Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA 7

Uho Nakai e Moui ki a Koe Tuga ke he Atua?

Uho Nakai e Moui ki a Koe Tuga ke he Atua?

“Ha ko e mena ha ha ia koe e puna he moui.”​​—SALAMO 36:9.

1, 2. He vahā nei, ko e heigoa e mena fakaalofa uho mai he Atua, mo e ko e ha?

KUA foaki mai he ha tautolu a Matua he lagi e mena fakaalofa uho lahi​​—ko e moui, ti kua lotomatala e tau tagata ke fifitaki e tau aga haana. (Kenese 1:27) Fakaaue ke he mena fakaalofa uho ia ati maeke ia tautolu ke manamanatu mo e maama e tau matapatu fakaakoaga he Tohi Tapu. He fakagahua ai, maeke ia tautolu ke eke mo tau tagata motua fakaagaaga ne fakaalofa ki a Iehova mo e “kua [fita he] mahani he ako mua ai ke mailoga e tau mena mitaki mo e tau mena kelea.”​​—Heperu 5:14.

2 He vahā nei, kua mua atu e aoga ke maeke ke manamanatu ke he tau matapatu fakaakoaga he Tohi Tapu, ha kua uka lahi e lalolagi ti nakai fai fakatufono ne maeke ke lauia katoatoa e tau tutuaga kehekehe he moui. Fakamaama mai he tau saiene fakaekekafo e manatu nei, mua atu hagaao ke he tau mena mo e tau puhala ne fakaaoga e toto. Kua lata mo e aoga pauaki e mena nei ki a lautolu oti ne manako ke omaoma ki a Iehova. Ti ka maama ia tautolu e tau matapatu fakaakoaga aoga he Tohi Tapu, to maeke ia tautolu ke taute e tau fifiliaga mitaki ka moua e fakatotoka he manamanatuaga ha tautolu mo e fakatumau ke he fakaalofa he Atua. (Tau Fakatai 2:6-11) Manamanatu la ke he falu he tau matapatu fakaakoaga nei.

KUA TAPU E MOUI MO E TOTO

3, 4. Magaaho fe ne tohi fakamua i loto he Tohi Tapu e fakatapuaga he toto, mo e fakavē ke he tau matapatu fakaakoaga fe?

3 Ne fakakite mai fakamua e Iehova e aoga lahi he moui  mo e toto, ti ko e tau mena fakatapu foki a ia, he nakai la leva e tamate e Kaino a Apelu. Ne pehē e Atua ki a Kaino: “Ko e leo he toto he matakainaga hau, kua tagi mai ia kia au mai he kelekele.” (Kenese 4:10) He onoonoaga ha Iehova, kua hukui he toto ha Apelu e moui haana ne kua tamate fakakelea. Ti tuga kua tagi e toto ha Apelu ke he Atua ke moua e tauiaga.​​—Heperu 12:24.

4 He mole e Fakapuke he vahā ia Noa, ne fakaatā he Atua e tau tagata ke kai e kakano he tau manu ka e nakai kai e toto. Talahau he Atua: “Ko e kakano manu ha i ai hana moui, ko e hana toto haia, aua neke kai ai e mutolu. Ko e moli to kumi e au ha mutolu a tau toto he tau moui ha mutolu.” (Kenese 9:4, 5) Ne hagaao e poakiaga nei ke he tau hologa ha Noa ti hoko mai ki a tautolu he vahā nei. Kua liu fakamanatu mai e tau kupu he Atua ki a Kaino​​—ko e moui he tau mena momoui oti kana kua hukui he toto. Fakamooli mai foki he poakiaga ia hagaao ki a Iehova, ko ia ko e Punaaga he moui, to fakahala e ia e tau tagata oti ne nakai fakalilifu e moui mo e toto.​​—Salamo 36:9.

5, 6. Fakakite fēfē he Fakatufono faka-Mose kua tapu mo e uho e toto? (Kikite foki e puha “ Fakalilifu e Moui he Tau Manu.”)

5 Kua fakakite mai he Fakatufono faka-Mose e tau kupu uho lahi nei ne ua. Talahau he Levitika 17:10, 11: “Kaeke ko e tagata . . . kua kai e maga toto, to eke e au e tagata ia ne kai e toto mo fi haku, to vevehe kehe e au e tagata ia mo e hana motu. Ka ko e toto ko e moui he tino haia, kua tuku atu foki e au ia ke eke mo lukutoto ma mutolu ki luga he fatapoa; ha ko e toto ni ke eke mo lukutoto ma e tagata.” *​​—Kikite e puha “ Ko e Malolō he Toto ke Fakamagalo.”

