Skip to content

Skip to table of contents

Tau Fakamoli a Iehova

Fifili e vagahau Faka-Niue

 FAKAAKOAGA 3

Ko e Tala Mitaki Kia kua Mai Mooli he Atua?

Ko e Tala Mitaki Kia kua Mai Mooli he Atua?

1. Ko Hai e Tohia he Tohi Tapu?

Ko e tala mitaki to moui tukulagi e tau tagata he lalolagi ne tohi he Tohi Tapu. (Salamo 37:29) Ne 66 e tohi ikiiki he Tohi Tapu. Kua fakaaoga he Atua kavi ke he 40 e tagata taane fakamooli ke tohi ai. Ko e tau tohi lima fakamua ne tohi e Mose kavi ke he 3,500 e tau kua mole. Ko e tohi fakahiku ne tohi he aposetolo ko Ioane molea e 1,900 e tau kua mole. Ha hai e tau manatu ne fakamau hifo he tau tagata tohia he Tohi Tapu? Ne matutaki e Atua mo e tau tagata tohia Tohi Tapu he puhala he agaaga tapu haana. (2 Samuela 23:2) Ne tohi hifo e lautolu e tau manatu he Atua, nakai ko e tau manatu ni ha lautolu. Ti ko Iehova e Tohia he Tohi Tapu.​—Totou 2 Timoteo 3:16; 2 Peteru 1:20, 21.

2. Maeke fēfē a tautolu ke iloa tonu kua mooli e Tohi Tapu?

Iloa e tautolu ko e Tohi Tapu mai he Atua ha kua talahau fakatonu ai e vahā anoiha ke he puhala fakamatafeiga. Nakai fai tagata ke taute e mena ia. (Iosua 23:14) Ko e Atua Malolō Ue Atu hokoia ka kitia tonu tuai e vahā anoiha he tagata.​—Totou Isaia 42:9; 46:10.

To amanaki a tautolu ke he tohi mai he Atua ke homo ue atu, ti pihia mooli ni. Totou piliona e lagaki he Tohi Tapu kua tufatufa ke he teau e tau vagahau. Pete he leva lahi, kua lagotatai e Tohi Tapu mo e saiene. Pihia foki ko e tau tagata tohia toko 40 ne nakai fekehekeheaki e taha ke he taha. * Lafi ki ai, ko e Tohi Tapu ne nakai fai mena hepe ke he fakaalofa he Atua, ti ha ha i ai agaia e malolō ke hiki e tau momoui he tau tagata ke mitaki. Kua fakalagalaga he tau fakamooliaga nei e tau miliona ko e Tohi Tapu e Kupu he Atua.​—Totou 1 Tesalonia 2:13.

Kitekite e vitiō Maeke Fēfē a Tautolu ke Iloa Tonu kua Mooli e Tohi Tapu?

 3. Hagaao ke he heigoa e Tohi Tapu?

Matapatu e Tohi Tapu ke he tala mitaki kua ha ha he Atua e finagalo fakaalofa ma e tau tagata. Fakamaama he tau Tohiaga Tapu e lilifu he tagata ke moui he lalolagi parataiso ne galo fakamua he fakamauaga tala he tagata mo e puhala ka fakahiku e parataiso ke fakafoou.​—Totou Fakakiteaga 21:4, 5.

Ha ha he Kupu he Atua foki e tau matafakatufono, tau matapatu fakaakoaga, mo e tau fakatonuaga. Lafi ki ai, kua fakamau he Tohi Tapu e fakamauaga tala he fakafehagaiaga he Atua mo e tau tagata​—ko e fakamauaga tala kua fakakite e aga he Atua. Ti ko e Tohi Tapu kua maeke ke lagomatai a koe ke iloa e Atua. Kua fakamaama e puhala ka eke a koe mo kapitiga haana.​—Totou Salamo 19:7, 11; Iakopo 2:23; 4:8.

4. Maeke fēfē a koe ke maama e Tohi Tapu?

Ko e porosua nei to lagomatai a koe ke maama e Tohi Tapu he fakaaoga e puhala taha ne fakaaoga e Iesu. Ne hagaao a ia ke he loga he tau kupu tohi mo e fakailoa e puhala ke “maama . . . e tau Tohi.”​—Totou Luka 24:27, 45.

Ha ha i ai falu mena ne fuluola tuga e tala mitaki mai he Atua. Ka e kehe e manatu he falu tagata, mo e hogohogo manava e falu ki ai. Ua fakalolelole. Ko e amaamanakiaga haau ke fiafia e moui tukulagi kua fakavē ke he iloa haau he Atua.​—Totou Ioane 17:3.

 

^ para. 3 Kikite e porosua A Book for All People.