Skip to content

Skip to table of contents

Tau Fakamoli a Iehova

Fifili e vagahau Faka-Niue

 FAKAAKOAGA 4

Puhala ke Ako e Koe Hagaao ke he Atua

Puhala ke Ako e Koe Hagaao ke he Atua

Ako e koe hagaao ki a Iehova he totou e Tohi Tapu. He vaha i tuai na fifili he Atua falu tagata ke tohi hifo e tau manatu hana. Ko e tau tohi ia ne higoa ko e Tohi Tapu. He vaha nei kua ako e tautolu hagaao ke he Atua he totou e Tohi Tapu. Ha kua toka i loto he Tohi Tapu e kupu po ke fekau ha Iehova, ne higoa ai foki ko e Kupu he Atua. Talitonu a tautolu ke he mena ne talahau he Tohi Tapu ha kua nakai pikopiko a Iehova. “Kua nakai maeke ke pikopiko ai e Atua.” (Heperu 6:18) Toka i loto he Kupu he Atua e kupu moli.—Ioane 17:17.

Ko e Tohi Tapu taha mena fakaalofa uho ue atu he Atua ki a tautolu. Kua tuga e tohi he matua tane fakaalofa ke he hana fanau. Kua talahau ai ki a tautolu hagaao ke he maveheaga he Atua ke fakafou e lalolagi mo matakavi homo ue atu ke nonofo ai—ko e parataiso. Kua talahau ai ki a tautolu e mena ne taute e ia i tuai, mena fa e taute e ia mogonei, mo e mena ka taute e ia he vaha anoiha ma e fanau tua fakamoli hana. Kua lagomatai foki a tautolu ke fakamafola ha tautolu a tau mena vihi mo e ke moua e fiafia.—2 Timoteo 3:16, 17.

 Ko e Tau Fakamoli a Iehova e tau kapitiga he Atua; to lagomatai e lautolu a koe ke maama e mena kua fakaako he Tohi Tapu. Tala age noa ni ki a lautolu kua manako a koe ke fakaako e Tohi Tapu. Nakai fai totogi tupe a lautolu ma e mena nei. (Mataio 10:8) Lafi ki ai, maeke ia koe ke fina atu ke he tau feleveiaaga Kerisiano. Fakahoko e tau mena nei he tau matakavi tapuakiaga ne higoa ko e tau Fale he Kautu. Ka fina atu a koe ke he tau feleveiaaga Kerisiano, to tupu mafiti a koe ke he iloilo hau he Atua.

Ako a koe hagaao ke he Atua mai he tau mena ne eke e ia. Ma e fakatai, kua talahau he Tohi Tapu: “Ne eke he Atua e lagi mo e lalolagi.” (Kenese 1:1) Magaaho ne tufuga e Iehova “e lagi,” ne taute e ia e la. Ko e heigoa a ia mogonei ne talahau ki a tautolu hagaao ke he Atua? Kua talahau ki a tautolu ha ha ia Iehova e malolo lahi. Ko ia hokoia kua maeke ke taute taha mena kua malolo lahi mahaki tuga e la. Kua talahau foki ki a tautolu kua pulotu a Iehova, ha kua lata ni ke pulotu he taute e la, ne kua foaki e vevela mo e maama mo e nakai otioti ai.

Fakakite he tau tufugatia ha Iehova kua fakaalofa a ia ki a tautolu. Manamanatu ke he tau faga fua lakau kehekehe oti kua ha ha ke he lalolagi. Nukua maeke ia Iehova ke foaki taha ni e faga fua lakau ma tautolu—po ke ai fai. Ka kua foaki mai e Iehova ki a tautolu loga e faga fua lakau ti kehekehe mahaki e tau pakapaka, lalahi, lanu, mo e tau humelie. Kua fakakite he mena nei ko Iehova ko e Atua kua nakai ni fakaalofa ka e lahi foki e fakamokoi mo e manamanatu, mo e totonu.—Salamo 104:24.