Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA HOGOFULU MA LIMA

Tapuakiaga ne Talia he Atua

Tapuakiaga ne Talia he Atua
  • Kua fiafia kia e Atua ke he tau lotu oti?

  • Maeke fēfē ia tautolu ke kitia e lotu mooli?

  • Ko hai e tau tagata tapuaki mooli he Atua he lalolagi he vahā nei?

1. To aoga fēfē a tautolu kaeke tapuaki e tautolu e Atua ke he puhala hako?

KUA mua atu e manamanatu ha Iehova ko e Atua ki a tautolu mo e manako ke aoga mai a tautolu he takitakiaga fakaalofa haana. Kaeke ke tapuaki e tautolu a ia ke he puhala hako, to fiafia a tautolu mo e to kalo mai he tau lekua loga he moui. To moua foki e tautolu e monuina mo e lagomatai haana. (Isaia 48:17) Ka e ha ha ai e tau lotu loga ne kua talahau ke fakaako e kupu mooli hagaao ke he Atua. Ka kua kehe lahi e tau fakaakoaga ha lautolu hagaao ke he Atua mo e mena ne amanaki mai a ia ki a tautolu.

2. Maeke fēfē ia tautolu ke ako e puhala hako ke tapuaki ki a Iehova, mo e ko e heigoa e fakataiaga ka lagomatai a tautolu ke maama e mena nei?

2 Maeke fēfē ia koe ke iloa e puhala hako ke tapuaki a Iehova? Kua nakai lata ia koe ke kumikumi mo e fakatatai e tau fakaakoaga he tau lotu oti. Kua lata ni a koe ke ako e tau mena ne fakaako mooli he Tohi Tapu hagaao ke he tapuakiaga mooli. Ke fakataitai: He tau motu loga, kua ha ha ai e lekua mo e tau tupe fakavai. Kaeke kua atu ki a koe e matagahua ke fifili mai e tupe fakavai, to taute fēfē e koe? He ako manatu kia e tau vahega tupe fakavai oti? Nakai. To fakaaoga fakamitaki e magaaho haau kaeke kumi atu a koe ke kitia tonu e tupe mooli. He mole he mailoga e koe e tupe mooli, to maeke mogoia ia koe ke mailoga e mena fakavai. Tatai foki, he magaaho ka ako e tautolu e puhala ke kitia e lotu mooli, to maeke ia tautolu ke mailoga e tau lotu fakavai.

3. Hagaao ki a Iesu, ko e heigoa kua lata ia tautolu ke taute ka manako a tautolu ke moua e taliaaga he Atua?

 3 Kua aoga ke tapuaki e tautolu a Iehova ke he puhala ne talia e ia. Tokologa e tagata ne talitonu kua fiafia e Atua ke he tau lotu oti, ka e nakai pihia e fakaakoaga he Tohi Tapu. Kua nakai kuenaia ke talahau ko e Kerisiano a koe. Ne talahau e Iesu: “Nakai hohoko ke he kautu he lagi a lautolu oti kua pehe mai kia au, Ko e Iki na e, ko e Iki na e; ka ko ia ni kua eke e finagalo he haku a Matua ha ha he lagi.” Ke talia he Atua, mogoia, kua lata ia tautolu ke ako e tau mena ne manako mai e Atua ki a tautolu mo e taute ai. Ne ui e Iesu a lautolu ne nakai taute e finagalo he Atua “ko mutolu ne eke e mahani kelea.” (Mataio 7:21-23) Ke tuga e tupe fakavai, kua nakai fai aoga e lotu fakavai. Mua atu foki kua fakahagahagakelea e tau lotu pihia.

4. Ko e heigoa e kakano he tau kupu ha Iesu hagaao ke he ua e hala, mo e takitaki atu ki fe e tau hala takitaha ia?

4 Kua foaki e Iehova e fifiliaga ke he tau tagata oti kana he lalolagi ke moua e moui tukulagi. Ka e, ke moua e moui tukulagi he Parataiso, kua lata ia tautolu ke tapuaki fakamooli ke he Atua mo e momoui he mogonei ke he puhala ne talia e ia. Momoko ai, tokologa ne fakaheu ke taute pihia. Kakano haia ne pehē a Iesu: “Kia huhū atu a mutolu ke he gutuhala pukilu; ha ko e mena pulahi e gutuhala, ti laulahi foki e hala ke pu atu ke he malaia, kua tokologa foki a lautolu kua huhū atu ki ai. Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.” (Mataio 7:13, 14) Kua takitaki atu e lotu mooli ke he moui tukulagi. Kua takitaki atu e lotu fakavai ke he fakaotiaga. Kua nakai manako a Iehova ke fakaotioti ha tagata, ti ko e kakano haia ne foaki e ia ke he tau tagata he tau motu kehekehe e magaaho ke ako hagaao ki a ia. (2 Peteru 3:9) Ti, ko e puhala ne tapuaki a tautolu ke he Atua kua kakano ko e moui mo e mate ma tautolu.

