Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA 6

Malolo Moumou—“Ko Iehova ko e Toa a Ia”

Malolo Moumou—“Ko Iehova ko e Toa a Ia”

1-3. (a) Ko e heigoa e mena ne fehagai e tau Isaraela ki ai he tau lima he tau Aikupito? (e) Tau fefe a Iehova ma e tau tagata hana?

KUA nakai fai hala e tau Isaraela he vahaloto he tau mouga mo e tahi ke fehola. Ko e kau Aikupito, ko e matakau kelipopo tagata, ne tutuli mo e manako lahi ke fakaotioti a lautolu. * Pete ni a ia, ne fakamalolo e Mose e tau tagata he Atua ke nakai fakalolelole. “To tau a Iehova ma mutolu,” he fakamafana age e ia ki a lautolu.Esoto 14:14.

2 Pete foki he pihia, ne hea a Mose ki a Iehova, ti tali age e Atua: “Ko e ha ne tagi mai ai a koe kia au? . . . Kia nikiti ki luga hau a tokotoko, mo e fakaolo atu hau a lima ki luga he tahi, mo e vevehe ua ai e koe.” (Esoto 14:15, 16) Kia manamanatu la ke he mena ia kua tupu. Ne poaki agataha e Iehova e agelu hana, ti holo e aolagi fakatupou ki tua he tau Isaraela, liga fofola tuga e kaupa mo e pa ai e tau Aikupito neke feoho mai. (Esoto 14:19, 20; Salamo 105:39) Ne fakaolo atu e Mose hana lima. He omoi he matagi malolo, ne veveheua ai e tahi. Ke he taha puhala ni ne tuli mo e tutu hake e tau vai tuga e tau kaupa, ke hafagi e hala ke o ai e motu katoa!Esoto 14:21; 15:8.

3 He fehagaoaki mo e malolo ue atu nei, kua lata tuai a Farao ke poaki e tau kautau hana ke liliu. Ka e kehe, ne poaki e Farao fakaikaluga ke mumui atu ke tau. (Esoto 14:23) Ne fakamafiti atu e tau Aikupito ki loto he tahi, ka kua fuluhi e tau ha lautolu ke he miha he kamata e tau hui he tau kariota ha lautolu ke mokulu. He hao atu agataha e tau Isaraela ke he taha fahi, ne  poaki age a Iehova ki a Mose: “Kia fakaolo hau a lima ki luga he tahi, kia liu mai e puke tahi ki luga he tau tagata Aikupito, ki luga hana tau kariota, katoa mo e hana tau kau heke solofanua.” Ne malolo hifo mai e tau kaupa vai, ti ufitia ai a Farao mo e tau kau hana!Esoto 14:24-28; Salamo 136:15.

He Tahi Kula, ne eke moli a Iehova “ko e toa a ia”

4. (a) Kua kitia moli fefe a Iehova ke he Tahi Kula? (e) Liga fefe e tali he falu ke he fakakiteaga nei ha Iehova?

4 Ko e fakahaoaga he motu ha Isaraela he Tahi Kula ko e mena aoga lahi he magahala ia ne fakafehagai e Atua mo e tau tagata. I ai ne fakamoli e Iehova “ko e toa a ia.” (Esoto 15:3) Ka e fefe, mogoia, e logonaaga hau ke he fakakiteaga nei ha Iehova? Ke talahau fakamoli, nukua tamai he felakutaki e mamahi mo e matematekelea lahi ke he tau tagata. Kua pihia kia ha ko e puhala ne fakaaoga he Atua e malolo moumou, kua tuga ni ke fakalolelole ka e nakai fakalagalaga a koe ke fakatata ki a ia?

Felakutaki Faka-Atua mo e Tau Felakutaki he Tagata

5, 6. (a) Ko e ha ne kua lata ke ui e Atua ko “Iehova Sapaota”? (e) Kehe fefe e felakutaki faka-Atua mai he felakutaki he tagata?

