Atua e tau agelu ke nonofo he lagi.

Ko e magaaho ne fai tama ai e tau agelu mo e tau hoana ha lautolu, ne kehe lahi e tau tama nei. Fakamua na liga nakai kehe a lautolu ka onoono ki ai. Ka e lalahi fakahaga ni a lautolu, ti holo foki ki mua e malolō ti eke a lautolu mo tau tupua.

Kua kelea lahi e tau tupua nei. Ha kua lalahi mo e malolō a lautolu, kua fakamamahi e lautolu e tau tagata. Kua lali a lautolu ke fakaohooho e tau tagata oti ke kelea tuga ni a lautolu.

Ne kua mate a Enoka, ka e taha e tagata he lalolagi he magaaho nei ne mitaki. Ko e higoa he tagata nei ko Noa. Kua taute tumau e ia e tau mena ne manako e Atua ke taute e ia.

Taha aho ne tala age e Atua ki a Noa kua hoko mai tuai e magaaho ke moumou e Ia e tau tagata kelea oti. Ka e to fakahao he Atua a Noa, haana magafaoa mo e loga he tau manu. Kitekite la ko e taute fēfē he Atua e mena nei.