PUHALA KE KITIA E LOTU MOOLI

5. Maeke fēfē ia tautolu ke mailoga a lautolu ne fakagahua e lotu mooli?

5 Maeke fēfē ke moua e ‘hala ke he moui’? Ne talahau e Iesu to kitia e lotu mooli he tau momoui he tau tagata ne fakagahua  ai. “To iloa mali e mutolu a lautolu ke he tau fua ha lautolu,” he talahau e ia. “Pihia foki e tau akau mitaki oti kua takitaha mo e fua mai e tau fua mitaki.” (Mataio 7:16, 17) Ke he falu kupu, ko lautolu ne fakagahua e lotu mooli ka mailoga ai ha ko e tau taofiaga mo e tau mahani ha lautolu. Pete he nakai mitaki katoatoa mo e taute mena hepehepe a lautolu, ko e tau tagata tapuaki mooli kua lali auloa ke taute e finagalo he Atua. Kia fakatutala a tautolu ke he ono e puhala ne kitia aki a lautolu kua fakagahua e lotu mooli.

6, 7. Fēfē e onoonoaga he tau fekafekau he Atua ke he Tohi Tapu, mo e puhala fe ne fakatoka e Iesu e fakafifitakiaga hagaao ke he mena nei?

6 Ne fakavē he tau fekafekau he Atua e tau fakaakoaga ha lautolu ke he Tohi Tapu. Ne talahau mai he Tohi Tapu: “Ko e tau Tohi Tapu oti kana mai he [a]gaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu, kia katoatoa ai e mitaki he tagata he Atua, kia taute ni a ia ke he tau gahua mitaki oti kana.” (2 Timoteo 3:16, 17) Ke he tau katofia Kerisiano haana, ne tohia e Paulo: “Kua talia e [mutolu] e kupu he Atua ne fanogonogo mai ai a mutolu kia mautolu, ti talia ai e mutolu nakai ko e kupu he tau tagata, ka ko e kupu he Atua, (ko e moli ni haia).” (1 Tesalonia 2:13) Ti, kua nakai fakavē e tau taofiaga mo e tau fakagahuaaga he lotu mooli ke he tau manatu po ke tau aga fakamotu he tagata. Kua puna mai he Kupu omoi he agaaga he Atua, ko e Tohi Tapu.

7 Ne fakatoka e Iesu Keriso e fakafifitakiaga mitaki he fakavē e tau fakaakoaga haana ke he Kupu he Atua. He liogi ke he haana Matua he lagi, ne pehē a ia: “Ko e hau a kupu ko e kupu moli haia.” (Ioane 17:17) Ne talitonu a Iesu ke he Kupu he Atua, mo e tau mena oti ne ako e ia kua felauaki mo e tau Tohiaga Tapu. Ne fa talahau e Iesu: “Kua tohi.” (Mataio 4:4, 7, 10) Ti fatiaki mogoia e Iesu e kupu tohi. Tatai foki, ne nakai fakaako he tau tagata he Atua he vahā nei e tau manatu ha lautolu. Ne talitonu a lautolu ko e Tohi Tapu ko e Kupu he Atua, ti fakavē mauokafua e lautolu e tau fakaakoaga ha lautolu ke he mena ne talahau i ai.

8. Ko e heigoa ne putoia ke he tapuakiaga ki a Iehova?

8 Ko lautolu ne fakagahua e lotu mooli kua tapuaki ki a Iehova  hokoia mo e fakailoa e higoa haana. Ne fakapuloa e Iesu: “Kia hufeilo atu a koe ke he Iki [Iehova] hau a Atua, ko ia ni hokoia ke fekafekau atu a koe ki ai.” (Mataio 4:10) Ti kua tapuaki e tau fekafekau he Atua ki a Iehova tokotaha maka. Kua putoia ke he tapuakiaga nei ke fakailoa ke he tau tagata e higoa he Atua mooli mo e tau puhala haana. Ne talahau he Salamo 83:18: “[Ko] koe, ko e hāu a higoa ko Iehova, hoko koe ni kua Mua ue atu ke he lalolagi oti.” Ne fakatoka e Iesu e fifitakiaga he lagomatai e falu ke lali ke iloa e Atua tuga ne talahau e ia he liogi: “Kua fakakite atu e au hau a higoa ke he tau tagata ne foaki mai e koe kia au mai he lalolagi.” (Ioane 17:6) Tatai foki, kua fakaako he tau tagata tapuaki mooli he vahā nei e falu hagaao ke he higoa he Atua, haana tau finagalo, mo e haana tau mahani.

