Skip to content

Skip to table of contents

Tau Fakamoli a Iehova

Fifili e vagahau Faka-Niue

Ko e Tohi Mai he Kau Fakatufono

Ko e Tohi Mai he Kau Fakatufono

Ke he matakainaga fakahele:

He iloa e koe, laulahi he Tohi Tapu kua hagaao ke he tau tagata. Tokologa e tau taane mo e tau fifine tua fakamooli ne kua fehagai mo e tau paleko ne tatai mo e ha tautolu. Kua ha hā ia lautolu e tau logonaaga “tuga na tautolu.” (Iakopo 5:17) Falu ne pehia he tau lekua mo e tau fakaatukehe. Falu ne fakahukia lahi he tau magafaoa po ke falu a matakainaga. Mo e falu foki ne fakaatukehe lahi ha ko e tau agahala ne taute e lautolu.

Kua toka katoatoa kia e lautolu a Iehova? Nakai. Tokologa ne liogi tuga e tagata ne tohia e tau kupu nei: “Ne fano kehe au tuga ne mamoe hehe; kia kumi mai e koe hāu a fekafekau; ha kua nakai nimo ia au hāu a tau poaki.” (Salamo 119:176) Maeke nakai a koe ke maama e tau manatu ia?

Nakai nimo e Iehova e tau tagata tapuaki haana ne kua ō kehe fakahaga mai he lotopa. Ka kua eketaha a ia ke lagomatai a lautolu​—taute ai puhala he tau matakainaga talitonu ha lautolu. Ma e fakatai, manamanatu la ke he puhala ne lagomatai e Iehova e fekafekau haana ko Iopu, ne lauia he tau matematekelea loga​—putoia e galo he tau koloa, mamate e tau fakahele mo e lauia he gagao kelea lahi. Ne lata foki a Iopu ke fakauka he tau kupu fakahukia mai ia lautolu ne lata ke lagomatai a ia. Ka e nakai fuluhi kehe a ia mai ia Iehova, pete he fai magaaho ne hehē e manamanatuaga haana. (Iopu 1:22; 2:10) Lagomatai fēfē e Iehova a Iopu ke liu moua e lagotatai mitaki haana?

Taha puhala ne lagomatai e Iehova a Iopu ne moua mai he matakainaga talitonu ko Elihu. Magaaho ne talahau e Iopu haana tau manatu, ne fanogonogo a Elihu ti omoomoi a ia ke vagahau. Ko e heigoa haana ka talahau? To ekefakakelea kia e ia a Iopu po ke fakalagalaga a ia he fakafuafuakelea po ke fakamā? Onoono kia a Elihu kua tokoluga hake a ia ki a Iopu? Nakai pihia! Omoomoi ai he agaaga he Atua, ne pehē a Elihu: “Kua tatai a taua mo koe ki mua he Atua, Ko au foki ne eke aki au he kelekele.” Ti fakamafana e ia a Iopu: “Nakai fakamatakutaku ai a koe ke he haku a tau mena ke matakutaku ai; nakai mamafa foki haku a kavega ki luga hau.” (Iopu 33:6, 7) He nakai lafi atu e Elihu ha mena ke au atu e fakaatukehe a Iopu, ne foaki age e ia e fakatonuaga mo e fakamafanaaga fakaalofa kua latatonu mo Iopu.

Fakamolemole, mailoga ko e aga ia foki ni ne tohi ai e mautolu e porosua nei. Fakamua ne fanogonogo a mautolu, ti manamanatu fakamitaki ke he tau tutūaga mo e tau talahauaga ha lautolu ne kua tafea kehe. (Tau Fakatai 18:13) Ti fuluhi a mautolu ke he tau kupu mai he Tohi Tapu, liogi mo e kumikumi e tau talahauaga ke he puhala ne lagomatai e Iehova e haana a tau fekafekau he vahā kua mole he fehagai a lautolu mo e tau tutūaga pihia. Fakahiku ai, ne tuku fakalataha e mautolu e tau talahauaga mai he Tohi Tapu mo e tau mena tutupu he vahā nei ke taute aki e porosua nei. Uiina mafanatia e mautolu a koe ke totou e tohi nei. Fakamolemole kia mauokafua kua fakaalofa mooli a mautolu ki a koe.

Kau Fakatufono he Tau Fakamoli a Iehova