Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TAHA

“To Kumi Foki e Au a Ia ne Galo”

“To Kumi Foki e Au a Ia ne Galo”

Kua galo e mamoe. He kai motie a ia he fonua, ne vevehe kehe a ia mai he falu mamoe. Mogonei kua nakai kitia e ia e fuifui po ke leveki mamoe. Kua teitei ke pouli. Ne galo ai he pahua ne ō viko ai e tau manu favale ti nakai fai lagomatai e mamoe. Fakahiku ai, ne logona he mamoe e leo fa mahani​—ko e haana leveki, ne poi atu ke he mamoe, lagaki hake a ia ki luga, afī aki e haana tapulu, ti lukuluku mo e uta ki kaina.

LAGALOGA ne fakatai e Iehova a ia ni ke he leveki mamoe pihia. He haana Kupu, ne fakamafana mai e ia a tautolu: “Ko au, ko au ni, to kumi e au haku a tau mamoe, to kumi fakamakutu ni e au a lautolu.”​—Esekielu 34:11, 12.

“Ko e Fuifui Mamoe ne Fagai e Au”

Ko hai e tau mamoe ha Iehova? Ko e tau mamoe ha Iehova ko e tau tagata ne fakaalofa mo e tapuaki ki a ia. Pehē e Tohi Tapu: “Kia hufeilo a tautolu, mo e tukutukuhifo; kia fakatokotui a tautolu ki mua a Iehova ko ia ne eke a tautolu. Ha ko e Atua ha tautolu ni a ia; ko tautolu foki ko e motu ne fagai e ia, mo e fuifui mamoe he hana lima.” (Salamo 95:6, 7) Tuga e tau mamoe ne mumuitua ke he leveki mamoe, ko lautolu ne tapuaki ki a Iehova kua makai ke mumuitua ke he ha lautolu a Leveki Mamoe. Mitaki katoatoa kia a lautolu? Nakai. He falu magaaho ko e tau fekafekau he Atua ne tuga e “tau mamoe ne fakamavehevehe,” “tau mamoe . . . ne galo,” mo e “ne hehe a mutolu po ke tau mamoe.” (Esekielu 34:12; Mataio 15:24; 1 Peteru 2: 25) Pete foki ka tafea kehe e tagata, nakai tiaki e Iehova a ia ka e amanaki ni ke liu mai ki a ia.

Logona agaia nakai e koe ko Iehova ko e Leveki Mamoe haau? Puhala fe kua fakakite e Iehova ko e Leveki Mamoe a ia he vahā nei? Manamanatu ke he tolu e puhala:

Fagai fakaagaaga e Ia a tautolu. “To fagai ai e au a lautolu ke he tau mena ne tutupu mitaki ai e motie,” he talahau e Iehova. “To tatakoto ai a lautolu ke he lotopa mitaki, ko e mena ne toka ai e vao mui to kai a lautolu.” (Esekielu 34:14) Nakai kaumahala a Iehova ke foaki mai ki a tautolu e tau mena kai fakaagaaga kehekehe he magaaho tonu. Manatu nakai e koe e taha vala tala, lauga, po ke vitiō ne tali e liogi haau ke moua e lagomatai? Mauokafua nakai a koe mogoia na leveki fakamitaki e Iehova a koe?

Puipui mo e lagomatai e Ia a tautolu. Mavehe mai e Iehova: “To liu aki mai e au a ia ne vega kehe, to pipi e au a ia ne mafatifati, to fakamalolo e au a ia ne lolelole.” (Esekielu 34:16) Fakamalolō e Iehova a lautolu ne lolelole po ke pehia he tau fakaatukehe. Ne pipi e ia e haana tau mamoe ka pakia, mo e lagomatai ke fakamaulu a lautolu​—pihia ni ka fakahukia he tau matakainaga talitonu. Ti liuaki mai e ia a lautolu kua hehe mo e liga taufetului ha ko e tau logonaaga kelea.

Omoomoi a Ia ke leveki a tautolu. “Laveaki e au a lautolu mai he tau mena oti ne fakamavehevehe atu ki ai a lautolu,” he talahau e Iehova. “To kumi foki e au a ia ne galo.” (Esekielu 34:12, 16) Ki a Iehova, ko e mamoe ne galo kua maeke agaia ke liu mai. Iloa e ia ka galo e mamoe, to kumi e ia e mamoe ia, ti fiafia lahi ka moua ai e ia. (Mataio 18:12-14) Kua ui e ia e tau tagata tapuaki mooli haana “ko e fuifui mamoe haku, ko e fuifui mamoe ne fagai e au.” (Esekielu 34:31) Ko koe taha he tau mamoe ia.

Ki a Iehova, ko e mamoe ne galo kua maeke agaia ke liu mai. Kua fiafia lahi a ia ka moua e mamoe ia

“Kia Fakafou e Koe ha Mautolu a Tau Aho ke Tuga he Vaha ne Aho Mua”

Kumi he ha e Iehova a koe mo e uiina a koe ke liu mai ki a ia? Ha kua manako a ia ke fiafia a koe. Mavehe mai e ia “to ha i ai e tau uha ke monuina ai” haana tau mamoe. (Esekielu 34:26) Nakai ko e maveheaga noa ni a ia. Fitā he kitia e koe e fakamooliaga ke he moui haau.

Liu ke manatu e tau mena ne tupu he iloa e koe a Iehova. Ma e fakatai, fēfē e logonaaga haau he fakaako fakamua e koe e tau kupu mooli ofoofogia ke he higoa he Atua mo e haana finagalo ma e tau tagata? Manatu nakai e koe e fiafia he fakalataha mo e tau matakainaga Kerisiano he tau toloaga mo e tau fonoaga? He magaaho ne tala age e koe e tala mitaki ke he tagata ne fiafia mooli, liu nakai a koe ki kaina mo e olioli mo e hohoko e manava?

Maeke ia koe ke liu moua e tau monuina ia. “Iehova na e, kia fakaliliu e koe a mautolu kia koe,” ne liogi he tau fekafekau he Atua i tuai “ti liliu ai ni a mautolu; kia fakafou e koe ha mautolu a tau aho ke tuga he vaha ne aho mua.” (Tagi Aue 5:21) Tali e Iehova e liogi ia, ti liliu mai haana tau tagata ke fekafekau ki a ia mo e liu fiafia. (Nehemia 8:17) To taute pihia foki e Iehova ma haau.

Ka ko e liu mai ki a Iehova kua mukamuka he talahau ka e uka ke taute. Manamanatu ke he falu paleko he liu mai mo e puhala ke kautū a koe ki ai.