Skip to content

Skip to table of contents

Tau Fakamoli a Iehova

Fifili e vagahau Faka-Niue

 APENETIKI

Puhala ke Fehagai mo e Tagata ne Tuku ki Tua

Puhala ke Fehagai mo e Tagata ne Tuku ki Tua

Nakai loga e tuaga ka fakamamahi a tautolu, ke tuga e momoko lahi mahaki ha kua tuku ki tua he fakapotopotoaga e taha he magafaoa po ke kapitiga tata he nakai tokihala ke he agahala. Ko e puhala ne tali atu a tautolu ke he takitakiaga he Tohi Tapu ke he tuaga nei, ka fakakite e hokulo he fakaalofa mo e tua fakamooli ha tautolu ke he Atua. * Manamanatu ke he falu hūhū hagaao ke he matakupu nei.

Lata ke fehagai fēfē a tautolu mo e tagata ne tuku ki tua? Talahau he Tohi Tapu: “Kaeke kua talahaua taha ko e matakainaga, ka ko ia ko e feuaki, po ke velevelemena, po ke hufeilo ke he tau tupua, po ke tagata vagahau kelea, po ke konahia, po ke fofo mena, aua neke feoaki, aua foki neke kai mena fakalataha mo e tagata pihia.” (1 Korinito 5:11) Hagaao ki a lautolu oti kua “nakai tumau ke he kupu kia Keriso,” totou e tautolu: “Aua neke talia a ia ke he fale ha mutolu, aua foki neke tala age a mutolu kia monuina; Ha ko ia kua tala age kia ia kia monuina kua kau fakalataha mo ia ke he hana tau gahua kelea.” (2 Ioane 9-11) Nakai lafi fakalataha po ke tutala a tautolu ke he tau mena fakaagaaga mo lautolu ne kua tuku ki tua. Pehē mai he The Watchtower ia Sepetema 15, 1981, lau 25: “Ko e pehē ‘fakaalofa atu’ ke he taha tagata, kua eke mo lakaaga fakamua ke fakalagā e fakatutalaaga mo e liga fakakapitiga foki. To manako nakai a tautolu ke taute e lakaaga fakamua ia mo e tagata tuku ki tua?”

Lata mooli kia ke nakai fai matutakiaga mo lautolu ne kua tuku ki tua? E, loga e kakano ati pihia ai. Fakamua, kua fakakite e tautolu e mahani fakamooli ke he Atua mo e haana a Kupu. Omaoma a tautolu ki a Iehova he tau magaaho oti, putoia foki ke he tau magaaho ka uka ke taute pihia. Ko e fakaalofa ke he Atua ka omoi a tautolu ke omaoma e tau poakiaga oti haana, mo e mailoga kua ha ha ia Ia e tonu mo e fakaalofa ti ko e haana a tau fakatufono kua mua e mitaki. (Isaia 48:17; 1 Ioane 5:3) Ke  uaaki, he nakai lafi mo ia ne nakai tokihala, ka puipui a tautolu mo e fakapotopotoaga ke ua hufia kelea e tuaga fakaagaaga ha tautolu, mo e nakai takiva e higoa mitaki he fakapotopotoaga. (1 Korinito 5:6, 7) Ke toluaki, ko e ha tautolu a tumau ke he tau matapatu fakaakoaga he Tohi Tapu, ka maeke foki ke aoga ki a ia ne kua tuku ki tua. Ko e ha tautolu a lalago ke he fifiliaga he komiti fakafili, ka maeke ke hokotia ke he loto he tagata ne taute e kelea mo e nakai talia e lagomatai ne foaki age he tau motua. He galo e fakafetuiaga uho haana mo lautolu ne ofania e ia, to liga lagomatai ke “matala ai hana loto,” ke kitia e kelea lahi he hepe haana ti taute e tau hikiaga ke liu mai ki a Iehova.​—Luka 15:17.

Ka e kua ko e taha he magafaoa ne tuku ki tua? He tuaga pihia, ko e fakafetuiaga tata he magafaoa ka kamatamata e mahani fakamooli ha lautolu. Kua lata a tautolu ke taute fēfē a taha he magafaoa ne tuku ki tua? Nakai maeke ke talahau oti he tohi nei e tau tuaga ka tupu, ka e o mai a tautolu ke hagaaki ke he ua e tuaga fa mahani.

He falu magaaho, ko e taha he magafaoa ne tuku ki tua ne liga nofo agaia he kaina mo e magafaoa haana. Ko e haana a tuku ki tua, ne nakai fakamamutu e pipiaga haana ko e taha he magafaoa, ti liga matutaki ke he tau gahua ne mahani ki ai he kaina. Ka ko e haana a puhala, kua fifili e ia ke fakamamutu e pipiaga fakaagaaga haana mo e magafaoa ne talitonu. Ti ko e tau tagata mahani fakamooli he magafaoa, kua nakai fai fakafetuiaga mo e taute auloa e tau gahua fakaagaaga mo ia. Ke fakatai, ka nofo a ia ne tuku ki tua he magaaho ka taute e tapuakiaga magafaoa, to nakai maeke a ia ke fai vala ki ai. Ka e kaeke ko e tama fuata mui ne tuku ki tua, ko e matagahua agaia he tau matua ke fakaako mo e akonaki a ia. Ti ko e tau matua fakaalofa ka fakatoka ke fakaako e Tohi Tapu mo e tama. *​—Tau Fakatai 6:20-22; 29:17.

He falu a tuaga, ko e taha he magafaoa ne tuku ki tua ne liga nakai nofo i kaina mo e haana a magafaoa. Pete he lavea ke matutaki mo ia ha ko e tau fekau pauaki he magafaoa, kua lata ni ke fakakū. Ko e tau Kerisiano mahani fakamooli he magafaoa,  ne nakai kumi lagatau ke lafi mo e taha he magafaoa kua tuku ki tua ne ai nofo i kaina. Ka e mai he mahani fakamooli ki a Iehova mo e haana a fakatokatokaaga, ne omoi a lautolu ke lalago e puhala he Tohi Tapu ke he tuku ki tua. Ko e puhala fakamooli nei ha lautolu, to aoga ki a ia ne taute e mena kelea, he liga lagomatai a ia ke aoga mai he akonakiaga ne moua. *​—Heperu 12:11.

^ para. 1 Ko e tau matapatu fakaakoaga he Tohi Tapu hagaao ke he tuku ki tua, kua hagaao foki ki a lautolu ne kua vevehe kehe ni e lautolu a lautolu mai he fakapotopotoaga.

^ para. 2 Ma e falu a vala tala foki hagaao ke he tuku ki tua he tau tama fuata mui ne nonofo he kaina, kikite Ko e Kolo Toko ia Oketopa 1, 2001, lau 27-29, mo e The Watchtower Novema 15, 1988, lau 20.

^ para. 3 Ma e falu a vala tala foki hagaao ke he puhala ka fehagai mo e taha he magafaoa ne tuku ki tua, kikite e fakatonuaga he Tohi Tapu i loto he The Watchtower ia Aperila 15, 1988, lau 26-31, mo e Sepetema 15, 1981, lau 26-31.