9, 10. Ko e heigoa e tau puhala ne fakakite he tau Kerisiano mooli e feofanaki?

9 Ne fakakite he tau tagata he Atua e fakaalofa mooli nakai fulukovi ke he taha mo e taha. Ne pehē a Iesu: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:35) Ne ha ha he tau Kerisiano fakamua atu e fakaalofa pihia ke he taha mo e taha. Ko e fakaalofa mahani Atua kua kautū ke he tau aga fakamotu, tau fakalatahaaga, mo e he tau totokoaga fakamotu ti kua futia auloa e tau tagata ke he pipiaga maunivaniva he fakamatakainaga mooli. (Totou Kolose 3:14.) Kua nakai moua he tau tagata he lotu fakavai e fakamatakainaga fakaalofa pihia. Iloa fēfē e tautolu e mena ia? Ne kelipopo ni e lautolu e taha mo e taha ha ko e tau fekehekeheaki he tau motu po ke tau matakau. Kua nakai fakagahua he tau Kerisiano mooli e tau kanavaakau ke kelipopo aki e tau matakainaga Kerisiano ha lautolu po ke ha tagata ni. Ne talahau he Tohi Tapu: “Ko e mena ia kua iloa ai e fanau he Atua mo e fanau he tiapolo. Ko lautolu gotoa kua nakai eke e mahani tututonu, nakai mai he Atua a lautolu, katoa mo lautolu kua nakai fakaalofa ke he tau matakainaga ha lautolu. . . . Kia feofanaki a tautolu. Nakai tuga a Kaino ne mai ia ia ne mahani kelea, ne kelipopo foki e ia hana matakainaga.”1 Ioane 3:10-12; 4:20, 21.

 10 Mooli, kua lahi atu e kakano he fakaalofa mooli mai he nakai kelipopo e falu. Ne fakaaoga fakamakai he tau Kerisiano mooli e tau magaaho, malolō, mo e tau koloa ha lautolu ke lagomatai mo e fakamalolō aki e taha mo e taha. (Heperu 10:24, 25) Kua felagomataiaki a lautolu he tau magaaho fakaatukehe, mo e mahani fakamooli a lautolu ke he taha mo e taha. Ko e mooli, kua fakagahua e lautolu ke he tau momoui e fakatonuaga he Tohi Tapu ‘kia mahani mitaki ke he tau tagata oti kana.’Kalatia 6:10.

11. Ko e ha kua aoga ai ke talia a Iesu Keriso ko e puhala he Atua ma e fakamouiaga?

11 Ne talia he tau Kerisiano mooli a Iesu Keriso ko e puhala he Atua ma e fakamouiaga. Ne talahau he Tohi Tapu: “Ti nakai tokai foki e fakamouiaga ke he taha; nakai fakai taha higoa i lalo he lagi kua foaki mai ke he tau tagata, ke maeke ai ke fakamomoui a tautolu.” (Gahua 4:12) He kitia e tautolu he Veveheaga 5, ne foaki e Iesu e moui haana mo lukutoto ma e tau tagata omaoma. (Mataio 20:28) Lafi ki ai, ko Iesu ko e Patuiki kotofa he Atua he Kautu he lagi ka pule ke he lalolagi katoa. Mo e poaki he Atua ke omaoma a tautolu ki a Iesu mo e fakagahua e tau fakaakoaga haana kaeke manako a tautolu ke moui tukulagi. Kakano haia ne talahau he Tohi Tapu: “Ko e tagata ne tua ke he Tama, ha ha ia ia e moui tukulagi; ka ko e tagata nakai tua ke he Tama, nakai kitia e ia e moui.”Ioane 3:36.