5 Kua teitei laga tolu e teau i loto he tau Tohiaga Tapu Heperu mo e laga ua i loto he tau Tohiaga Tapu Heleni Kerisiano, ne foaki ke he Atua e mataulu “Iehova Sapaota.” (1 Samuela 1:11) Ko e Pule Katoatoa, ne poaki e Iehova e kau mahaki he tau agelu. (Iosua 5:13-15; 1 Tau Patuiki 22:19) Ko e hufiaaga moumou he kau nei kua ofogia lahi. (Isaia 37:36) Ko e moumouaga he tau tagata kua nakai mitaki ke manamanatu ki ai. Pete he pihia, kua lata ia tautolu ke manatu kua nakai tatai e tau felakutaki he Atua ke he tau felakutaki teao he tau tagata. Liga to lali e tau takitaki kau mo e fakapolitika ke talahau e tau manatu mitaki ke he ha lautolu a fakafualoto. Ka ko e felakutaki he tagata kua putoia tumau ai e lotokai mo e fulukovi.

 6 Ke he taha fahi, kua nakai fakaohooho he loto manamanatu pouli a Iehova. Ne talahau he Teutaronome 32:4: ‘Ko e Maka tumau a ia, kua katoatoa ni e mitaki hana gahua; ha kua fakafili tonu hana tau puhala oti ni? ko e Atua kua fakamoli, nakai ha ha ia ia ha nakai fakafili tonu, ko e mahani tututonu mo e mahani hakohako ni a ia.’ Kua fakatikai he Kupu he Atua e ita, kaka, mo e favale nakai tautaofi. (Kenese 49:7; Salamo 11:5) Ti kua nakai taute e Iehova ha mena mo e nakai fai kakano. Ne fakaaoga fakatekiteki e ia hana malolo moumou mo e fakaaoga mo mena ke fakamui aki. Kua tuga ne talahau e ia he puhala he perofeta hana ko Esekielu: “Kua pehe mai e Iki ko Iehova, Kua fiafia kia au ka mate e tagata mahani kelea? kua nakai kia fiafia au ka liu kehe a ia mo e hana tau mahani ke moui ai a ia.”Esekielu 18:23.

7, 8. (a) Ko e heigoa ne talahau hehe e Iopu hagaao ke he matematekelea hana? (e) Fakahako fefe e Elihu e manamanatuaga ha Iopu ke he mena nei? (i) Ko e heigoa ka ako e tautolu mai he mena ne tupu ki a Iopu?

7 Ka ko e ha, mogoia, ne fakaaoga e Iehova e malolo moumou? Fakamua to tali, kia manatu e tautolu e tagata tututonu ko Iopu. Ne paleko e Satani a Iopu—po ke, ha tagata ni—to fakatumau nakai e loto fakamoli hana i lalo he kamatamata. Ne tali e Iehova e paleko ia he fakaata a Satani ke kamatamata e loto fakamoli ha Iopu. Ko e fua, ne matematekelea a Iopu ke he gagao, galo e tau koloa, mo e galo e fanau. (Iopu 1:1–2:8) He nakai iloa e tau matakupu ne putoia ai, ne talahau hehe e Iopu ko e matematekelea hana ko e fakahala nakai tonuhia mai he Atua. Ne huhu a ia ke he Atua ko e ha ne taute e Ia a ia mo “fakamailoga,” ko e “fi.”Iopu 7:20; 13:24.

8 Ko e tagata tane fuata ko Elihu ne fakakite e hepe he manamanatuaga ha Iopu, he talahau: “Ne pehe mai a koe, Kua mua haku a tututonu ke he tututonu he Atua.” (Iopu 35:2) E, kua nakai pulotu ke manatu kua mitaki e mena ne iloa e tautolu ke he Atua po ke manatu kua nakai tonu a ia. “Kia mamao mo e Atua ke mahani kelea ai a ia, mo Ia hana e malolo oti kana ke mahani hepehepe a ia,” he fakapuloa e Elihu. Ne talahau  fakamui e ia: “Ka ko Ia hana e malolo oti kana, nakai ni maeke kia tautolu ke iloa a ia; kua mua ue atu hana malolo; kua pihia foki a ia he fakafili [tonu], kua homo atu foki hana tututonu, to nakai fakamamahi ai e ia.” (Iopu 34:10; 36:22, 23; 37:23) Kua iloa moli e tautolu ko e magaaho ka tau e Atua, kua ha ha ia ia e kakano mitaki ke taute ai. He tokaloto e mena ia, kia kumi atu a tautolu ke he falu kakano ne taute he Atua he mafola e matagahua he toa.1 Korinito 14:33.

