Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA 28

‘Ko Koe Tokotaha Kua Fakamoli’

‘Ko Koe Tokotaha Kua Fakamoli’

1, 2. Ko e ha kua talahau ai kua nakai kehe e nakai mahani fakamoli ke he Patuiki ko Tavita?

KUA nakai kehe e nakai mahani fakamoli ke he Patuiki ko Tavita. He taha magaaho ne fakahagahaga kelea ai e pule hohoha hana ha ko e lagatau kelea, mo e tau tagata ni he hana motu ne pulega fakakelea ki a ia. Mua atu, ne afo ni he falu ne falanaki a Tavita ki ai ke eke mo tau kapitiga tata lahi hana. Mailoga a Mekala, ko e hoana fakamua ha Tavita. Fakamua, ne ‘fakaalofa a ia kia Tavita,’ ti nakai fakauaua ne lalago foki e ia a Tavita ke he tau matagahua fakapatuiki hana. Ka e, fakamui ne “fakavihia e ia a ia ke he hana loto,” mo e fakatatai foki a Tavita ke ‘tuga e tau tagata matahavala.’1 Samuela 18:20; 2 Samuela 6:16, 20.

2 Ti ha ha ai e tagata fakatonutonu ni ha Tavita, ko Aitofele. Nukua tokoluga e tau fakatonuaga hana ke tuga ko e tau kupu mai ni ia Iehova. (2 Samuela 16:23) Ka e, fai magaaho, ne eke a ia ko e afokau ti fakalataha atu ke he fakafualoto pauaki ki a Tavita. Ti ko hai e takitaki he fakafualoto ia? Ko Apisaloma, ko e tama tane ni ha Tavita! Ko e tagata pulega ia ke fai tuaga ‘ne liliu kehe e tau loto he tau tagata Isaraela,’ he taute ne ia a ia ke eke mo patuiki totoko. Kua malolo lahi e fakafualoto ha Apisaloma ati hola ai e Patuiki ko Tavita ma e moui hana.2 Samuela 15:1-6, 12-17.

3. Ko e heigoa e mauokafua ne ha ha ia Tavita?

3 Nakai kia fai tagata ne fakamoli tumau ki a Tavita? He magahala he matematekelea hana, ne iloa moli e Tavita to fai. Ko hai? Nakai fai foki ka ko Iehova ko e Atua. “Kua mahani fakamoli a koe kia ia kua fakamoli,” he talahau e Tavita ki a Iehova. (2 Samuela 22:26, NW) Ko e heigoa e mahani fakamoli, mo e foaki fefe e Iehova e fakafifitakiaga tokoluganea he fua nei?

Ko e Heigoa e Mahani Fakamoli?

4, 5. (a) Ko e heigoa e “mahani fakamoli”? (e) Kehe fefe e mahani fakamoli mai he tua fakamoli?

4 Ko e “mahani fakamoli” tuga ne fakaaoga he tau Tohiaga  Tapu Heperu ko e mahani totonu ne fakapiki fakaalofa atu ke he taha mena mo e nakai fakatoka ato mailoga e matagahua hagaao ke he mena ia. Kua mua atu e mena ne putoia ki ai mai he tua fakamoli. Ha ko e mena na liga tua fakamoli e tagata ha ko e matagahua. Ke he taha fahi, nukua hokulo e mahani fakamoli ke he fakaalofa. * Taha mena foki, ko e kupu “tua fakamoli” kua maeke ke hagaao ke he tau mena nakai moui. Ke fakatai ki ai, ne ui he salamo e mahina ko e “talahau ha he lagi kua [“tua fakamoli,” NW]” ha kua kitia tumau ai he tau po. (Salamo 89:37) Ka kua nakai maeke e mahina ke talahau kua fakamoli. Ko e ha? Ha ko e mahani fakamoli ko e fakakiteaga he fakaalofa—ko e mena nakai maeke he tau mena nakai moui ke fakatata.

