Skip to content

Skip to table of contents

Tau Fakamoli a Iehova

Fifili e vagahau Faka-Niue

 FAKAAKOAGA 12

Maeke Fēfē a Koe ke Fakatata Atu ke he Atua?

Maeke Fēfē a Koe ke Fakatata Atu ke he Atua?

1. Fanogonogo nakai e Atua ke he tau liogi oti?

Kua uiina he Atua e tau tagata oti kana ke fakatata ki a ia he liogi. (Salamo 65:2) Ka e nakai fanogonogo a ia ki ai, po ke talia ai, ke he tau liogi oti. Ma e fakatai, ko e tau liogi he tagata taane kua taute fakakelea e hoana haana ka fakalavelave. (1 Peteru 3:7) Pihia foki, he fakamakamaka e tau Isaraela ke he mahani kelea ne nakai talia he Atua ke fanogonogo ke he tau liogi ha lautolu. Maaliali ai, ko e liogi ko e mena lilifu. Pete ia, to talia he Atua e tau liogi ha lautolu foki ne agahala muitui ka fakatokihala a lautolu.​—Totou Isaia 1:15; 55:7.

2. Lata ke liogi fēfē a tautolu?

Ko e liogi ko e vala he tapuakiaga ha tautolu, ti kua lata a tautolu ke liogi ni ke he ha tautolu a Tufuga, ko Iehova. (Mataio 4:10; 6:9) Pihia foki, ha kua nakai mitaki katoatoa a tautolu, kua lata a tautolu ke liogi ke he higoa ha Iesu ha kua mate a ia ma e tau agahala ha tautolu. (Ioane 14:6) Nakai manako a Iehova ki a tautolu ke ako manatu po ke tohi e tau liogi. Manako a ia ki a tautolu ke liogi mai he tau loto ha tautolu.​—Totou Mataio 6:7; Filipi 4:6, 7.

Maeke foki e Tufuga ha tautolu ke logona e tau liogi nakai fai lea. (1 Samuela 1:12, 13) Uiina e ia a tautolu ke liogi ke he ha magaaho, tuga ke he kamataaga mo e ke he fakaotiaga he aho, he tau magaaho kai, mo e ka fehagai a tautolu mo e tau lekua.​—Totou Salamo 55:22; Mataio 15:36.

3. Ko e ha kua fakapotopoto auloa e tau Kerisiano?

He fakatata ke he Atua kua nakai mukamuka ha kua momoui a tautolu fakalataha mo e tau tagata ne nakai tua ke he Atua mo e vaiga e maveheaga haana he mafola ke he lalolagi. (2 Timoteo 3:1, 4; 2 Peteru 3:3, 13) Ti kua lata a tautolu  ke he feoakiaga atihake he tau matakainaga fakaagaaga, ti pihia foki a lautolu ki a tautolu.​—Totou Heperu 10:24, 25.

He feoaki mo e tau tagata kua fakaalofa ke he Atua kua lagomatai a tautolu ke fakatata ke he Atua. Ko e tau feleveiaaga he Tau Fakamoli a Iehova kua foaki e tau magaaho mitaki ke aoga mai he tua he falu.​—Totou Roma 1:11, 12.

4. Maeke fēfē a koe ke fakatata ke he Atua?

Maeke a koe ke fakatata ki a Iehova he manamanatu fakahokulo ke he mena ne fakaako e koe mai he haana Kupu. Manamanatu ke he haana a tau matagahua, haana fakatonuaga, mo e haana tau maveheaga. Ko e manamanatu fakahokulo ke he liogi kua atihake e loto fakaaue ke he tau loto ha tautolu ma e fakaalofa he Atua mo e pulotu.​—Totou Iosua 1:8; Salamo 1:1-3.

Maeke ia koe ke fakatata ke he Atua kaeke ni ke falanaki a koe ki a ia, kaeke ke tua a koe ki a ia. Ka ko e tua kua tuga e mena moui kua lata ke fagai. Kua lata ia koe ke fagai tumau e tua haau he liu manamanatu ke he fakavēaga he tau taofiaga haau.​—Totou Mataio 4:4; Heperu 11:1, 6.

5. To aoga fēfē e fakatata ke he Atua ki a koe?

Kua leveki e Iehova a lautolu kua fakaalofa ki a ia. Maeke a ia ke puipui a lautolu mai he ha mena ka fakahui e tua ha lautolu mo e amaamanakiaga ha lautolu ke he moui tukulagi. (Salamo 91:1, 2, 7-10) Kua hataki e ia a tautolu ke he tau puhala he moui ne fakahagahaga kelea e malolō tino mo e fiafia ha tautolu. Kua fakaako e Iehova a tautolu ke he puhala mitaki lahi mahaki he moui.​—Totou Salamo 73:27, 28; Iakopo 4:4, 8.