Kakano ne Fakaohooho e Atua he Mafola ke Tau

9. Ko e ha ne tau e Atua he mafola?

9 He mole e fakaheke ke he Atua “ko e toa a ia,” ne talahau e Mose: “Iehova na e, ko hai kia e taha he tau atua ke tuga na koe? Ko hai kia taha ke tuga na koe, kua lilifu to tapu?” (Esoto 15:11) Ne tohia pihia foki he perofeta ko Hapakuka: “Kua mua he mea e tau fofoga hau, nakai fia kitekite a koe ke he mahani kelea, nakai maeke foki kia koe ke kitekite ke he mahani hepehepe.” (Hapakuka 1:13) Pete ko Iehova ko e Atua he fakaalofa, ko ia foki ko e Atua tapu, tututonu, mo e fakafifili tonu. He falu magaaho, ne fakaohooho he tau fua pihia a ia ke fakaaoga e malolo moumou hana. (Isaia 59:15-19; Luka 18:7) Ti kua nakai fakailaila he Atua hana tapu he magaaho ka tau a ia. Ka kua tau a ia he kakano kua tapu a ia.Esoto 39:30.

10. (a) He magaaho fe mo e puhala fe ne tupu fakamua e falanaki lahi ke he Atua ke tau? (e) Ko e puhala fe ni ka uta kehe e faitaua ne talahau tuai ia Kenese 3:15, mo e heigoa e aoga ke he tau tagata tututonu?

10 Manamanatu ke he tuaga ne tupu he mole e fakafualoto he hoa fakamua, ko Atamu mo Eva, ke he Atua. (Kenese 3:1-6) Ane mai fakauka a ia ke he nakai tututonu ha laua, to fakalolelole ni e Iehova hana tuaga ko e Pule Katoatoa he Lagi mo e Lalolagi. Ka ko e Atua tututonu, nukua fakaohooho a ia ke fakahala a laua ke he mate. (Roma 6:23) He perofetaaga fakamua he Tohi Tapu, ne talahau tuai e ia to ha ha ai e faitaua he vahaloto he tau fekafekau ni hana mo e tau tutaki he “gata,” ko Satani. (Fakakiteaga 12:9; Kenese 3:15) Ka e fakahiku ni, ko e faitaua nei to uta kehe ni he taholi a Satani. (Roma 16:20) Ka ko e fakafiliaga ia to fua mai e tau monuina loga ma e tau tagata tututonu, he  utakehe e tau fakaohoohoaga ha Satani he lalolagi mo e hafagi e puhala ke he parataiso he lalolagi katoa. (Mataio 19:28) Ato hoko e magaaho ia, ko lautolu he fahi ha Satani to taute e fakamatakutaku hololoa ke he malolo fakatino mo e fakaagaga he tau tagata he Atua. Ka e he falu magaaho, kua lalago mai a Iehova.

Gahua e Atua ke Utakehe e Mahani Kelea

11. Ko e ha ne fakaohooho e Atua ke tamai e fakapuke ke he lalolagi katoa?

11 Ko e Fakapuke he vaha ha Noa e mena ne tupu ha ko e lalagoaga pihia. Ne talahau he Kenese 6:11, 12: “Ne kelea ni e lalolagi ki mua he Atua; ti puke ni e lalolagi ke he favale. Kua kitekite e Atua ke he lalolagi, kitiala, kua kelea tuai, ha ko e tau tagata oti kana kua kelea ia lautolu ni ha lautolu a mahani ke he lalolagi.” To fakaata kia he Atua e tau tagata kelea ke fakaotioti e vala fakahiku he mahani mitaki ne toe he lalolagi? Nakai. Kua fakaohooho a Iehova ke tamai e fakapuke ke he lalolagi katoa ke utakehe mai he lalolagi a lautolu ne fakahihiga atu ni ke he holifono mo e mahani feuaki.