Kua ui e mahina ko e talahau tua fakamoli, ka ko e tau mena momoui lotomatala hokoia ni kua maeke moli ke fakaata e mahani fakamoli ha Iehova

5 He hana kakano faka-Tohiaga Tapu, nukua mafanatia e mahani fakamoli. Ne talahau he hana fakakiteaga lahi kua ha ha ai e fakafetuiaga he vahaloto he tagata ne fakatata e fua mo ia ne fakatata ki ai. Ko e mahani fakamoli pihia kua nakai fehikitaki. Kua nakai tuga e tau peau he tahi ne fepokaki he hikihiki he tau fafati matagi. Ke he taha fahi, ko e mahani fakamoli po ke fakaalofa fakamoli, kua tu mauokafua mo e malolo ke kautu atu ke he tau fakaalaia kelea lahi.

6. (a) Temotemoai fefe e mahani fakamoli ke he tau tagata, mo e fakakite fefe e mena nei i loto he Tohi Tapu? (e) Ko e heigoa e puhala mitaki lahi ke ako ko e heigoa ne putoia ke he mahani fakamoli, mo e ko e ha?

 6 Moli, kua temotemoai e mahani fakamoli pihia he vaha nei. Ka kua kitia mau, nukua ‘fakahiku mo e matematekelea ai’ e tau kapitiga tata. Holo foki ki mua, kua logona e tautolu e tau hoa mau ne tiaki e tau hoa ha lautolu. (Tau Fakatai 18:24; Malaki 2:14-16) Kua holofa lahi e tau gahua fakavai ti liga fakataogo ni e tautolu e tau kupu he perofeta ko Mika: “Kua malaia a ia ne [“fakamoli,” NW] mai he motu.” (Mika 7:2) Pete kua fa kaumahala e tau tagata ke fakakite e fakaalofa-totonu, ne fakakite fakamaaliali he mahani fakamoli a Iehova. Ka ko e puhala mitaki lahi ke iloa ko e heigoa ne putoia ke he mahani fakamoli ke kumikumi ke he puhala ne fakatata e Iehova e vala nei kua mua he fakaalofa.

Mahani Fakamoli Nakai Fai Fakatataiaga ha Iehova

7, 8. Kua maeke fefe ke talahau ko Iehova tokotaha kua fakamoli?

7 Ne talahau he Tohi Tapu hagaao ki a Iehova: “Ko koe tokotaha kua fakamoli.” (Fakakiteaga 15:4, NW) Maeke fefe e mena ia? Nakai kia fakatata he tau tagata mo e tau agelu he falu magaaho e mahani fakamoli mitaki lahi? (Iopu 1:1; Fakakiteaga 4:8) Ka e kua a Iesu Keriso? Nakai kia ko e “iki fakamoli,” he Atua a ia? (Salamo 16:10, NW) Ti, maeke fefe mogoia, ke talahau ko Iehova tokotaha kua fakamoli?

8 Ke fakamuaaki, kia manatu ko e mahani fakamoli ko e vala he fakaalofa. Ha ko e “Atua ko e fakaalofa a ia”—ko ia ko e fakataiaga lahi he fua nei—ko hai mogoia kua maeke ke fakatata katoatoa e mahani fakamoli ke mua atu ki a Iehova? (1 Ioane 4:8) Moli, liga fakaata he tau agelu mo e tau tagata e tau mahani he Atua, ka ko Iehova tokotaha ne fakamoli ke he tuaga mua ue atu. Ha ko ‘Ia i Tuai Hana Tau Aho,’ nukua leva he fakatata e ia e fakaalofa-totonu ke he ha mena moui, he lalolagi po ke he lagi. (Tanielu 7:9) Ti, ko Iehova ko e fakafifitakiaga mua ue atu he mahani fakamoli. Ne fakatata e ia e fua nei ke he puhala ne nakai fakaai he ha mena moui ke fakatatai. Kikite ke he falu a fakafifitakiaga.

