Skip to content

Skip to table of contents

Tau Fakamoli a Iehova

Fifili e vagahau Faka-Niue

 FAKAAKOAGA 11

Aoga Fēfē e Tau Matapatu Fakaakoaga Tohi Tapu ki a Tautolu?

Aoga Fēfē e Tau Matapatu Fakaakoaga Tohi Tapu ki a Tautolu?

1. Ko e ha kua lata a tautolu ma e takitakiaga?

Maeke fēfē e tau matapatu fakaakoaga he Tohi Tapu ke taute e tau hatakiaga puipui?​—SALAMO 36:9.

Ko e Tufuga ha tautolu kua mua atu e pulotu mai ia tautolu. Ko e Matua fakaalofa, kua leveki e ia a tautolu. Ti nakai manako foki a ia ki a tautolu ke tutokotaha mai ia Ia. (Ieremia 10:23) Ti tuga ni e tama tote kua lata ke takitaki he tau matua, kua lata a tautolu oti ke takitaki he Atua. (Isaia 48:17, 18) Ko e tau matapatu fakaakoaga he Tohi Tapu kua foaki e takitakiaga ko e mena fakaalofa mai he Atua.​—Totou 2 Timoteo 3:16.

Ko e tau matafakatufono mo e tau matapatu fakaakoaga ha Iehova kua fakaako a tautolu ke he puhala he moui ne mua atu mogonei ti fakakite ki a tautolu e puhala ka moua e tautolu e tau palepale tukulagi he vahā i mua. Ha kua tufuga he Atua a tautolu, kua hakotonu ni ke talia fiafia e tautolu e takitakiaga haana.​—Totou Salamo 19:7, 11; Fakakiteaga 4:11.

2. Ko e heigoa e tau matapatu fakaakoaga he Tohi Tapu?

Ko e tau matapatu fakaakoaga he Tohi Tapu ko e tau kupu mooli uho lahi. Ko e tau matafakatufono he taha faahi, ne liga lata ma e tau tuaga pauaki. (Teutaronome 22:8) Lata a tautolu ke fakaaoga e lotomatala he manamanatuaga ke maama e puhala ke fakagahua e fakaakoaga ke he tuaga pauaki. (Tau Fakatai 2:10-12) Ma e fakatai, kua fakaako he Tohi Tapu ko e moui ko e mena fakaalofa mai he Atua. Ko e fakaakoaga aoga ia ka takitaki a tautolu he gahuaaga, i kaina, mo e he fano fenoga. Kua takitaki ai a tautolu ke taute e tau hatakiaga puipui.​—Totou Gahua 17:28.

3. Ha fe e tau matapatu fakaakoaga ua kua aoga lahi?

Ne tutala a Iesu ke he ua e matapatu fakaakoaga ne mua atu e aoga. Kua fakakite he fakaakoaga fakamua e finagalo mooli he moui he tagata​—ke iloa e Atua, ke fakaalofa ki a ia, mo e  ke fekafekau fakamooli ki a ia. Ko e fakaakoaga fakamua nei kua lata ke manamanatu ke he tau fifiliaga oti ha tautolu. (Tau Fakatai 3:6) Ko lautolu kua tokaloto e fakaakoaga nei kua moua e tuaga kapitiga mo e Atua, fiafia mooli, mo e moui tukulagi.​—Totou Mataio 22:36-38.

Ko e fakaakoaga ke uaaki ka takitaki a tautolu ke he tau fakafetuiaga mafola mo e falu. (1 Korinito 13:4-7) Ko e fakagahua e fakaakoaga nei ke uaaki kua putoia e fifitaki ke he puhala he Atua he fakafehagai mo e tau tagata.​—Totou Mataio 7:12; 22:39, 40.

4. Aoga fēfē e tau matapatu fakaakoaga he Tohi Tapu ki a tautolu?

Fakaako he tau matapatu fakaakoaga he Tohi Tapu e puhala ke he tau magafaoa ke fakalataha ke he fakaalofa. (Kolose 3:12-14) Ko e Kupu he Atua foki kua puipui e tau magafaoa he fakaako e taha fakaakoaga takitaki foki​—kua lata e fakamauaga ke tumau tukulagi.​—Totou Kenese 2:24.

He muitua ke he tau fakaakoaga he Tohi Tapu, maeke ia tautolu ke puipui e tau mena moua mo e tau logonaaga ha tautolu. Ma e fakatai, ko e tau takitaki gahua kua manako ke he tau tagata gahua kua fakatatau ke he tau matapatu fakaakoaga he Tohi Tapu he mahani fakamooli mo e fakamakutu. (Tau Fakatai 10:4, 26; Heperu 13:18) Fakaako foki he Kupu he Atua a tautolu ke mahani fakalatalata ke he tau mena kua lata mo e ke tokiofa e tuaga kapitiga mo e Atua ne kua mua atu he tau koloa tino.​—Totou Mataio 6:24, 25, 33; 1 Timoteo 6:8-10.

He fakagahua e tau matapatu fakaakoaga he Tohi Tapu ka puipui e malolō tino ha tautolu. (Tau Fakatai 14:30; 22:24, 25) Ma e fakatai, he taofi mau ke he matafakatufono he Atua ke totoko e konahia kua puipui a tautolu mai he tau gagao mo e tau pakia kelea lahi mahaki. (Tau Fakatai 23:20) Kua fakaatā e Iehova a tautolu ke inu e kava ka e inu fakalatalata ni. (Salamo 104:15; 1 Korinito 6:10) Ko e tau matapatu fakaakoaga faka-Atua kua aoga ki a tautolu he fakaako a tautolu ke puipui e tau gahua ha tautolu ti pihia foki mo e tau manatu ha tautolu. (Salamo 119:97-100) Ka ko e tau Kerisiano mooli kua nakai fakalilifu noa ni e tau tuaga he Atua ke aoga ma lautolu. Kua taute pihia e lautolu ke fakalilifu a Iehova.​—Totou Mataio 5:14-16.