6 Kaeke kua nakai fakaaoga e toto he manu ne tamate ki luga he fatapoa, ne lata ni ke liligi ke he kelekele. Ti ko e moui ne tuga kua liuaki ke he Punaaga. (Teutaronome 12:16)  Ka e mailoga kua nakai fakamakamaka e tau Isaraela ke utakehe e toto ke oti lapalapa mai he kakano he manu. Ka tamate fakamitaki e manu mo e fakatafe e toto, to kai he Isaraela e vala manu ia mo e loto manamanatu mitaki, kua fakakite he mena ia e fakalilifu ki a ia ne Foaki e Moui.

7. Fakakite fēfē e Tavita e fakalilifu ko e mena tapu e toto?

7 Ko Tavita “ko e tagata ke lata mo e haku [Atua] a loto,” ne  maama mooli e tau matapatu fakaakoaga he fakatufono he Atua hagaao ke he toto. (Gahua 13:22) Taha magaaho ne fia inu lahi a ia, ti tokotolu e tagata taane ne o atu ke he heaga api he tau fī ke utu vai mai he vaikeli mo e tamai ki a ia. Ko e heigoa ha Tavita ne taute? “Nakai kia ko e toto hanai, he tau tagata nai, ne o atu a lautolu, mo e tuku lele atu ha lautolu a tau moui?” he hūhū e ia. Ke he onoonoaga ha Tavita, ko e vai kua tuga ni e moui he tau tagata nei haana. Ti pete kua fia inu lahi a ia, ne “liligi atu ai e ia kia Iehova.”​​—2 Samuela 23:15-17.

8, 9. Hiki nakai e onoonoaga he Atua ke he moui mo e toto he magaaho ne fakatū e fakapotopotoaga Kerisiano? Fakamaama.

8 Kavi ke he 2,400 e tau he mole e poakiaga ki a Noa hagaao ke he fakapuke mo e kavi 1,500 e tau he mole e fakatū e Fakatufono, ne omoomoi he agaaga tapu ha Iehova e kau fakatufono he fakapotopotoaga Kerisiano fakamua ke tohi: “Ha ko e mena kua mitaki ke he Agaga Tapu mo mautolu nai, aua neke tuku atu taha kavega kia mutolu, ko e tau mena nai hokoia ke lata; Kia fakamamao a mutolu mo e tau mena kua ekepoa ai ke he tau tupua, mo e toto, mo e tau mena fofota, mo e feuaki.”​​—Gahua 15:28, 29.

9 Maaliali ai, ne iloa he kau fakatufono fakamua atu ko e mena tapu e toto ti ka fakaaoga fakahehē ai kua tatai ni e hepe mo e taute e tapuaki tupua po ke mahani feuaki. Talia foki he tau Kerisiano mooli he vahā nei e mena ia. Ha kua manamanatu a lautolu ke he tau matapatu fakaakoaga he Tohi Tapu, kua maeke ia lautolu ke fakafiafia a Iehova he taute e tau fifiliaga hagaao ke he fakaaoga he toto.

FAKAAOGA FAKAEKEKAFO HE TOTO

Fakamaama fēfē e au ke he ekekafo haaku e fifiliaga haaku ke he fakaaoga he tau vala ikiiki he toto?

10, 11. (a) Fēfē e onoonoaga he Tau Fakamoli a Iehova ke he fagai toto he fakaaoga e toto katoa mo e tau vala toto lalahi? (e) He tau tuaga fe ka liga kehekehe e tau manatu he tau Kerisiano ke he toto?

10 Kua mailoga he Tau Fakamoli a Iehova ko e “fakamamao . . . mo e toto” kua kakano ke nakai talia e fagai toto mo e nakai foaki po ke toka e toto ha lautolu ke fagai aki ni a lautolu. He fakalilifu ke he fakatufono he Atua, ne nakai talia foki  e lautolu e tau vala lalahi ne fā he toto: ko e tau tegatega kula, tegatega tea, platelets, mo e plasma.

