Skip to content

Skip to table of contents

Tau Fakamoli a Iehova

Fifili e vagahau Faka-Niue

 APENETIKI

Ko e Manatu he Tohi Tapu ke he Tau Vevehe mo e Nonofo Kehekehe

Ko e Manatu he Tohi Tapu ke he Tau Vevehe mo e Nonofo Kehekehe

Amanaki a Iehova ki a lautolu ne fai hoana mo e fai taane ke fakamooli ke he omonuoaga he fakamauaga. He fakalataha e tagata taane mo e fifine fakamua ke he fakamauaga, ne talahau e Iehova: “Pipiki [e taane] ke he hana hoana; ti eke ai a laua mo tino taha.” He taha magaaho foki, ne liu fatiaki e Iesu Keriso e tala ia mo e lafi ki ai: “Hanai, ko ia kua fakalataha he Atua, aua neke vevehe he taha tagata.” (Kenese 2:24; Mataio 19:3-6) Ko e mena ia kua onoono a Iehova mo Iesu ke he fakamauaga ko e pipiaga mauokafua ato mate e taha hoa mau. (1 Korinito 7:39) Ko e fakamauaga ko e fakatokaaga tapu, ti nakai lata ke  fakateaga ke he tau vevehe. Kua vihiatia e Iehova e tau vevehe ne nakai fai fakavēaga ke he Tohi Tapu.​—Malaki 2:15, 16.

Ko e heigoa e fakavēaga he Tohi Tapu ma e tau vevehe? Vihiatia e Iehova e mahani faivao mo e mahani feuaki. (Kenese 39:9; 2 Samuela 11:26, 27; Salamo 51:4) Kua fakalialia lahi e mahani feuaki ki a Iehova ti fakaatā ni e ia ke tau vevehe ha ko e mahani feuaki. (Ma e fakatutalaaga hagaao ke he mahani feuaki, fakakia e Veveheaga 9, paratafa 7, ne fakamaama ai e mahani feuaki.) Foaki e Iehova ke he hoa ne nakai agahala e tonuhia ke fifili ke nonofo mau mo e hoa ne agahala po ke tau vevehe. (Mataio 19:9) Kaeke kua fifili e hoa ne nakai agahala ke tau vevehe, kua nakai taute e ia e lakaaga ne vihiatia e Iehova. Ka e he magaaho taha, nakai fakamafana he fakapotopotoaga Kerisiano ha tagata ke tau vevehe. He falu tuaga, liga fifili e hoa ne nakai agahala ke nonofo mau mo e hoa ne agahala, mua atu ka tokihala mooli e hoa ia. He fakahikuaga, ko lautolu ne fai fakavēaga ke he Tohi Tapu ke tau vevehe, kua lata ni ia lautolu ke taute e fifiliaga mo e talia e tau tuaga ka tutupu mai.​—Kalatia 6:5.

He tau tuaga ne kelea lahi mahaki, kua fifili falu Kerisiano ke nonofo kehekehe po ke tau vevehe mo e hoa mau pete ni kua nakai mahani feuaki e taha. He tuaga pihia, ne talahau fakatonu he Tohi Tapu ki a ia ne fano kehe, “kia nofo noa pihia a ia po ke fakafeilo mo e” hoa mau. (1 Korinito 7:11) Ko e Kerisiano he tuaga ia kua nakai fakaatā a ia ke kumi foki taha hoa mau. (Mataio 5:32) Manamanatu la ke he falu tuaga kelea lahi mahaki, ati fifili ai he falu mo fakavēaga ke nonofo kehekehe.

Nakai leveki pauaki. Liga nonofogati e magafaoa ti nakai fai levekiaga ha kua kaumahala e taane ke leveki a lautolu pete he maeke a ia ke leveki a lautolu. Talahau he Tohi Tapu: “Kaeke kua nakai leveki e taha . . . kia lautolu kua nonofo mo ia, kua fakatikai e ia e tua, kua mua foki hana kelea kia ia kua faliuliu.” (1 Timoteo 5:8) Ka nakai mahalo e taane ke hiki e tau puhala haana, kua maeke e hoana ke puipui a ia mo e tau fanau haana he fifili ke nonofo kehekehe fakamatafakatufono. Ti ko e tau motua Kerisiano mogoia kua lata ke manamanatu fakahokulo  ke he hokotaki nei, kua fakatikai he Kerisiano ke leveki e magafaoa haana. Ko e fakatikai pauaki ke nakai leveki e magafaoa he tagata to liga fakahiku ke tuku ki tua.

Fakamatematekelea lahi ke he tino. Ko e hoa ne favale lahi mahaki ti liga fakamatematekelea e malolō tino mo e moui he hoa haana. Kaeke ko e Kerisiano e hoa favale, kua lata e tau motua he fakapotopotoaga ke kumikumi ke he hokotaki nei. Ko e favale mo e keli e falu ko e tau mahani kua lata ke tuku ki tua mai he fakapotopotoaga.​—Kalatia 5:19-21.

Fakahagahaga kelea lahi ke he moui fakaagaaga. Liga lali tumau e taha hoa mau ke nakai fakalataha e hoa haana ke he tapuakiaga mooli po ke lali foki ke fakaohooho e hoa ke moumou e tau poakiaga he Atua. He tuaga pihia, ko e hoa ne kua fehagai mo e totokoaga mamahi ia, to fifili ke nonofo kehekehe fakamatafakatufono ha ko e puhala ni a ia ma haana ke “mua e omaoma ke he Atua ke he omaoma ke he tau tagata.”​—Gahua 5:29.

He tau tutūaga matematekelea lahi nei ne kua fakatutala a tautolu ki ai, kua nakai lata ha tagata ke fakaohooho e hoa ne nakai agahala ke nonofo kehekehe po ke nofo mo e hoa haana. Pete kua liga talahau he tau kapitiga fakaagaaga po ke tau motua e falu lagomataiaga ne fakavē ke he Tohi Tapu, kua nakai iloa oti e lautolu e tau mena ne tutupu he fakafetuiaga he taane mo e hoana. Ko Iehova ni ka kitia e tau mena ia. Ka kua nakai fakalilifu he hoana po ke taane Kerisiano e Atua po ke fakaholoaga he fakamauaga, kaeke kua talahau e tau mena lafi ki luga ke tuga kua kelea lahi e tau lekua he kaina, he lali ke nonofo kehekehe mo e hoa mau haana. Iloa e Iehova e tau lagatau ne taute ke nonofo kehekehe, pete ni he lali e tagata ke fufū. Mooli ai, “kua toka noa mo e maliali e tau mena oti kana ke he na fofoga hana [ko e Atua] ke talahau ki ai e tautolu e tau mahani ha tautolu.” (Heperu 4:13) Kaeke kua nakai hiki e tuaga matematekelea lahi, kua nakai lata ha tagata ke tuhituhi e fifiliaga he Kerisiano ha kua fifili a ia ke nonofo kehekehe. Pete ni e tau fifiliaga ka taute, “ko e mena tutu a tautolu oti kana ki mua he nofoa fakafili [“he Atua,” NW].”​—Roma 14:10-12.