12. (a) Ko e heigoa ne talahau tuai e Iehova hagaao ke he “tega,” ha Aperahamo? (e) Ko e ha kua lata e tau Amori ke fakamahaikava?

12 Kua tatai ai ke he fakafiliaga he Atua ke he tau Kanana. Ne fakakite mai e Iehova, ko Aperahamo ka hau ai e “tega,” ka moua ai he tau magafaoa oti he lalolagi e monuina. Ke fakatatai mo e finagalo ia, ne poaki he Atua to foaki ke he fanau ha Aperahamo e motu ko Kanana, ko e motu ne nonofo ai e tau tagata ne ui ko e tau Amori. Maeke fefe mogoia e Atua ke eke ke fifili tonu he vega e tau tagata nei mai he motu ha lautolu? Ne talahau tuai e Iehova ko e vega nei to nakai hoko mai ato 400 e tau tau—ka “katoatoa e tau hala he tau tagata Amori.” * (Kenese 12:1-3; 13:14, 15; 15:13, 16; 22:18, fakatatai NW.) He magahala he magaaho ia, ne kelea muikau e mahani kolokolovao  he tau Amori. Ati eke a Kanana mo motu tapuaki tupua, fakamaligi toto, mo e taute e tau mahani fakalialia he fakatane mo e fifine. (Esoto 23:24; 34:12, 13; Numera 33:52) Ko e tau tagata he motu ne kelipopo foki e tau tama he poa afi. To fakatapakupaku kia he Atua tapu e tau tagata hana ke he tau mahani kelea pihia? Nakai! Ne fakapuloa e ia: “Ti kelea ai foki e motu; ti taui atu ai e au e tau mahani hepehepe ha i ai; ti fakalua atu ai he motu a lautolu kua nonofo ai.” (Levitika 18:21-25) Ka kua nakai amanaki a Iehova ti kelipopo noa e tau tagata. Ha kua fakahao e tau Kanana ne kotofa ke moui, tuga a Raava mo e tau Kipeona.Iosua 6:25; 9:3-27.

Tau ke Lata mo e Higoa Hana

13, 14. (a) Ko e ha kua fakaohooho a Iehova ke fakatapu hana higoa? (e) Fakamea fefe e Iehova e higoa hana he holitu?

13 Ha kua tapu a Iehova, ti tapu e higoa hana. (Levitika 22:32) Ne fakaako e Iesu e tau tutaki hana ke liogi: “Kia tapu hau a higoa.” (Mataio 6:9) Ne holitu he fakafualoto i Etena e higoa he Atua, he huhu toko e talahaua mitaki mo e puhala pule he Atua. To nakai tokanoa e Iehova ha pikopiko mo e fakafualoto pihia. Nukua fakaohooho a ia ke fakamea e higoa hana he holitu.Isaia 48:11.

14 Liu la manamanatu foki ke he tau Isaraela. He eke a lautolu mo tau tupa i Aikupito, ko e maveheaga he Atua ki a Aperahamo ko e puhala he tega hana ka monuina ai e tau magafaoa oti he lalolagi, kua tuga ke kaumahala. Ka e he laveaki mo e fakatu a lautolu ko e motu, ne fakamea e Iehova e higoa hana he holitu. Ati liu talahau he perofeta ko Tanielu he liogi hana: “Ko e Iki na e, ha mautolu a Atua, ne ta mai e motu hau mo e lima malolo mai he motu ko Aikupito, kua moua ai foki e koe e fakahekeaga.”Tanielu 9:15.