12. Ko e heigoa ne putoia ki ai he nakai ko e tau tagata he lalolagi?

12 Nakai ko e tau tagata he lalolagi e tau tagata tapuaki mooli. He fakafili ki mua he pule Roma ko Pilato, ne tala age a Iesu: “Nakai ko e kautu he lalolagi nai haku a kautu.” (Ioane 18:36) Ko e ha motu ni ne nonofo ai a lautolu, ko e tau tutaki mooli ha Iesu ko e tau tagata ne omaoma ke he Kautu haana he lagi ti kua tumau ke tuuho mai he tau matagahua fakapolitika he lalolagi. Ne nakai putoia a lautolu ke he tau taufetoko i ai. Ko e mena ia, kua nakai tauhele he tau tagata tapuaki ha Iehova e tau mena ne fifili he falu ke taute ke fakalataha atu ke he matakau politika, foli ma e tuaga politika, po ke vili. Mo e lafi ke he tuuho he tau tagata tapuaki mooli he Atua ke he tau mena fakapolitika,  kua omaoma a lautolu ke he matafakatufono. Ko e ha? Ha kua poaki he Kupu he Atua a lautolu “kia omaoma” ke he “tau tui ne mua” he fakatufono. (Roma 13:1) He magaaho ka ha ha ai e taufetoko ke he mena ne manako he Atua mo e tau mena ne manako he fakatokaaga fakapolitika, ne muitua e tau tagata tapuaki mooli ke he fakafifitakiaga he tau aposetolo, ne talahau: “Kua lata ni ke mua e omaoma ke he Atua ke he omaoma ke he tau tagata.”Gahua 5:29; Mareko 12:17.

13. Fēfē e onoonoaga he tau tutaki mooli ha Iesu ke he Kautu he Atua, ti ko e heigoa ne taute e lautolu?

 13 Ne fakamatala he tau tutaki mooli ha Iesu ko e Kautu he Atua ko e amaamanakiaga hokoia ma e tau tagata. Ne talahau tuai e Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) He nakai fakaohooho e tau tagata ke onoono ke he pule he tau tagata ke fakamafola e tau lekua ha lautolu, ne fakapuloa he tau tutaki mooli ha Iesu Keriso e Kautu he Atua he lagi ko e amaamanakiaga hokoia ma e tau tagata. (Salamo 146:3) Ne fakaako e Iesu a tautolu ke liogi ma e fakatufono mitaki katoatoa ia he magaaho ne talahau e ia: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:10) Ne talahau tuai he Kupu he Atua ko e Kautu nei he lagi “to tuki malipilipi mo e fakaotioti e tau kautu oti ia [ne tutū he mogonei], ka ko ia to tumau tukulagi a ia.”Tanielu 2:44; Fakakiteaga 16:14; 19:19-21.

14. Matakau fakalotu fe kua mailoga e koe ne kua taute e tau poaki ma e tapuakiaga mooli?

14 He fakavē ke he mena ne fakatutala a tautolu ki ai, hūhū hifo ki a koe ni: ‘Matakau lotu fe ne fakavē e tau fakaakoaga oti ha lautolu ke he Tohi Tapu mo e fakailoa e higoa ha Iehova? Matakau fe ne fakagahua e fakaalofa mahani Atua, fakagahua e tua ki a Iesu, nakai ko e tau tagata he lalolagi, mo e fakapuloa ko e Kautu he Atua ko e amaamanakiaga hokoia ma e tau tagata? Mai he tau matakau fakalotu oti he lalolagi, ha e fe e matakau ne taute oti e tau poaki nei?’ Kua fakakite fakamaali he tau mena tutupu ko e Tau Fakamoli a Iehova.Totou Isaia 43:10-12.

KO E HEIGOA HAAU KA TAUTE?

15. Ko e heigoa ne manako e Atua ke lafi atu ke he talitonu kua moui a ia?

15 He talitonu noa ke he Atua kua nakai kuenaia ke fakafiafia aki a ia. Ha ko e mena ne talahau he Tohi Tapu kua talitonu foki e tau temoni kua moui e Atua. (Iakopo 2:19) Ka e kitia maali ai, ne nakai taute e lautolu e finagalo he Atua mo e nakai moua e taliaaga haana. Ke talia he Atua, kua nakai ni lata ke talitonu kua  moui a ia ka kua lata foki ia tautolu ke taute e finagalo haana. Kua lata foki ia tautolu ke vevehe kehe mai he lotu fakavai mo e kuku mau e tapuakiaga mooli.

16. Ko e heigoa kua lata ke taute neke fai vala he lotu fakavai?

16 Ne fakakite he aposetolo ko Paulo kua nakai lata ia tautolu ke fai vala ke he tapuakiaga fakavai. Ne tohia e ia: ‘Kia vevehe kehe a mutolu, kua pihia mai ai a Iehova, aua foki neke piki atu a mutolu ke he mena kelea; ti talia ai e au a mutolu.’ (2 Korinito 6:17; Isaia 52:11) Ti kua lata he tau Kerisiano mooli ke kalo mai he ha mena ne matutaki atu ke he tapuakiaga fakavai.