9. Maeke fefe a Iehova ke “fakamoli ke he tau gahua oti kana hana”?

 9 Ko Iehova kua “fakamoli ke he tau gahua oti kana hana.” (Salamo 145:17, NW) Ke he puhala fe? Ne foaki he Salamo 136 (NW) e tali. Kua loga e tau gahua fakamoui ha Iehova ne tohi hifo, fakalataha mo e laveakiaga fakalagalaga he tau Isaraela ke he Tahi Kula. Mua atu ai, nukua takitaha e kupu he salamo nei ne peehi aki e alaga kupu: “Ha ko e mena tukulagi ni hana fakaalofa-totonu [po ke, mahani fakamoli].” Kua putoia e salamo nei ke he Tau Huhu ke Manamanatu Fakahokulo Ki Ai he lau tohi 289. He totou e koe e tau kupu ia, kua nava lahi a koe ke he tau puhala loga ne fakatata e Iehova e fakaalofa-totonu ke he tau tagata hana. E, ne fakatata e Iehova e mahani fakamoli ke he tau fekafekau mahani fakamoli hana he fakateliga ke he tau tagi lagomatai ha lautolu mo e he gahuahua ke he magaaho kotofa. (Salamo 34:6) Ko e fakaalofa fakamoli ha Iehova ma e tau fekafekau hana kua nakai maueue kaeke ni ke tumau a lautolu ke fakamoli ki a ia.

10. Fakatata fefe e Iehova e mahani fakamoli hagaao ke he tau tutuaga hana?

10 Ke lafi ki ai, ne fakatata e Iehova e mahani fakamoli ke he tau fekafekau hana he fakamoli tumau ke he tau tutuaga hana. Nakai tuga e falu tagata fa hikihiki mau, he takitaki he tau manatu fakalutukia, kua nakai fakauaua a Iehova ke he onoonoaga hana ke he mena hako mo e mena hepe. He magahala he tau meleniamu, ko e onoonoaga hana ke he tau mena pihia tuga e fakataulatua, tapuaki tupua, mo e kelipopo kua nakai hiki. “Ke hoko ni ke he vaha ke motua ai, ko au ni a ia,” he talahau e ia he puhala he hana perofeta ko Isaia. (Isaia 46:4) Ko e mena ia, kua lata ia tautolu ke mauokafua to moua e tautolu e aoga he mumuitua ke he takitakiaga maaliali he mahani ne ha i loto he Kupu he Atua.Isaia 48:17-19.

11. Talahau e tau fakafifitakiaga ke fakakite na tua fakamoli a Iehova ke he kupu ne mavehe hana.

11 Ne fakakite foki e Iehova e mahani fakamoli he tua fakamoli tumau ke he kupu ne mavehe hana. Ka talahau tuai e ia taha mena, na to fakamoli ai. Ati talahau ai e Iehova: “To pihia ni haku a kupu kua fina atu ai he gutu haku, nakai liu noa mai  a ia kia au; ka to eke ni e mena kua loto au ki ai, to monuina foki ia ke he mena ne fakafano atu ai e au.” (Isaia 55:11) He tua fakamoli tumau ke he kupu hana, ne fakakite e Iehova e mahani fakamoli ke he tau tagata hana. Ne nakai toka e ia a lautolu ke fakatali fakamakutu atu ke he taha mena ne nakai manako a ia ke fakamoli. Nukua tavana e mahani ha Iehova hagaao ke he mena nei ati maeke e fekafekau hana ko Iosua ke talahau: “Nakai to ha kupu taha he tau kupu mitaki oti ne vagahau mai ai e Iehova ke he magafaoa a Isaraela; kua hoko oti ni.” (Iosua 21:45) Kua maeke ia tautolu ke mauokafua, mogoia, ha ko e mena to nakai takitaki atu a tautolu ke fakahahaku ha ko e falu kaumahala he fahi ha Iehova ke fakamoli e tau maveheaga hana.Isaia 49:23; Roma 5:5.

12, 13. Ko e heigoa e tau puhala ne kua “tukulagi” e fakaalofa-totonu ha Iehova?

12 Tuga ne kitia fakamua, ne talamai he Tohi Tapu ki a tautolu kua “tukulagi” e fakaalofa-totonu ha Iehova. (Salamo 136:1, NW) Taute fefe e mena nei? Ma e taha mena, nukua tumau e fakamagaloaga ha Iehova ke he tau agahala. Tuga ne tutala ki ai he Veveheaga 26, ne nakai manatu e Iehova e tau hepehepe he vaha kua mole ne kua fita he fakamagalo ai e tagata. Ha kua “hala e tau tagata oti kana, to nakai hoko ke he fakahekeaga mai he Atua,” kua lata ia tautolu takitokotaha ke fakaaueina ha kua tukulagi e fakaalofa-totonu ha Iehova.Roma 3:23.

