Skip to content

Skip to table of contents

Tau Fakamoli a Iehova

Fifili e vagahau Faka-Niue

 FAKAAKOAGA 13

Ko e Heigoa e Tala Mitaki Hagaao ke he Lotu?

Ko e Heigoa e Tala Mitaki Hagaao ke he Lotu?

1. Mitaki nakai e tau lotu oti?

Fai tagata loto fakamooli e tau lotu oti. Ko e tala mitaki kua kitia he Atua a lautolu oti ia ti leveki ki a lautolu. Ka e momoko ai, kua fakaaoga e lotu ke he puhala favale. (2 Korinito 4:3, 4; 11:13-15) Hagaao ke he tau vala tala, ko e falu lotu kua putoia ke he fakamatakutaku, kelipopo fakamatakau, felakutaki, mo e fakakelea tama. Ko e fakamomoko ha ia he mena nei ke he tau tagata fakamooli he Atua!​—Totou Mataio 24:3-5, 11, 12.

Ko e lotu mooli kua fakaheke e Atua, ko e lotu fakavai kua nakai fakafiafia a ia. Kua fakaako ai e tau manatu kua nakai mai he Tohi Tapu, putoia e tau fakaakoaga fakavai hagaao ke he Atua mo e tau tagata mamate. Ka kua manako a Iehova ke he tau tagata ke iloa e kupu mooli hagaao ki a ia.​—Totou Esekielu 18:4; 1 Timoteo 2:3-5.

2. Ko e heigoa e tala mitaki hagaao ke he lotu?

Fiafia ai, nakai fakahehē e Atua ha ko e tau lotu kua totoku ke fakaalofa ki a ia ka e fakaalofa mooli ke he lalolagi a Satani. (Iakopo 4:4) Hagaao e Kupu he Atua ke he tau lotu fakavai oti tuga a ‘Papelonia Lahi.’ Ko Papelonia ko e maaga tuai he lotu fakavai ne kamata he mole e Fakapukeaga he vahā ha Noa. Nakai leva, to tamai he Atua e fakaotiaga mafiti ke he lotu kua fakahehē mo e fakapehia e tau tagata.​—Totou Fakakiteaga 17:1, 2, 5, 16, 17; 18:8.

Fai tala mitaki foki. Nakaila nimo e Iehova e tau tagata fakamooli kua nonofo fano ke he tau lotu fakavai he lalolagi katoa. Kua fakalataha e ia e tau tagata pihia he fakaako a lautolu ke he kupu mooli.​—Totou Mika 4:2, 5.

 3. Ko e heigoa kua lata ke taute he tau tagata loto fakamooli?

Fakalataha he lotu mooli e tau tagata

Leveki e Iehova e tau tagata kua fiafia ke he mena mooli mo e mitaki. Kua tomatoma e ia a lautolu ke toka kehe e lotu fakavai. Ko e tau tagata kua fakaalofa ke he Atua kua makai ke taute e tau hikihikiaga ke fakafiafia a Ia.​—Totou Fakakiteaga 18:4.

Ke he senetenari fakamua, ne logona he tau tagata fakamooli e tala mitaki mai he tau aposetolo, ne talia fiafia e lautolu. Ne fakaako e lautolu e puhala foou he moui mai ia Iehova, ko e puhala fiafia lahi he moui ne fai kakano mo e amaamanakiaga. Ko lautolu ko e fifitakiaga mitaki ma tautolu he vahā nei ha kua talia e lautolu e tala mitaki he tuku fakamua a Iehova ke he tau momoui ha lautolu.​—Totou 1 Tesalonia 1:8, 9; 2:13.

Kua fakafeleveia e Iehova e tau tagata tapuaki ia ke he magafaoa haana ko lautolu kua fuluhi kehe mai he lotu fakavai. Ka talia e koe e uiina mafanatia a Iehova, to moua e koe e tuaga kapitiga haana, ko e magafaoa foou mo e fakaalofa he tau matakainaga he tau tagata tapuaki ha Iehova, mo e moui tukulagi.​—Totou Mareko 10:29, 30; 2 Korinito 6:17, 18.

4. To tamai fēfē he Atua e olioli ke he tau motu takitaha?

Ko e fakafiliaga hane hoko mai he lotu fakavai ko e tala mitaki. To tamai ai ke he lalolagi katoa e fakatotokaaga mai he pehiaaga. To nakai liu e lotu fakavai ke fakahehē mo e vehe kehe e tau tagata. Ko e tau tagata oti to fakalataha ke he tapuakiaga he Atua mooli tokotaha.​—Totou Fakakiteaga 18:20, 21; 21:3, 4.