11 Ha kua loga e puhala he vahā nei, ko e tau vala fā nei kua vevehe hifo foki ke he tau vala ikiiki ti kehekehe e tau puhala kua fakaaoga ai. Maeke nakai e Kerisiano ke talia e tau vala ikiiki nei he toto? Onoono nakai a ia ke he tau vala ikiiki nei ko e “toto”? Kua fakalago ni ki a tautolu takitokotaha ke taute e fifiliaga ke he mena nei. Pihia foki ni ma e tau puhala fakaekekafo tuga e hemodialysis, hemodilution, mo e cell salvage, ne putoia e toto ha tautolu ne nakai huki ke toka ke fakaaoga he taha magaaho.​​—Kikite e vala tala he Apenetiki “Tau Vala Ikiiki he Toto mo e Tau Puhala ka Iihi.”

12. Ko e puhala fe ka onoono mo e fehagai a tautolu ke he tau tuaga ne putoia e loto manamanatu?

12 Fakateaga nakai a Iehova ke he tau fifiliaga fakatagata ha tautolu? Nakai, ha kua mataala mooli a ia ke he tau manatu  mo e tau manako ha tautolu. (Totou Tau Fakatai 17:3; 24:12.) He oti e liogi mo e kumikumi ke he vai fakaekekafo po ke puhala he tuluiaga, kua lata ni ke muitua ke he ha tautolu a loto manamanatu ne kua fakaako he Tohi Tapu. (Roma 14:2, 22, 23) Ti nakai lata e falu ke taute e fifiliaga ma tautolu po ke hūhū a tautolu, “Ko e heigoa haau ka taute kaeke ko koe he tuaga haaku?” He tau magaaho pihia, kua lata e tau Kerisiano ke igatia mo e “fua hana ni a kavega.” *​​—Kalatia 6:5; Roma 14:12; kikite e puha “ Kua Tapu Nakai e Toto ki a Au?

TAU FAKATUFONO HA IEHOVA NE FAKAATA E FAKAALOFA HAANA KO E MATUA

13. Ko e heigoa e tau fakatufono mo e tau matapatu fakaakoaga ha Iehova ne fakakite hagaao ki a ia? Talahau e fakatai.

13 Ko e tau fakatufono mo e tau matapatu fakaakoaga i loto he Tohi Tapu kua fakakite mai ko Iehova e Punaaga he fakatufono mo e Matua fakaalofa ne leveki mooli e tau fanau haana. (Salamo 19:7-11) Pete kua nakai talahau mo fakavēaga fakaekekafo e poaki ke “fakamamao . . . mo e toto,” ka kua puipui mai a tautolu he tau mena vihi ha ko e fagai toto. (Gahua 15:20) Ti kua tokologa e tau ekekafo ne mailoga ko e iihi ne nakai fakaaoga e toto ko e “tuaga ne mua atu e mitaki” he levekiaga fakaekekafo he vahā nei. Ke he tau Kerisiano mooli, ko e tau puhala foou ia kua fakakite e lotomatala mua ue atu mooli ha Iehova mo e ko e matua fakaalofa a ia.​​—Totou Isaia 55:9; Ioane 14:21, 23.

14, 15. (a) Ko e tau fakatufono fe ne fakakite he Atua e fakaalofa ke he tau tagata haana? (e) Fakaaoga fēfē e koe e tau matapatu fakaakoaga ne lalago e tau fakavēaga nei ke haohao mitaki?

14 Ne kitia e fakaalofa mooli he Atua ke he haana tau tagata i Isaraela i tuai ha ko e haana tau fakatufono loga. Ma e fakatai, ne poaki e ia e tau fale he tau Isaraela ke talaga e pa ke puipui takai e tua fale ke nakai fai pakia, ha ko e mena fakaaoga tumau. (Teutaronome 22:8; 1 Samuela 9:25, 26; Nehemia  8:16; Gahua 10:9) Poaki foki he Atua ke leoleo e tau povi vale. (Esoto 21:28, 29) Ka fakaheu e tau poakiaga nei, ko e fakakite a ia he fakateaga pauaki ke nakai fakalilifu e moui he falu ti liga fakamaligi toto foki.

