Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA 5

Puhala ke Fakatumau e Mafola mo e Tau Magafaoa ha Mua

Puhala ke Fakatumau e Mafola mo e Tau Magafaoa ha Mua

“Kia fakatapulu a mutolu ke he . . . mahani totonu, mo e loto holoilalo, mo e mahani molu, mo e fakauka.”—Kolose 3:12

Ko e fakamauaga ko e kamataaga he magafaoa foou. Pete to fakaalofa mo e fakalilifu tumau a koe ke he tau matua haau, ko e hoa haau ko e tagata kua mua e aoga ki a koe mogonei he lalolagi. Liga uka e mena nei ma e falu he tau magafaoa haau ke talia. Ka e maeke e tau matapatu fakaakoaga he Tohi Tapu ke lagomatai a koe ke lagotatai mitaki, ti mafola tumau a koe mo e tau magafaoa haau he gahua lahi a koe ke atihake e fakafetuiaga mo e magafaoa foou haau.

 1 FAKATUMAU E ONOONOAGA TONU KE HE TAU MAGAFAOA HAAU

PEHĒ E TOHI TAPU: “Kia fakalilifu a koe ke he hau a matua tane, mo e hau a matua fifine.” (Efeso 6:2) Pete ni e tau tau he moui haau, kua lata ia koe ke fakalilifu tumau ke he tau matua haau. Mailoga ko e hoa haau, ko e tama taane po ke tama fifine foki, ti kua lata ke manamanatu ke he tau matua haana. “Nakai mahekeheke e fakaalofa,” ti ua tupetupe ha ko e fakafetuiaga he hoa haau mo e tau matua haana.—1 Korinito 13:4; Kalatia 5:26.

KO E MENA HAAU KA TAUTE:

  • Kalo mai he tau talahauaga tuga e “Fakama tumau he magafaoa haau au” po ke “Nakai fakaai e matua fifine haau ke fiafia ke he tau mena haaku ne taute”

  • Lali ke maama e tau manatu he hoa haau

 2 KIA MAUOKAFUA KA LATA AI

PEHĒ E TOHI TAPU: “Ko e mena ia ke toka ai he tane hana matua tane mo e hana matua fifine, ka e pipiki ke he hana hoana; ti eke ai a laua mo tino taha.” (Kenese 2:24) Ka mau a koe, liga manatu e tau matua haau kua leveki agaia e laua a koe, ti liga manako ke fai vala lahi he fakamauaga haau ke he mena kua lata ki ai.

Ko e matagahua haau mo e hoa haau ke fakatokatoka e tau fakakaupāaga ma e tau mamatua ti fakailoa age e mena ia mo e fakaalofa. Maeke a koe ke tutala fakamooli mo e fakahako ka e nakai fakahukia. (Tau Fakatai 15:1) To lagomatai a mua he mahani fakatokolalo, mahani molū, mo e fakauka ke atihake e fakafetuiaga mafanatia mo e tau magafaoa ha mua ti matutaki ke “fakamanavalahi . . . ko e taha ke he taha mo e fakaalofa.”—Efeso 4:2.

KO E MENA HAAU KA TAUTE:

  • Ka tupetupe a koe ha kua putoia lahi e tau magafaoa he moui ha mua, fakatutala ai mo e hoa haau he magaaho mitaki

  • Kia talia tokoua ke he puhala ke fehagai ki ai