Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA 3

Puhala ke Fehagai mo e Tau Lekua

Puhala ke Fehagai mo e Tau Lekua

“Ke moua e mutolu e fakaalofa lahi ko e taha kia taha, ha ko e fakaalofa ke ufiufi ai e tau hala loga.”—1 Peteru 4:8

He kamata a koe mo e hoa haau ke nonofo fakalataha, to ha hā ai e tau lekua kehekehe. Liga tupu mai ai ha ko e tau manatu, tau logonaaga, mo e tau onoonoaga kehekehe ha mua ke he moui. Po ke puna mai he tau mena i fafo he fakamauaga mo e tau mena tutupu fakaofo.

Maeke ke kamatamata ke fakaheu e tau lekua, ka kua tomatoma he Tohi Tapu a tautolu ke fehagai mo e tau lekua ha tautolu. (Mataio 5:23, 24) To moua e koe e tau puhala kua mua e mitaki ke fehagai mo e tau lekua haau he fakagahua e tau matapatu fakaakoaga he Tohi Tapu.

 1 FAKATUTALA KE HE LEKUA

PEHĒ E TOHI TAPU: “Ko e mena mo e hana ni a . . . vaha ke vagahau ai.” (Fakamatalaaga 3:1, 7) Kia eketaha ke fai magaaho ke tutala hagaao ke he lekua. Talahau fakamooli ke he hoa haau e tau logonaaga mo e tau manatu haau ke he matakupu. Kia “vagahau fakamoli” tumau ke he hoa haau. (Efeso 4:25) Pete ka hogohogomanava a koe, totoko e kamatamata ke tau. Ko e tali fakatotoka kua maeke ke taofi e fakatutalaaga ke nakai hoko ke he taufetoko.—Tau Fakatai 15:4; 26:20.

Ka nakai fetaliaaki a mua, fakatumau e mafola, ua nimo ke fakakite e fakaalofa mo e fakalilifu ke he hoa haau. (Kolose 4:6) Lali ke taute fakamafiti e lekua, ti ua fakamamutu e matutakiaga.—Efeso 4:26.

KO E MENA HAAU KA TAUTE:

  • Fakatoka e magaaho kua hagahaga mitaki ke fakatutala ke he lekua

  • Ka hoko e magaaho haau ke fanogonogo, totoko e kamatamata ke tutala foki. To hoko e magaaho haau ke tutala

 2 FANOGONOGO MO E MAAMA

PEHĒ E TOHI TAPU: “Kia fakafeheleaki ke he feofanaki he tau matakainaga; kia takitokotaha mo e mua ke tuku atu e lilifu ke he falu.” (Roma 12:10) Kua aoga lahi e puhala ne fanogonogo a koe. Lali ke maama e manatu he hoa haau mo e ‘kia feofanaki, mahani totonu’ mo e fakatokolalo. (1 Peteru 3:8; Iakopo 1:19) Ua fanogonogo fakavai. Ka maeke, toka e mena haau hane taute mo e fanogonogo katoatoa ke he hoa haau, po ke ole ki a ia ko e maeke nakai ke fakatutala ai he taha mogo i mua. Ka manamanatu a koe ke he hoa haau ko e kapitiga uho, nakai ko e fī, to nakai “fakatepetepe hāu a loto ke ita.”—Fakamatalaaga 7:9.

KO E MENA HAAU KA TAUTE:

  • Fakatumau ke fanogonogo katoatoa, pete ka nakai fiafia a koe ke he tau mena kua logona

  • Fanogonogo ke he kakano kua talahau e tau kupu. Mailoga e fōliga mo e tau aga he leo he hoa haau

3 KIA FAKAGAHUA AI

PEHĒ E TOHI TAPU: “Kua fai mena kua moua ai ke he tau gahua oti; ka ko e vagahau he tau laugutu, kua fakahiku ia ke he nofogati hokoia.” (Tau Fakatai 14:23) Nakai koenaia ke talia ke he puhala mitaki ke fehagai ke he lekua. Kua lata ni ke fakagahua e fifiliaga ne taute tokoua e mua. To liga putoia ai e gahua mo e lali fakalahi, ka e to aoga ai. (Tau Fakatai 10:4) Ka gahua tokoua a mua, to “ha ha ia [mua] e taui mitaki” ma e gahua lahi ha mua.—Fakamatalaaga 4:9.

KO E MENA HAAU KA TAUTE:

  • Fifili ke he tau lakaaga aoga ka igatia a mua mo e taute ke fehagai mo e lekua

  • Fakakia tumau e holoaga he matafekau ia ha mua