Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA 4

Puhala ke Leveki Aki e Tupe

Puhala ke Leveki Aki e Tupe

“Kua fakamau e tau mena kua manamanatu ki ai ke he fifiliaga.”—Tau Fakatai 20:18

Manako oti a tautolu ke moua e tupe ke leveki aki e tau mena he magafaoa ne manako ki ai. (Tau Fakatai 30:8) Ha kua “eke foki e tau tupe mo mena ke malu ai.” (Fakamatalaaga 7:12) Ko e hoa mau, liga uka ke tutala hagaao ke he tupe, ka e ua fakaatā e tupe ke fakatupu e tau lekua he fakamauaga ha mua. (Efeso 4:32) Kua lata e hoa mau ke falanaki e taha ke he taha mo e gahua tokoua ke fifili e puhala ke fakaaoga e tupe.

 1 FAKATOKATOKA FAKAMITAKI

PEHĒ E TOHI TAPU: “Ha ko hai taha ia mutolu kua manako ke ati e kolo, ka e nakai nofo fakamua ki lalo ke totou e tau tupe ke palepale aki, po kua lahi nakai ia ia e tau mena ke fakaoti ai?” (Luka 14:28) Kua aoga lahi ke fakatokatoka tokoua e puhala ke fakaaoga e tupe ha mua. (Amosa 3:3) Fifili e mena kua lata ke fakatau mo e fiha e tupe kua fahia ke fakaaoga. (Tau Fakatai 31:16) Pete ni ka fai tupe a mua ke fakatau e koloa, nakai ko e kakano a ia ke fakatau ai. Kia lali ke ua kaitalofa. Fakaaoga ni e tau tupe kua ha hā ia mua.—Tau Fakatai 21:5; 22:7.

KO E MENA HA MUA KA TAUTE:

  • Ka fai tupe agaia a mua he matahiku he mahina, fifili tokoua e puhala ke fakaaoga ai

  • Ka oti tuai e tau tupe ha mua, taute e tau fakatokaaga pauaki ke fakatote hifo e tau tupe fakamole ha mua. Ma e fakatai, maeke ia mua ke tunu e tau mena kai ha mua ka e ua ō ke kai he fale kai

 2 KIA ATĀINA MO E FAKAMOOLI

PEHĒ E TOHI TAPU: “Kua tauteute e mautolu e tau mena gali [fakamooli] nakai ki mua he Iki hokoia, ka e katoa foki mo mua he tau tagata.” (2 Korinito 8:21) Kia fakamooli ke he hoa haau ke he tupe haau ne moua mo e fakaaoga.

Fakatutala tumau mo e hoa haau ka taute e tau fifiliaga lalahi hagaao ke he tupe ha mua. (Tau Fakatai 13:10) Ko e tutala hagaao ke he tupe ka lagomatai ke fakatumau e mafola he fakamauaga ha mua. Onoono ke he tupe moua haau kua nakai ko e tupe ni haau, ka ko e tupe he magafaoa.—1 Timoteo 5:8.

KO E MENA HA MUA KA TAUTE:

  • Fakatutala ke he fiha e tupe ka atāina a mua ke fakaaoga takitokotaha

  • Ua fakatali ke tupu e lekua to tutala hagaao ke he tupe