15. Ko e ha ne laveaki e Iehova e tau Iutaia mai he fakapaea i Papelonia?

15 Ka e mailoga la, ko e puhala nei ni ne liogi ai a Tanielu he magaaho ne falanaki lahi e tau Iutaia ki a Iehova ke liu gahuahua foki ma e higoa Hana. Ko e tau Iutaia liuliu ne uta fakapaea a lautolu, he magaaho nei ki Papelonia. Ko e maga  lahi ha lautolu, ko Ierusalema, kua malamalaega. Iloa e Tanielu ka liuaki e tau Iutaia ke he motu ha lautolu to fakatokoluga e higoa ha Iehova. Ati liogi a Tanielu: “Ko e Iki na e, kia fakamagalo mai. Ko e Iki na e, kia haga mai a a koe, mo e eke ai ni e koe; aua neke mule mai a koe, ha ko koe ni, haku Atua na e, ha kua fakahigoa ai ke he hau a higoa e maga hau mo e motu hau.”Tanielu 9:18, 19.

Tau ke Lata mo e Tau Tagata Hana

16. Fakamaama e kakano ne manako a Iehova ke puipui hana higoa kua nakai pehe a ia ko e nakai fai logonaaga mo e fulukovi a ia.

16 Kua kakano kia e manako ha Iehova ke puipui hana higoa kua nakai fai logonaaga mo e fulukovi a ia? Nakai, ka e he gahuahua fakatatau atu ke he tapu hana mo e fiafia ke he fakafili tonu, ne puipui e ia e tau tagata hana. Manamanatu ke he Kenese veveheaga 14. I ai ne totou a tautolu ke he tau patuiki tau ne fa, ko lautolu ne kaiha e nefiu ha Aperahamo ko Lota, katoa mo e magafaoa ha Lota. Mo e lagomatai he Atua, ne kautu a Aperahamo he tau ke he tau kau malolo lalahi! Ko e talahauaga ia he kautu kua tuga ni ko e fakamauaga fakamua i loto “he tohi he tau tau ha Iehova,” kua tuga foki e tohi ne tohia ai falu he tau matagahua tau ne nakai fakamau i loto he Tohi Tapu. (Numera 21:14) Kua loga atu foki e tau kautuaga ne mumui mai.

17. Ko e heigoa ne fakakite na tau a Iehova ma e tau Isaraela he mole e huhu atu a lautolu ke he motu ha Kanana? Talahau e tau fakafifitakiaga.

17 Nakai leva ato huhu atu e tau Isaraela ke he motu ko Kanana, ne fakamoli age a Mose ki a lautolu: “Ko Iehova ko e ha mutolu a Atua ko ia kua mua atu kia mutolu, to tau a ia ma mutolu, tuga ne tau mena oti ne eke ai e ia ma mutolu i Aikupito.” (Teutaronome 1:30; 20:1) Kamata ai mo e hukui ha Mose, ko Iosua, mo e fakaholo atu ke he vaha he tau Iki Fakafili mo e tau pule he tau patuiki tua fakamoli ha Iuta, ne tau a Iehova ma e tau tagata hana, he toka a lautolu ke kautu tumau ke he tau fi ha lautolu.Iosua 10:1-14; Tau Fakafili 4:12-17; 2 Samuela 5:17-21.

18. (a) Ko e ha kua fakaaue a tautolu he nakai hiki a Iehova? (e) Ko e heigoa ka tupu he magaaho ka hokotia e faitaua ne fakamaama he Kenese 3:15 ke he tapunu hana?

 18 Kua nakai hiki a Iehova; po kua hiki e finagalo hana ke taute e palaneta nei mo parataiso mafola. (Kenese 1:27, 28) Kua vihiatia agaia he Atua e mahani kelea. He magaaho taha ia ni, kua fakahelehele e ia e tau tagata hana ti nakai leva to gahuahua a ia ma lautolu. (Salamo 11:7) Ka ko e faitaua ne fakamaama he Kenese 3:15 kua amanaki ke hokotia ke he hikiaga ofogia mo e favale i mua ne tata mai. Ke fakatapu hana higoa mo e puipui e tau tagata hana, to liu agataha a Iehova ke eke “ko e toa a ia”!Sakaria 14:3; Fakakiteaga 16:14, 16.

19. (a) Fakakite ko e ha e fakaaogaaga he Atua he malolo moumou hana kua lata ke fakatata a tautolu ki a ia? (e) Ko e heigoa e lauiaaga he fakamakai he Atua ke tau kua lata ke ha ha ia tautolu?