13 Ka ko e fakaalofa-totonu ha Iehova kua tukulagi ai ke he taha kakano foki. Ne talahau he Kupu hana ko lautolu ne tututonu “[to eke] mo e akau kua to ke he tapa he tau vai lele, to fua mai ke he hana tau fua ke he tau ni hana; to nakai mokulu foki hana tau lau, to monuina foki a ia ke he tau mena oti kana ke eke e ia.” (Salamo 1:3) Manatu la ke he akau tupuolaola lahi ne nakai fifigo hana tau lau! Ti, pihia foki, kaeke fiafia moli a tautolu ke he Kupu he Atua, ko e tau momoui ha tautolu to hololoa, mafola, mo e fua mitaki. Ko e tau monuina ne foaki fakamoli e Iehova ke he tau fekafekau tua fakamoli hana kua tukulagi. Moli ai, he lalolagi fou tututonu ka tamai e Iehova, to mailoga he tau tagata omaoma e fakaalofa-totonu hana ke he tukulagi.Fakakiteaga 21:3, 4.

 ‘To Nakai Toka e Iehova a Lautolu ne Fakamoli’

14. Fakakite fefe e Iehova e fakaaueina ma e mahani fakamoli he tau fekafekau hana?

14 Nukua fakatata tumau e Iehova e mahani fakamoli hana. Ha kua fakatumau katoatoa a Iehova, ko e mahani fakamoli ne fakakite e ia ke he tau fekafekau tua fakamoli hana kua nakai fakateaga. Ne tohia he salamo: “Ne fuata au, ka kua motua tuai au ainei; ka e nakai kitia e au ha tagata tututonu kua tiaki, po ke hana fanau kua ole mena kai. Ha ko Iehova ko e ofania he fakafili tonu, ti to nakai toka e ia a lautolu ne fakamoli.” (Salamo 37:25, 28, NW) Moli, ko e Tufuga, kua latatonu a Iehova ma e tapuakiaga ha tautolu. (Fakakiteaga 4:11) Pete ia, ha kua fakamoli a ia, ne tokiofa e Iehova e tau gahua tua fakamoli ha tautolu.Malaki 3:16, 17.

15. Fakamaama ko e fakakite fefe he tau fehagaiaga ha Iehova mo Isaraela e mahani fakamoli Hana?

15 He fakaalofa-totonu hana, ne liu lagomatai e Iehova e tau tagata hana he magaaho ka fakaatukehe a lautolu. Ne talamai he salamo ki a tautolu: “Kua leoleo e ia e tau agaga he hana tau tagata [“fakamoli,” NW], kua laveaki e ia a lautolu mai he tau lima he tau tagata mahani kelea.” (Salamo 97:10) Manamanatu ke he tau fehagaiaga hana mo e motu ko Isaraela. He mole e laveakiaga fakamana ha lautolu mai he Tahi Kula, ne fakapuloa he tau Isaraela he lologo ki a Iehova: “Ko e hau a fakaalofa-totonu [po ke, “fakaalofa fakamoli,” matahuitala] kua takitaki e tau tagata ne fakamoui e koe.” (Esoto 15:13, NW) Ko e laveakiaga he Tahi Kula ko e gahua moli he fakaalofa fakamoli he fahi ha Iehova. Ati tala age ai e Mose ke he tau Isaraela: “Nakai manako a Iehova kia mutolu mo e fifili ai a mutolu ha kua mua a mutolu ke he tau motu he tokologa; ha ko e mena mua he tokogaogao a mutolu ke he tau motu oti kana. Ka ko e fakaalofa ni a Iehova ki a mutolu, mo e hana taofi foki ke he omonuo ne omonuo ai a ia ke he ha mutolu a tau matua, kua ta mai ai e Iehova a mutolu mo e lima malolo, ne laveaki foki e ia a koe mai he lima a Farao ko e patuiki a Aikupito, ne nofo fakatupa ai a koe.”Teutaronome 7:7, 8.

16, 17. (a) Ko e heigoa e kaumahala ofogia he fakaaueina ne nakai fakatata he tau Isaraela, ka e fakakite fefe e Iehova e fakaalofa hofihofi noa ki a lautolu? (e) Fakakite fefe he laulahi he tau Isaraela kua “nakai maeke ke fakamalolo ai a lautolu,” mo e heigoa e fakafifitakiaga hataki ne foaki he mena nei ma tautolu?