17, 18. Ko e heigoa a ‘Papelonia Lahi,’ mo e ko e ha kua mafiti ai ke ‘hola kehe mai ia ia’?

17 Ne fakakite he Tohi Tapu ko e tau vahega oti he lotu fakavai ko e vala ha ‘Papelonia Lahi.’ * (Fakakiteaga 17:5) Ko e higoa ia kua fakamanatu ki a tautolu e maaga tuai ha Papelonia, ne kamata i ai e lotu fakavai he mole e Fakapuke he vahā ha Noa. Ko e tau fakaakoaga mo e tau gahua ne kitia mau he lotu fakavai kua tupu mai tigahau i Papelonia. Ma e fakatai, ne tapuaki e tau Papelonia ke he tau atua tolu taha, po ke ne tolu e ulu. He vahā nei, ko e matapatu fakaakoaga he tau lotu loga ko e Tolu Taha. Ka e fakaako fakamahino mai he Tohi Tapu kua taha maka ni e Atua mooli, ko Iehova, ti ko Iesu Keriso e Tama haana. (Ioane 17:3) Ne talitonu foki e tau Papelonia kua ha ha he tau tagata e tino kua moui ka mole e mate he tagata mo e maeke ke matematekelea ke he matakavi fakakikiveka. He vahā nei, ko e taofiaga ke he tino nakai mate po ke agaaga ka matematekelea ke he afi tote kua fakaako he tau lotu loga.

18 Ha kua holofa e tapuakiaga ha Papelonia i tuai ke he lalolagi katoa, ko Papelonia Lahi he vahā foou nei kua kitia tonu ko e kautu he tau lotu fakavai he lalolagi. Mo e kua talahau tuai he Atua ko e kautu nei he lotu fakavai to hokotia ke he fakaotiaga fakalutukia. Kua kitia nakai e koe e kakano ke vevehe kehe katoatoa mai he tau vala oti ha Papelonia Lahi? Kua manako  a Iehova ko e Atua ki a koe ke fakamafiti ke ‘hola kehe mai ia ia’ he fai magaaho agaia.Totou Fakakiteaga 18:4, 8.

He fekafekau ki a Iehova mo e tau tagata haana, to lahi e mena ka moua e koe mai he tau mena ne galo

19. Ko e heigoa ka moua e koe he fekafekau ki a Iehova?

19 Ti ko e fua he fifiliaga haau ke tiaki e tau gahua he lotu fakavai, to liga fifili falu ke oti e matutakiaga mo koe. Ka e, he fekafekau ki a Iehova mo e tau tagata haana, kua mua atu e tau mena ka moua e koe ke he tau mena ne galo. Ke tuga e tau tutaki fakamua atu ha Iesu ne tiaki e falu mena ke mumui ki a ia, to fakahiku a koe ke moua e tau tugaane mo e tau mahakitaga fakaagaaga loga. To eke a koe mo vala he magafaoa lahi he lalolagi katoa he tau Kerisiano mooli ne totou miliona, ne fakakite ki a koe e fakaalofa mooli. Mo e to moua e koe e amaamanakiaga homo ue atu he moui tukulagi ‘he fakatokaaga hane hau.’ (Totou Mareko 10:28-30.) Liga ka fai magaaho, ko lautolu ne tiaki a koe ha ko e tau taofiaga haau to kumikumi ke he tau mena ne fakaako i loto he Tohi Tapu mo e o mai ke eke mo tau tagata tapuaki ha Iehova.

20. Ko e heigoa e amaamanakiaga he vahā anoiha ma lautolu ne fakagahua e lotu mooli?

20 Ne fakaako he Tohi Tapu nakai leva to tamai he Atua e fakaotiaga ke he fakatokaaga kelea nei mo e hukui aki e lalolagi tututonu foou i lalo he pule he Kautu haana. (2 Peteru 3:9, 13) Ko e lalolagi homo lahi ha a ia! Mo e he fakatokaaga tututonu foou ia, to taha ni e lotu ka ha ha i ai, taha e tapuakiaga mooli. Kua nakai kia ko e puhala pulotu ke taute e koe e tau lakaaga kua lata ke fakalataha mo e tau tagata tapuaki mooli he magaaho tonu nei?

^ para. 17 Ma e falu fakailoaaga hagaao ke he kakano ne hukui e Papelonia Lahi e kautu he tau lotu fakavai he lalolagi, kikite e vala tala he Apenetiki “Mailoga a ‘Papelonia Lahi.’