15 Fakagahua fēfē e koe e tau matapatu fakaakoaga hagaao ke he tau fakatufono nei? Kia manamanatu ke he tuaga he haau a motoka, tau puhala fakaholo haau, tau manu haau, kaina haau, matakavi haau he gahuaaga, mo e fifiliaga haau ke he tau fakafiafiaaga. He falu motu, tokologa e tau fuata ne pakia ti mamate ha ko e fakahanoa. Ka ko e tau fuata kua manako ke fakatumau ke he fakaalofa he Atua, ne tokiofa e moui mo e nakai kumi ke fakafiafia ke he tau feua hagahaga kelea. Nakai manamanatu goagoa a lautolu to nakai fakaai e tau fuata ke pakia. Ka kua fiafia a lautolu he vahā fuata he tuku kehe e tau mena ka fakamamahi.​​—Fakamatalaaga 11:9, 10.

16. Ko e heigoa e matapatu fakaakoaga he Tohi Tapu ne hagaao ke he moumou pauaki e tama ne nakaila fanau? (Kikite foki e matahui tala.)

16 Uho foki ke he Atua e moui he tama ne nakai la fanau ia. I Isaraela i tuai, ka fakapakia he taha tagata e fifine fatu ti mate a ia po ke haana a tama, kua fakahigoa he Atua e tagata ia ko e kelipopo tagata mo e ko ia “to totogi ni e moui ke he moui.” * (Totou Esoto 21:22, 23.) Manamanatu la ke he logonaaga ha Iehova he kitia e loga he tau tama ne nakaila fanau ia ne moumou pauaki po ke fakatōtama he tau tau takitaha, ha ko e ai fia loto tama mo e ke ataina a lautolu ia ke matutaki e tau mahani fakalialia tuga e feuaki.

17. Puhala fe ka fakamafana e koe e taha tagata ne fitā e fakatōtama ato iloa e ia e tau tutuaga he Atua?

17 Ka e kua e fifine ne fitā e fakatōtama ato iloa e ia e kupu mooli he Tohi Tapu? Kakano kia e mena ia kua ai fakaalofa hofihofi noa e Atua ki a ia? Nakai pihia! Ko e tagata ne tokihala mooli kua maeke ke falanaki ke he fakamagaloaga ha  Iehova, ne fakavē ke he toto ha Iesu ne fakamaligi. (Salamo 103:8-14; Efeso 1:7) Mooli ai, ne talahau he Keriso: “Nakai hau au ke ui ke he tau tagata tututonu, ka ko e tau tagata hala, kia tokihala a lautolu.”​​—Luka 5:32.

 KALO KEHE HE VIHIATIA!

18. Fakakite fēfē he Tohi Tapu e tupumaiaga he fakamaligi toto?

18 He nakai fakamamahi ni e falu, kua manako foki a Iehova ke tiaki kehe mai he tau loto ha tautolu e tupumaiaga he fakamaligi toto​​—ko e vihiatia. “Ko lautolu oti kua vihiatia e tau matakainaga ha lautolu, ko e tau tagata kelipopo tagata a lautolu,” he tohi he aposetolo ko Ioane. (1 Ioane 3:15) Ko e tagata ne pihia kua nakai ni vihiatia e haana matakainaga, ka e manako foki ke mate e matakainaga ia. Ko e haana a aga faitaua to liga tupu mai e pikopiko po ke tau tukupau fakakelea, ka pihia mooli a ia to fakafili he Atua a ia. (Levitika 19:16; Teutaronome 19:18-21; Mataio 5:22) Kua aoga mogoia ke eketaha a tautolu ke utakehe mai he tau loto ha tautolu e ha mahani fakafualoto!​​—Iakopo 1:14, 15; 4:1-3.

19. Fēfē e onoonoaga he tagata ne fakavē e moui ke he tau matapatu fakaakoaga he Tohi Tapu tuga he Salamo 11:5 mo e Filipi 4:8, 9?

19 Ko lautolu ne tokiofa e moui tuga a Iehova mo e manako ke fakatumau ke he fakaalofa haana ne kua kalo kehe foki mo e tau aga favale. Pehē e Salamo 11:5: “Kua vihiatia he hana [Iehova] finagalo e tagata . . . kua fiafia ke he favale.” Ko e tau kupu ia kua nakai ko e tau talahauaga noa ni hagaao ke he aga he Atua; ka ko e matapatu fakaakoaga ke takitaki e moui. Kua omoi he mena ia a lautolu ne fakaalofa ke he Atua ke kalo kehe mai he tau fakafiafiaaga ka fakatolomaki atu e favale. Pihia foki, ko e talahauaga ko Iehova ko e “Atua hana e monuina” po ke mafola, kua omoi e tau fekafekau haana ke fakapuke e tau manamanatuaga mo e tau loto aki e tau mena fakaalofa, fulufuluola, mo e nava ki ai, ke moua e monuina po ke mafola.​​—Totou Filipi 4:8, 9.

