Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA 6

Puhala kua Hiki e Fakamauaga Ha ko e Tau Tama Mukemuke

Puhala kua Hiki e Fakamauaga Ha ko e Tau Tama Mukemuke

“Ko e fanau ko e mena moua ia mai ia Iehova.”—Salamo 127:3

Ko e fanau mai he tama mukemuke kua maeke ke fiafia lahi mo e tupetupe ma e hoa mau. Ko e tau matua foou, to liga ofo a mua ke he lahi he magaaho mo e malolō ke leveki e tama mukemuke ha mua. Maeke e mohe alafia mo e hikihikiaga he tau logonaaga ke tauhele e fakafetuiaga ha mua. Kua lata a koe mo e hoa haau ke taute e tau hikihikiaga ke leveki e tama mukemuke ha mua mo e ke tumau e fakamauaga. Lagomatai fēfē he fakatonuaga he Tohi Tapu a mua ke fehagai mo e tau paleko nei?

 1 MAAMA E PUHALA KUA HIKI E MOUI HA MUA HA KO E TAMA MUKEMUKE

PEHĒ E TOHI TAPU: “Kua fakauka e fakaalofa, to totonu.” Pihia foki, ko e fakaalofa kua “nakai kumi e ia hana tau mena, nakai ita vave.” (1 Korinito 13:4, 5) Ko e matua fifine foou, to hagaaki pauaki a koe ke he tama mukemuke haau. Ka kua liga kamata e taane haau ke logona hifo kua tiaki a ia, ti ua nimo ke fai magaaho foki ma haana. Mai he fakauka mo e totonu, kua maeke ia koe ke lagomatai e taane haau ke logona hifo kua aoga a ia ki a koe mo e putoia ke he levekiaga he tama mukemuke ha mua.

“Kia pihia foki a mutolu ko e tau tane, kia nonofo fakalataha mo lautolu mo e iloilo.” (1 Peteru 3:7) Kia maama ai to lahi e malolō he hoana haau ke leveki e tama mukemuke ha mua. Kua foou e tau matagahua haana ti liga fakaatukehe, mategugu, po ke loto lolelole foki. He falu magaaho, liga hogohogomanava a ia ki a koe, ka e lali ke fakatotoka, ha “ko e tagata kua fakatuai ke ita, kua mua hana mitaki ke he toa.” (Tau Fakatai 16:32) Kia fakakite e lotomatala, mo e foaki e lalagoaga kua lata mo ia.—Tau Fakatai 14:29.

KO E MENA HA MUA KA TAUTE:

  • Tau Matua Taane: Lagomatai e hoana haau ke leveki e tama mukemuke, pihia foki he pō. Fakakaupā e magaaho haau he taute falu matagahua ke maeke ia koe ke lahi e magaaho mo e hoana haau mo e tama mukemuke haau

  • Tau Matua Fifine: Ka manako e taane haau ke lagomatai a koe ke leveki e tama mukemuke, talia e lagomatai haana. Ka nakai mitaki lahi e gahua haana ne taute, ua tuhituhi, ka e fakakite age fakatotonu ki a ia e puhala ke taute ai

 2 FAKAMALOLŌ HA MUA A FAKAMAUAGA

PEHĒ E TOHI TAPU: “Ti eke ai a laua mo tino taha.” (Kenese 2:24) Pete kua fai tama foou he magafaoa ha mua, kia manatu ko koe mo e hoa haau kua eke agaia “mo tino taha.” Kia eketaha ke fakatumau e fakafetuiaga ha mua ke malolō.

Tau hoana, kia loto fakaaue ke he lagomatai mo e lalagoaga he tau taane ha mutolu. Ko e tau talahauaga loto fakaaue ha mutolu kua maeke “ke malolo ai.” (Tau Fakatai 12:18) Tau taane, tala age ke he tau hoana ha mutolu kua ofania lahi mo e uho a ia. Fakaheke atu ki a ia ha ko e puhala kua leveki e ia e magafaoa.—Tau Fakatai 31:10, 28.

“Aua neke kumi e taha e mitaki hana ni, ka kia takitokotaha mo e kumi e mitaki he falu.” (1 Korinito 10:24) Taute tumau e mena kua mitaki lahi ma e hoa haau. Ko e hoa mau, fai magaaho ke tutala, nava atu, mo e fanogonogo e taha ke he taha. Ua lamakai ka hoko ke he tau fakafetuiaga mahani fakataane mo e fifine ha mua. Manamanatu ke he tau manako he hoa haau. Pehē e Tohi Tapu: “Aua neke totoko e taha ke he taha, ka ko e . . . loto fakalataha ki ai a mua.” (1 Korinito 7:3-5) Ti fakatutala fakamooli hoko mua ni ke he matakupu nei. Ko e fakauka mo e maamaaga ha mua ka fakamalolō e fakafetuiaga ha mua.

KO E MENA HA MUA KA TAUTE:

  • Ua nimo ke fai magaaho ma mua ni tokoua

  • Taute e tau mena ikiiki ke logona hifo he hoa haau kua fakaalofa ki a ia, tuga he fakafano e tohi po ke foaki e mena fakaalofa tote

 3 FAKAMAHANI E TAMA MUKEMUKE HA MUA

PEHĒ E TOHI TAPU: “Tali mai foki he vaha tote kua iloa e koe e tau Tohi Tapu, kua maeke ke fakailoilo a koe ke moua ai e moui.” (2 Timoteo 3:15) Pulega ke he mena ha mua ka taute ke fakaako e tama mukemuke ha mua. Kua ofoofogia e lotomatala haana ke fakaako, pihia foki ato fanau a ia. He ha hā agaia he manava, kua maeke e tama mukemuke ha mua ke mailoga e tau leo ha mua mo e tau logonaaga. Totou ki a ia he tote agaia. Pete ni ka liga nakai maama e ia e mena haau kua totou, kua maeke ai ke lagomatai a ia ke fiafia ke totou ka lahi a ia.

Kua nakai tote lahi e tama mukemuke ha mua ke logona a mua he tutala hagaao ke he Atua. Kia fakaatā a ia ke logona a mua kua liogi ki a Iehova. (Teutaronome 11:19) Ka pelē auloa mo ia, tutala hagaao ke he tau mena ne tufugatia he Atua. (Salamo 78:3, 4) He tupu hake e tama ha mua, to mailoga e ia ha mua a fakaalofa ki a Iehova ti fakamahani ke fakaalofa foki ki a ia.

KO E MENA HA MUA KA TAUTE:

  • Liogi pauaki ma e pulotu ke fakamahani e tama mukemuke ha mua

  • Liu fatiaki e tau kupu mo e tau manatu aoga ke lagomatai e tama mukemuke ha mua ke kamata tuai ke fakaako