Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 2

Ko e Katene Fulufuluola

Ko e Katene Fulufuluola

KITEKITE la ke he lalolagi hinei! Ko e fuluola ha ia he tau mena oti! Kitekite la ke he motie mo e tau akau, tau fiti lakau mo e tau manu oti. Maeke nakai a koe ke fakakite mai e elefane mo e tau leona?

Tupu mai fēfē e katene fulufuluola nei? E, o mai la ke kitia e puhala ne tauteute ai he Atua e lalolagi ke lata mo tautolu.

Fakamua, kua tufuga he Atua e motie lanu laukou ke ufiufi aki e kelekele. Ti tufuga e ia e tau vahega kehekehe he tau akau ikiiki mo e tau ulu akau mo e tau akau lalahi. Ko e tau mena momoui nei kua lagomatai ke fakafulufuluola aki e lalolagi. Ka e mua atu foki e tau mena ne kua taute ai. Loga he tau akau nei kua foaki mai ma tautolu e tau kai humelie mitaki.

Magaaho fakamui ne tufuga he Atua e tau ika ke kakau he vai mo e tau manu lele ke felele he pulagi. Ne tufuga e ia e tau kuli mo e tau pusi mo e tau nua; tau manu lalahi mo e tau manu ikiiki. Ko e tau manu fēfē kua nonofo tata ke he kaina haau? Nakai kia fiafia a tautolu ha kua tufuga he Atua e tau mena oti nei ma tautolu?

Fakahiku aki, kua tufuga he Atua e taha vala he lalolagi ke eke mo matakavi uho lahi. Kua fakahigoa e ia e matakavi nei ko e katene i Etena. Kua mitaki katoatoa ni. Ko e tau mena oti i ai kua fulufuluola. Ti manako e Atua ke taute e lalolagi katoa ke tuga ni e katene fuluola nei ne tufuga e ia.

Ka e liu foki la kitekite ke he fakatino he katene nei. Iloa nakai e koe ko e heigoa ne galo agaia he kitia he Atua? O mai la ke kumikumi.