KIA FAKAMAMAO HE TAU FAKATOKATOKAAGA KUA FAKAMALIGI TOTO

20-22. Fēfē e tuaga he tau Kerisiano ke he lalolagi, mo e ko e ha?

20 Ke he onoonoaga he Atua, ko e lalolagi katoa ha Satani kua puke he fakamaligi toto. Ko e fakatokaaga politika, ne fakatai he Tohi Tapu ke he tau manu favale ne kua kelipopo  e molea e tau miliona tagata, ti putoia foki e tokologa he tau fekafekau a Iehova. (Tanielu 8:3, 4, 20-22; Fakakiteaga 13:1, 2, 7, 8) Kau auloa e tau pule nei ne tuga e tau manu favale, fakalataha mo e tau pisinisi mo e fakasaiene, ke talaga e tau kanavaakau kelea muitui ti moua foki e tau tupe loga. Mooli ai, “ko e lalolagi oti ha he pule hana kua mahani kelea”!​​—1 Ioane 5:19.

21 Ha ko e tau tutaki ha Iesu kua “nakai ko e tau tagata he lalolagi,” ka e tumau ke tu uho ke he tau mena fakapolitika mo e tau felakutaki, ne kalo kehe a lautolu mai he tau fakamaligi toto ke he tagata ni mo e falu. * (Ioane 15:19; 17:16) He fifitaki ke he Keriso, ne nakai taui vale atu a lautolu ka hoko e fakamatematekelea ki a lautolu. Ka e fakakite e lautolu e fakaalofa ke he ha lautolu a tau fi, ti liogi foki ma lautolu.​​—Mataio 5:44; Roma 12:17-21.

22 Mua atu ai, kalo kehe e tau Kerisiano mooli mai ia “Papelonia e maga lahi,” ko e kautu he lotu fakavai ne mua atu e  fakamaligi toto. Pehē e Tohi Tapu: “Kua moua foki ia koe e toto he tau perofeta mo e tau tagata tapu, mo lautolu oti ne kelipopo ke he lalolagi.” Ti kua hataki mai ki a tautolu: “Haku motu na e, ati o kehe ā mutolu ia ia.”​​—Fakakiteaga 17:6; 18:2, 4, 24.

23. Ko e heigoa e kakano ke fehola kehe mai i Papelonia Lahi?

23 Ka tiaki a Papelonia Lahi, kua nakai ni ko e utakehe mai e higoa he lotu ka e fai mena foki. Putoia ai e fakavihia he tau mahani fakalialia ne talia he lotu fakavai po ke lalago ki ai​​—tuga e feuaki, fakalataha ke he tau mena fakapolitika, mo e lotokai he tutuli ke moua e tau koloa loga. (Totou Salamo 97:10; Fakakiteaga 18:7, 9, 11-17) Takitaki tumau e tau gahua nei ke fakamaligi toto!

24, 25. (a) Fakavē ke he heigoa e fakaalofa hofihofi noa he Atua ke he tagata ne tokihala he fakamaligi toto? (e) Ko e heigoa e fakatokaaga he vahā Tohi Tapu ne fakamanatu mai he mena nei ki a tautolu?

24 Ato iloa e tapuakiaga mooli, kua igatia a tautolu mo e fai vala he lalago ke he lalolagi ha Satani ti putoia he fakamaligi toto. Ka ko e mogonei, kua hiki ha tautolu a tau mahani, feaki e tua ke he poa lukutoto he Keriso, mo e tukulele ha tautolu a tau momoui ke he Atua, ti kua moua e tautolu e fakaalofa hofihofi noa mo e puipui fakaagaaga he Atua. (Gahua 3:19) Ko e puipuiaga ia ne fakamanatu ki a tautolu e tau maaga he huaga he vahā Tohi Tapu.​​—Numera 35:11-15; Teutaronome 21:1-9.