 16 Haia, ne kaumahala ai e motu a Isaraela ke fakatata e fakaaueina ma e fakaalofa-totonu ha Iehova, ha ko e mole e laveakiaga ha lautolu ne “au atu ni he hala a lautolu kia [Iehova], he fakafualoto a lautolu kia ia ne Mua ue atu.” (Salamo 78:17) Mai he tau senetenari loga, ne fakafualoto mo e liu fakafualoto a lautolu, he tiaki a Iehova mo e fuluhi ke he tau atua fakavai mo e tau gahua pouliuli ne nakai tamai ha mena ka ko e fakalialia hokoia. Pete ia, ne nakai moumou e Iehova hana maveheaga. Ka e he puhala he perofeta ko Ieremia, ne ole a Iehova ke he tau tagata hana: “Isaraela na e, ko mutolu ne liliu kehe, kia liliu mai a ti nakai kitekite atu au mo e ita kia mutolu; ha ko au kua [“fakamoli,” NW] ni au.” (Ieremia 3:12) Ka e tuga ne kitia he Veveheaga 25, kua nakai omoomoi e laulahi he tau Isaraela. Moli, ne “fakafiufiu e lautolu kia lautolu ne fakafano mai he Atua, mo e fakavihia e lautolu hana tau kupu, mo e va a lautolu ke he hana tau perofeta.” Ko e heigoa e fua? Fakahiku, “ti tupu ai e ita a Iehova ke he hana motu, ato nakai maeke ke fakamalolo ai a lautolu.”2 Nofoaga he Tau Patuiki 36:15, 16.

17 Ko e heigoa ne ako e tautolu mai he mena nei? Ko e mahani fakamoli ha Iehova kua nakai ni matapouli po ke nakai fakavaia. Moli, kua “lahi e fakaalofa-totonu” ha Iehova, mo e fiafia a ia ke fakakite e fakaalofa noa ka ha ha ai e fakaveaga ke fakakite ai. Ka e ko e heigoa ne tupu he magaaho ne eke e tagata taute hehe ke hufia lahi he mahani kelea? Ke he mena pihia, ne pipiki na Iehova ke he tau tutuaga tututonu hana mo e foaki e fakafiliaga kelea muitui. Tuga ne talahau e Mose, to “nakai toka noa e [Iehova] a lautolu mai he fakahala.”Esoto 34:6, 7.

18, 19. (a) Puhala fe ne eke e fakahalaaga ha Iehova ma lautolu ne mahani kelea ko e gahua he mahani fakamoli? (e) Ko e heigoa e puhala ka fakatata e Iehova hana mahani fakamoli ke he tau fekafekau hana ne favale ki ai ke hoko ke he mate?

18 Ko e fakahalaaga he Atua ke he tau tagata mahani kelea ko e gahua foki a ia he mahani fakamoli. Fefe? Taha e fakakiteaga  ne moua he tohi a Fakakiteaga ke he tau poakiaga ne foaki e Iehova ke he tau agelu ne fitu: “Ati o a mutolu mo e liligi atu e tau kapiniu he ita he Atua ke he lalolagi.” He liligi he agelu ke tolu aki e kapiniu hana “ke he tau vailele mo e tau vaipuna,” ne faliu toto ai e tau vaipuna. Ti tala age e agelu ki a Iehova: “Ko e Iki na e, kua tututonu a koe, ko koe kua moui ni, ne moui tuai, [“kua fakamoli a Koe,” NW] ha kua fakahala pihia e koe. Ha kua fakamaligi e lautolu e toto he tau tagata tapu mo e tau perofeta, kua age foki e koe kia lautolu e toto ke inu ai; ha ko e mena lata ia ma lautolu.”Fakakiteaga 16:1-6.

