Skip to content

Skip to table of contents

Tau Fakamoli a Iehova

Fifili e vagahau Faka-Niue

 FAKAAKOAGA 6

Ko e Heigoa e Amaamanakiaga ma Lautolu kua Mamate?

Ko e Heigoa e Amaamanakiaga ma Lautolu kua Mamate?

1. Ko e heigoa e tala mitaki hagaao ki a lautolu kua mamate?

He hoko atu a Iesu ki Petania tata ki Ierusalema, ko e kapitiga haana ko Lasalo kua mate tuai ke fā e aho. Ne fano a Iesu ke he tanuaga mo Mareta mo Maria, ko e tau mahakitaga he tagata mate. Nakai leva ti fakapotopoto mai e toloaga. Maeke nakai a koe ke manamanatu ke he olioli ha Mareta mo Maria he fakaliu tū mai e Iesu a Lasalo ke he moui?​—Totou Ioane 11:21-24, 38-44.

Ne fitā a Mareta he mailoga e tala mitaki hagaao ke he tau tagata mamate. Iloa e ia ko Iehova ka fakaliu tū mai e tau tagata mamate ke liu momoui he lalolagi.​—Totou Iopu 14:14, 15.

2. Ko e heigoa e tuaga ha lautolu kua mamate?

Ne tala age e Atua ki a Atamu: “Ko e efuefu ni a koe, to liu foki a koe ke he efuefu.”​—KENESE 3:19.

Kua eke e tau tagata mai he efuefu. (Kenese 2:7; 3:19) Nakai ko e tau agaaga a tautolu ne momoui ke he tino. Ko tautolu ko e tau mena momoui fakatino, ti nakai fai vala i loto ha tautolu ne moui ka mate. Ka mamate a tautolu, kua mamate foki e tau uhoniu ha tautolu, mo e nakai gahuahua e tau manatu ha tautolu. Ne nakai talahau e Lasalo ha mena hagaao ke he mogo ne mate a ia ha kua nakai fai logonaaga e tagata mate.​—Totou Salamo 146:4; Fakamatalaaga 9:5, 6, 10.

Kua fakakikiveka kia he Atua e tau tagata ke he afi he mole e mamate? Ha kua fakakite mai he Tohi Tapu kua nakai fai logonaaga e tau tagata mamate, ko e afi tote kua maaliali ai  ko e fakaakoaga fakavai ne fatipiko hagaao ke he Atua. Ko e manatu he fakakikiveka e tau tagata ke he afi kua fakalialia ki a ia.​—Totou Ieremia 7:31.

3. Maeke nakai a lautolu ne mamate ke vagahau ki a tautolu?

Kua nakai maeke e tagata mate ke vagahau po ke logona. (Salamo 115:17) Ka e mahani kelea falu agelu ti maeke ia lautolu ke vagahau ke he tau tagata mo e fakatupua ke tuga ko e tau tagata mamate. (2 Peteru 2:4) Kua nakai talia e Iehova e lali ke matutaki ke he tagata mate.​—Totou Teutaronome 18:10, 11.

4. Ko hai ka liliu momoui?

Totou miliona he tau tagata ne mamate he tau tukuaga ka liliu mai ke he moui he lalolagi. Falu foki kua nakai iloa e Atua mo e taute e tau mena kelea ka fakaliu tū mai.​—Totou Salamo 37:9; Gahua 24:15.

Ko lautolu ne fakaliu tū mai to maeke ke fakaako ke he kupu mooli hagaao ke he Atua mo e ke fakagahuahua e tua ia Iesu he omaoma ki a ia. (Fakakiteaga 20:11-13) Ko lautolu kua liliu mai ke he moui mo e taute e tau mena mitaki ka maeke ke olioli e moui tukulagi ke he lalolagi.​—Totou Ioane 5:28, 29.

5. Ko e heigoa ne talahau he liu tū mai ki a tautolu hagaao ki a Iehova?

Ne taute he Atua e amaamanakiaga ke lata ma lautolu kua mamate he fakafano mai e Tama haana ke mate ma tautolu. Ti kua talahau he liu tū mai ki a tautolu e fakaalofa mo e fakaalofa noa ha Iehova. Ka liliu tū mai a lautolu ne mamate ke he moui, ko hai kua manako pauaki a koe ke kitia?​—Totou Ioane 3:16; Roma 6:23.