25 Fakagahua fēfē e fakatokaaga ia? Ka fakapakia totamaki he taha tagata Isaraela e taha ti mate a ia, kua lata a ia ke hola ke he taha he tau maaga he huaga. He mole e fifiliaga he tau patu ne kotofa ke he mena ne tupu, ko ia ne fakapakia totamaki ti mate e taha, kua lata ke nofo he maaga he huaga ato mate e ekepoa ne mua. Ti kua ataina a ia ke nofo he ha matakavi foki. Ko e fakafifitakiaga mitaki lahi a ia he fakaalofa hofihofi noa he Atua he puhala ne tokiofa e ia e moui he tagata! He tuga e tau maaga he huaga i tuai, ko e fakaalofa he Atua ne fakavē ke he poa lukutoto ha Keriso, ke puipui a tautolu mai he mate ka totamaki ke moumou e poakiaga he Atua  ke he fakatapu he moui mo e toto. Tokiofa nakai e koe e fakaalofa ia? Puhala fe ka fakakite aki e koe? Ko e taha puhala, ke uiina e falu ke talia e puipuiaga fakaalofa he Atua, mua atu he mailoga kua tata “lahi ai e matematekelea.”​​—Mataio 24:21; 2 Korinito 6:1, 2.

TOKIOFA E MOUI HE FAKAMATALA E FEKAU HE KAUTU

26-28. Puhala fe ne tatai e tuaga ha tautolu he vahā nei mo e perofeta ko Esekielu, mo e fakatumau fēfē a tautolu ke he fakaalofa he Atua?

26 Ko e tuaga he tau tagata he Atua he vahā nei kua tuga e magahala ha Esekielu ko e perofeta i tuai, ne kotofa e Iehova ke fekafekau ko e tagata toko fakaagaaga ke he magafaoa ha Isaraela. Pehē e Atua: “Ko e mena ia kia fanogonogo mai a koe ke he tau kupu he gutu haku mo e fakamafana atu [he hataki] e koe a lautolu ia au.” Ti ka fakaheu e Esekielu e haana a kotofaaga, to hili ni ki a ia e toto he tau tagata ka mamate he magaaho ka hoko mai e fakafiliaga ki Ierusalema. (Esekielu 33:7-9) Ka kua omaoma a Esekielu ti nakai lauia a ia he fakamaligi toto.

27 He vahā nei, ko tautolu hane haga atu ke he fakaotiaga he lalolagi katoa ha Satani. Ti kua mailoga he Tau Fakamoli a Iehova, ko e kotofaaga mo e lilifu ke fakamatala e “aho ke lalago ai” he Atua, fakalataha mo e ogo he Kautu. (Isaia 61:2; Mataio 24:14) Taute katoatoa nakai e koe e gahua uho nei? Ko e aposetolo ko Paulo ne taute fakamakamaka e kotofaaga haana ke fakamatala. Ko e fua ne moua mai, maeke a ia ke pehē: “Kua mea na au he toto he tau tagata oti. Ha ko e mena kua nakai toka e au taha kupu, neke nakai fakailoa atu kia mutolu e finagalo oti he Atua.” (Gahua 20:26, 27) Ko e fakataiaga mitaki lahi a ia ma tautolu ke fifitaki!

28 Ko e mena ia, ke fakatumau a tautolu ke moua e mafanatia he fakaalofa he matua ko Iehova, kua lata ia tautolu ke onoono fakahokulo ke he moui mo e toto tuga a Iehova. Kua lata foki a tautolu ke tumau e meā, po ke tapu, ki mua haana, tuga ka kitia e tautolu he veveheaga ka mui mai.

^ para. 5 Hagaao ke he talahauaga he Atua, “ko e toto ko e moui he tino haia,” ne tohi he senolo Scientific American pehē: “Ti ka tuku kehe e fakatai, kua mooli e talahauaga: na aoga oti e tau vahega tegatega toto ke moui e tagata.”

^ para. 12 Kikite e Awake! ia Aokuso 2006, lau 3-12, ne taute fakailoa he Tau Fakamoli a Iehova.

^ para. 16 Ko e tau pulotu ne tohi e fakamaamaaga ke he Tohi Tapu ne talahau hagaao ke he tau kupu faka-Heperu nei “kua nakai hagaao e tala nei ko e fifine ni ka pakia.” Mailoga foki, nakai talahau he Tohi Tapu na fakavē e fifiliaga ha Iehova ke he fiha e leva ne kua fakafua e tama he manava.

^ para. 70 Kikite e vala tala he Apenetiki “Tau Vala Ikiiki he Toto mo e Tau Puhala ka Iihi” ma e falu vala tala fakamatafeiga.