To manatu fakamoli mo e liu fakatutu mai e Iehova a lautolu ne fakamoli ke hoko ke he mate

19 Mailoga la, he lotouho he fakahokoaga he ogo he fakafiliaga ia, ne hagaao e agelu ki a Iehova ‘ko e fakamoli a Koe.’ Ko e ha? Kakano he fakaotioti a lautolu ne mahani kelea, ne fakatata e Iehova e mahani fakamoli ke he tau fekafekau hana, tokologa ne favale ki ai ke hoko ke he mate. He fakamoli, ne fakamoui e Iehova a lautolu ia ke he manamanatuaga hana. Ne manako lahi a ia ke liu kitia foki a lautolu nei kua tua fakamoli ne galo, mo e fakamoli he Tohi Tapu ko e finagalo hana ke palepale a lautolu aki e liu tu mai. (Iopu 14:14, 15) Ne nakai nimo e Iehova e tau fekafekau fakamoli hana ha kua nakai momoui a lautolu. Ke he taha fahi a ia, “ha ko e mena kua momoui oti ia ia.” (Luka 20:37, 38) Ko e finagalo ha Iehova ke liu fakamomoui  a lautolu he manamanatuaga hana ko e fakamoliaga malolo lahi he mahani fakamoli hana.

Ko Bernard Luimes (hema) mo Wolfgang Kusserow (uho) ne tamate he tau Nasi

Ne hohoka mate he matakau fakapolitika aki e tao a Moses Nyamussua (matau)

Ne Hafagi he Fakaalofa Fakamoli ha Iehova e Puhala ke he Fakamouiaga

20. Ko hai e “tau kapiniu he fakaalofa noa,” mo e fakakite fefe e Iehova e mahani fakamoli ki a lautolu?

20 Tali mai he fakamauaga tuai, nukua fakakite e Iehova e mahani fakamoli mitaki lahi ke he tau tagata tua fakamoli hana. Ti ke he tau afe tau, nukua “fakamanavalahi [a Iehova] ke he tau kapiniu he ita kua fakalata ke malaia.” Ko e ha? “Ke fakailoa mai foki e lahi ue atu he hana lilifu ke he tau kapiniu he fakaalofa [“noa,” NW] ne taute tuai e ia ke hoko ke he monuina.” (Roma 9:22, 23) Ko e “tau kapiniu he fakaalofa noa” nei ko lautolu ne fakauku he agaga tapu hana ke eke mo tau hakega fakalataha mo Keriso he Kautu hana. (Mataio 19:28) He hafagi e hala he fakamouiaga ma e tau kapiniu nei he fakaalofa noa, ne fakamoli tumau  a Iehova ki a Aperahamo, ne taute ki ai e maveheaga he fakamoliaga nei: “Ko e hau a [“tega,” NW] foki ke monuina ai e tau motu oti kana he lalolagi; ha kua fanogonogo a koe ke he haku tau kupu.”Kenese 22:18.

Ha ko e mahani fakamoli ha Iehova, kua ha he tau fekafekau tua fakamoli e amaamanakiaga mitaki lahi ma e vaha anoiha

21. (a) Fakakite fefe e Iehova e mahani fakamoli ke he “moto tagata tokologa” ne ha ha ai e amaamanakiaga ke hao mai he “matematekelea lahi”? (e) Ko e heigoa ne omoi he mahani fakamoli ha Iehova a koe ke taute?

21 Ne fakakite e Iehova e mahani fakamoli pihia ni ke he “moto tagata tokologa” ne ha ha ai e amaamanakiaga ke hao mai he “matematekelea lahi” mo e moui tukulagi he lalolagi parataiso. (Fakakiteaga 7:9, 10, 14) Pete he nakai mitaki katoatoa e tau fekafekau hana, ne foaki fakamoli e Iehova ki a lautolu e magaaho ke moui tukulagi he lalolagi parataiso. Taute fefe e ia? He kakano he lukutoto—ko e fakatataaga mua ue atu he mahani fakamoli ha Iehova. (Ioane 3:16; Roma 5:8) Kua futia he mahani fakamoli ha Iehova a lautolu, he ha lalu tau loto, ne hoge ma e tututonu. (Ieremia 31:3) Nakai kia logona hifo e koe e tata lahi atu ki a Iehova ma e mahani fakamoli hokulo ne fakakite e ia mo e to fakakite foki? Ha ko e manako ha tautolu ke futia fakatata atu ke he Atua, kia tali atu a tautolu ke he fakaalofa hana he fakamalolo e fifiliaga ha tautolu ke fekafekau ki a ia mo e mahani fakamoli.

^ para. 4 Fuluola ai, ko e kupu ne fakaliliu “mahani fakamoli” he 2 Samuela 22:26 (NW) nukua fakaliliu ko e “fakaalofa-totonu” po ke “fakaalofa fakamoli” he falu a mena foki.