Skip to content

Skip to table of contents

Tau Fakamoli a Iehova

Fifili e vagahau Faka-Niue

 APENETIKI

Saluti e Matini, Viliaga, mo e Fekafekauaga ma e Motu

Saluti e Matini, Viliaga, mo e Fekafekauaga ma e Motu

Saluti e matini. Talitonu e Tau Fakamoli a Iehova ko e tukutuku hifo ke he matini po ke saluti ai, ne fa taute ka e uhu e lologo motu, ko e taha vala he tapuakiaga fakalotu ne pehē kua moua mai e fakamouiaga he Motu po ke tau takitaki, ka e nakai mai he Atua. (Isaia 43:11; 1 Korinito 10:14; 1 Ioane 5:21) Taha e takitaki he motu ne pihia, ko e Patuiki ko Nepukanesa ha Papelonia i tuai. Ke nava e tau tagata ke he lilifu mo e makutu haana ke he lotu, ne fakatū he patuiki malolō nei e tupua lahi, ti fekau e tau tagata ke tukutuku hifo ki ai ka e tā e leo kofe ne tuga e lologo tapu. Ka ko e tau Heperu tokotolu​—ko Sataraka, Mesako mo Apetiniko​—ne nakai tukutuku hifo ke he tupua, pete ko e fakahala ko e tamate.​—Tanielu, veveheaga 3.

He magahala ha tautolu, “ko e fakamailoga he motu ko e matini, ne fakavē ki ai e tua mo e tapuakiaga,” he tohia he tagata fakamautala tuai ko Carlton Hayes. “Ne aaki he tau tagata taane e tau pulou ha lautolu ka mole e matini; mo e ke fakalilifu ke he matini, ne tohi he tau tagata tohia poeme e tau kupu lologo mo e uhu he tau fanau e tau lologo tapu.” Ne lafi e ia, ko e papale fakamotu kua ha ha foki e “tau aho fakatapu,” tuga e aho ke Fāaki ia Iulai ha Amerika, pihia foki e “tau tagata tapu mo e tau toa” ha lautolu mo e tau “faituga,” po ke tau matakavi fakatapu. He taha fakamanatuaga he toloaga i Parasili, ko e takitaki he tau kautau ne talahau: “Kua fakalilifu mo e tapuaki ke he matini  . . . tuga ni ne tapuaki ke he Motu Mooli.” E, ko e “matini, tuga e akau fakalava, ko e mena fakatapu,” he talahau he The Encyclopedia Americana.

Ko e tohi enesaikolopetia ia ne nakai la leva e talahau ko e tau lologo motu “ko e fakakiteaga he tau logonaaga ke fakamooli ke he motu mo e fa putoia e olelalo ke he Atua ke takitaki mo e puipui e tau tagata po ko lautolu ne pule.” Ko e mena ia kua fai kakano mitaki e tau fekafekau ha Iehova he mailoga ko e tau fakamanatuaga ke fakalilifu e motu, ne putoia e saluti e matini mo e tau lologo motu, ko e tau gahua fakalotu. Ti ko e magaaho ne talahau hagaao ke he tau fanau he Tau Fakamoli a Iehova, ne nakai talia ke fakaheke ke he matini po ke omonuo ke kau mo e motu he tau aoga i Amerika, ne pehe e tohi The American Character: “Ko e tau gahua nei ne taute tumau ko e tau fakaholoaga fakalotu he talahau he Hopoaga Tokoluga ke he tau hokotaki ia.”

Kua nakai putoia e tau tagata ha Iehova he tau fakamanatuaga ia he motu ne nakai mai he Tohi Tapu, ka e fakalilifu a lautolu ke he tonuhia he falu ne taute pihia. Mailoga foki e lautolu ko e matini he tau motu ko e tau mena fakatai, mo e tau fakatufono ne kotofa ko e “tau tui ne mua” kua gahua ko e “fekafekau he Atua.” (Roma 13:1-4) Ko e kakano ia ati muitua e Tau Fakamoli a Iehova ke he tomatomaaga, ke liogi “ma e tau patuiki, mo lautolu oti ne toka ai e pule.” Ka ko e manako ha tautolu ke “nonofo a tautolu fakatekiteki mo e nakai fakaatukehe, ke he mahani Atua ni mo e mahani fulumokoi.”​—1 Timoteo 2:2.