19 Manamanatu ke he fakataiaga: Fakalata kua kunu he manu vale e magafaoa he tagata tane ati tau atu e tagata ki ai mo e tamate e manu favale. To amanaki nakai a koe ke fakafualoto e hoana mo e fanau hana ha ko e mena ne taute? Nakai pihia, to amanaki a koe ki a lautolu ke omoomoi he fakaalofa nakai fulukovi hana ma lautolu. Ke he puhala pihia foki, kua nakai lata a tautolu ke fakafualoto he fakaaoga he Atua e malolo moumou hana. Ko e fakamakai hana ke tau ke puipui a tautolu kua lata ke  fakatolomaki e fakaalofa ha tautolu ki a ia. Ko e fakalilifu ha tautolu ma e malolo nakai fakakaupa hana kua lata ke hokulo foki. Ko e mena ia, kua lata ke “fekafekau ai a tautolu ke he Atua mo e fakafiafia kia ia, mo e maimaina, mo e matakutaku.”Heperu 12:28.

Fakatata Atu ke he “Toa”

20. He magaaho ka totou e tautolu e tau fakamauaga he Tohi Tapu ke he felakutaki faka-Atua ne liga nakai maama katoatoa e tautolu, ko e heigoa kua lata ia tautolu ke taute, mo e ko e ha?

20 Moli, kua nakai fakamaama takitaha he Tohi Tapu e tau matafeiga oti he tau fifiliaga ha Iehova ne hagaao ke he felakutaki faka-Atua. Ka ke he mena nei, kua lata tumau ke iloa moli e tautolu: kua nakai lagataha a Iehova ke fakahoko mai e malolo moumou he puhala nakai tonu, nakai fakaalofa, po ke he puhala vale. Fa mahani he falu magaaho, he manamanatu ke he tau tala he fakamauaga he Tohi Tapu po ke falu iloaaga tuai ka lagomatai a tautolu ke manamanatu fakamitaki ki ai. (Tau Fakatai 18:13) Pete ni ka nakai iloa katoa e tautolu e tala, ka e he fakaako fakalahi atu hagaao ki a Iehova mo e manamanatu fakahokulo ke he tau fua uho hana ka lagomatai a tautolu ke utakehe ha fakauaua ka mafuta hake. He magaaho ka taute e tautolu e mena nei, ne kitia ai e tautolu kua ha ha ia tautolu e kakano lahi ke falanaki ke he Atua ha tautolu, ko Iehova.Iopu 34:12.

21. Pete “ko e toa a ia” he falu magaaho, ka e tuga e heigoa e loto ha Iehova?

21 Pete ko Iehova “ko e toa a ia” he magaaho kua lata ai, kua nakai pehe e mena nei ko e manako lahi a ia ke tau. He fakakiteaga ha Esekielu ke he kariota he lagi, ne fakakite a Iehova ke tauteute ke tau ke he tau fi hana. Pete ia, kua kitia e Esekielu e Atua ne viko takai he tagaloa—ko e fakamailoga he mafola. (Kenese 9:13; Esekielu 1:28; Fakakiteaga 4:3) Maali ai, kua totoka mo e loto mafola a Iehova. “Ko e Atua ko e fakaalofa a ia,” he tohia he aposetolo ko Ioane. (1 Ioane 4:8) Ko e tau fua oti ha Iehova kua lautatai mo e mitaki katoatoa. Ko e monuina ha ia ha tautolu, mogoia, ke maeke ke fakatata ke he Atua malolo ue atu mo e fakaalofa!

^ para. 1 Hagaao ke he tagata fakamauaga tala tuai Iutaia ko Josephus, ko e tau Heperu kua “tutuli he 600 kariota fakalataha mo e 50,000 he tau kautau hekenua mo e 200,000 he tau kautau o hui.”—Jewish Antiquities, II, 324 [xv, 3].

^ para. 12 Kitia maali ai, ko e talahauaga “tau tagata Amori” he mena nei kua putoia ai e tau tagata oti i Kanana.Teutaronome 1:6-8, 19-21, 27; Iosua 24:15, 18.