Ko e vili he tau viliaga fakapolitika. Kua fakalilifu he tau Kerisiano mooli e tonuhia he falu ke vili. Nakai totoko a lautolu ke he tau viliaga, ka e omaoma a lautolu ke he tau takitaki ne kua kautū he viliaga. Ka kua tu uho katoatoa a lautolu hagaao ke he tau gahua fakapolitika he tau motu. (Mataio 22:21; 1 Peteru 3:16) Ko e heigoa he Kerisiano ka taute kaeke kua nofo a ia he motu ne lata e tau tagata oti ke vili po ke he motu ne totoko lahi ke he tau tagata ne nakai o atu ke he tau matakavi ne vili ai? Manatu na o atu a Sataraka, Mesako, mo Apetiniko ke he kelekele tatai i Turu, ti ka haia e Kerisiano he tau tuaga pihia foki, liga fifili a ia ke fina atu ke he matakavi ne vili ai kaeke kua fakaatā he loto manamanatu haana a ia. Ka e to fakaeneene fakalahi a ia ke  nakai moumou e tu uho haana. Lata a ia ke manamanatu ke he ono e matapatu fakaakoaga nei:

  1. Ko e tau tutaki ha Iesu kua “nakai ko e tau tagata he lalolagi.”​—Ioane 15:19.

  2. Kua hukui he tau Kerisiano e Keriso mo e haana Kautu.​—Ioane 18:36; 2 Korinito 5:20.

  3. Ko e fakapotopotoaga Kerisiano kua fakalataha ha ko e tau taofiaga, mo e pipi auloa e tau matakainaga ha ko e fakaalofa tuga he Keriso.​—1 Korinito 1:10; Kolose 3:14.

  4. Ko e tau tagata ne vili e takitaki he motu, to fai fakalagoaga a lautolu ke he tau gahua he tagata nei.​—Manamanatu ke he tau matapatu fakaakoaga he tau kupu ne fakamau ia 1 Samuela 8:5, 10-18 mo e 1 Timoteo 5:22.

  5. Onoono a Iehova ke he manako he tau Isaraela ke moua e patuiki, ko e fakamailoga kua tiaki e lautolu a Ia.​—1 Samuela 8:7.

  6. Kua lata e tau Kerisiano ke atāina mo e mauokafua, ka tutala ke he fakatufono he Kautu he Atua ke he tau tagata ne igatia mo e tau onoonoaga fakapolitika.​—Mataio 24:14; 28:19, 20; Heperu 10:35.

Fekafekauaga ma e motu. He falu motu, kua poaki he Fakatufono ke he tau tagata ne nakai talia ke ō he tau, ke fai magaaho ka taute falu fekafekauaga ma e motu. Ka taute e fifiliaga he tuaga nei, kua lata ia tautolu ke liogi ki ai, mo e liga tutala hagaao ki ai mo e matakainaga Kerisiano motua fakaagaaga, ti fakaaoga e loto manamanatu ha tautolu ke taute e fifiliaga mauokafua.​—Tau Fakatai 2:1-5; Filipi 4:5.

Talahau he Kupu he Atua ki a tautolu ke “omaoma . . . ke he tau iki lalahi, mo e tau pule kia navanava atu ke he tau iki, kia nonofo tauteute foki a lautolu ke he tau gahua mitaki oti kana, . . . kia totonu.” (Tito 3:1, 2) He tokaloto e tau manatu ia, lata a tautolu ke hūhū hifo e tau hūhū nei: ‘Ka talia e fekafekauaga ma e motu to huhui kia he mena ia e tu uho haaku ko e Kerisiano po ke to putoia au ke he lotu fakavai?’ (Mika 4:3, 5; 2 Korinito 6:16, 17) ‘Ka taute e au e gahua nei to uka kia a au ke fakamooli e tau kotofaaga haaku ko e Kerisiano po ke taofi au he taute ai?’ (Mataio 28:19, 20; Efeso 6:4; Heperu 10:24, 25) ‘He taha faahi,  ka taute e fekafekauaga ma e motu, to fakaatā nakai he fakaholoaga nei au ke fakalaulahi e tau gahua fakaagaaga haaku, tuga ke gahua fakamatala tumau?’​—Heperu 6:11, 12.

Ka fifili e Kerisiano mai he haana loto manamanatu ke taute e fekafekauaga ma e motu ka e nakai fano ke he fale puipui, kua lata e tau matakainaga Kerisiano ke fakalilifu e fifiliaga haana. (Roma 14:10) Kaeke kua logona hifo e ia kua nakai maeke a ia ke taute e fekafekauaga ma e motu, kua lata foki ke fakalilifu e tuaga ia haana.​—1 Korinito 10:29; 2 Korinito 1:24.